Koneliasi Atambula Sipilitu ya Kujela

Mu Sezaliya mwakele munalume muka-Loma wa lizina lya Koneliasi uje wapwile kapitau ka maswalale. Nameme kapwile kaJuda, oloni baJuda bamusingimikile. Wakele na kukwasa tuhutu na baje bakele mu bujene. Koneliasi wakulahelele Yehova, co wakele na kulombela kuli ikeye simbu yoshe. Litangwa limo, kangelo washolokele kuli Koneliasi na kumuleka ngwendi: ‘Njambi nazibi malombelo obe. Ngeci, tuma banu ku nganda ya Jopa kuje kwali Pita mangana bakamusane.’ Co haje bene Koneliasi watumine bangamba bendi ku mbwela. Buje bungenzi bwapwile bwa makilomita 50.

Pita mwakele mu Jopa, wamwene cimona. Wamwene tusitu baje kubapandele kulya baJuda, co wazibile lijwi limuleka ngwalyo alye baje tusitu. Pita wabyanene na kwendeka ngwendi: ‘Kanda njilyeho kasitu wa kujwala.’ Co lijwi lyendekele lalo ngwalyo: ‘Keti usane aba tusitu ngwobe ba kujwala. Njambi nabajelesa.’ Co lalo Pita bamulekele ngwabo: ‘Kuli banalume batatu bali na kukutonda. Ngeci katuka uye nabo.’ Co Pita waile ku cikolo na kukehula baje banalume bibakele na kutonda. Bamukumbulwile ngwabo: ‘Koneliasi uje wapwa kapitau ka maswalale ba Loma natutumu ngwendi uye netu ku njibo yendi ku Sezaliya.’ Pita wabalekele ngwendi balale mu njibo yendi. Lyamukwabo, wakatukile na kuya nabo. Bandolome bamo ba ku Jopa nabo baile hamo nendi.

Koneliasi mwamwene Pita wawililile ku mendi endi na kumutsikamena. Oloni pita wamulekele ngwendi: ‘Imana, nange nji munu ngwe mwobe. Njambi nanjileke ngwendi njije ku njibo yobe nameme baJuda kubesi kuya ha binjibo bya baje kubapwile baJuda. Ngeci njileke biunanjisanena.’

Koneliasi walekele Pita ngwendi: ‘Matangwa awana kunima njinakala na kulombela kuli Njambi, co kangelo nanjilekele ngwendi njikusane. Shukulu-kambu tulongese majwi a Yehova.’ Pita wendekele ngwendi: ‘Njazibisisoni ngwange Njambi kesi na kangu, oloni atambula woshe uje ashaka kumulemesa.’ Pita wabalongesele byabingi hali Yesu. Sipilitu ya kujela yezile hali Koneliasi na baje boshe bakele nabo, co boshe babambwitikile.