Banu 8 Bobokele na Kukobela mu Kaye Kakaha

Nowa na naanga yendi na tusitu bakobelele mu bwato. Yehova washokele cikolo, co nyonzi yashangumukile kunyoka. Yanyokele manene, co bwato bwashangumukile kufumuka. Mu kwita kwa simbu, lifuti-libu lyoshe lyashulile na mema. Banu boshe bababi kubakobelele mu bwato, co batsile. Oloni Nowa na naanga yendi babanyungililile mukati. Acisinganyekeni lika kubwaha kubazibile mwafwa ya kwononoka Yehova.

Nyonzi yanyokele butsiki na mutanya ha matangwa 40, co yakile. Co mema ashangumukile kutepuluka kamandondo-kamandondo. Mu kwita kwa simbu, bwato bwakwimanene ha minkinda. Oloni Nowa na naanga yendi kubasele kutuhuka muje mu bwato mwafwa kwacikele mema amangi.

Mema ashangumukile kuma kamandondo-kamandondo. Nowa na naanga yendi bakele mu bwato ha simbu ya kutubakana mwaka. Co Yehova wabalekele ngwendi basa kutuhukoni hanja haje hasholokele ngwe mu kaye kakaha. Bakandelelele manene kuli Yehova ha kubobola, co bamwesele eci kukandelela ha kumwana mulambu.

Yehova watambwile mulambu wabo. Co wakulahesele ngwendi kakanyongesaho lalo byuma byoshe ha lifuti-libu na libazi. Washolwele nkongolo lwakulibanga mwilu kupwa cimweso ca cije cikulaheso. Kuma mwamonaho laja nkongolo ndi?

Yehova walekele Nowa na naanga yendi ngwendi bakite bana na kushulisa lifuti-libu.