Mukanda wa Kutunda ku Cibunga ca Kutwamenena
‘Munapande kupwa balongesi.’ (Heve 5:12) Acisinganyekeni ha majwi awa. Yehova, Mulongesi wakama mwilu na hasi, natulanya tulongese bakwetu bya ikeye. Cipangi ca kulongesa busunga bwa Yehova, ipwe mu naanga, mu cikungulukilo, nambe mu lihya, cinapu cakama manene, co lalo kunapu kubezika kwakama. Twasa bati kulongesa banu?
Cikumbululo tuciwana ku majwi asonekele kapositolo Paulu kuli Timateo. Wendekele ngwendi: “Twalelelaho kwaka mana obe kutandela ku mbunga na kutakamesa banu na kulongesa.” Wendekele lalo ngwendi: “Nga ulinga byuma ebi, ulyobola yobe babenya na kwobola baje bakutolilila.” (1 Tima 4:13, 16, NWT) Tuli na muzimbu wa kwobola banu. Ngeci, tunapande kubwezelela ku cashu cetu ca kutanda na kulongesa. Uno mukanda banamisonekelawo mangana umikwase. Co muli byuma bino:
Ha liputa na liputa hali cisoneka cije cili na cinangulo ca mu Mbimbiliya ca kukundama ku cilongesa na simpi yakama ije imwesa mwakupangesela cilongesa
Yehova wapwa “Mulongesi Wakama.” (Isaya 30:20, NWT) Nameme uno mukanda umikwasa kubwezelela ku cashu ceni ca kutanda na kulongesa, oloni zibukeni ngweni Yehova ikeye babenya muzimbu, co ikeye akakoko banu baije kuli ikeye. (Yow 6:44) Ngeci, mulombeni mangana amyane sipilitu yendi ya kujela. Pangeseni Lijwi lya Njambi simbu yoshe. Kwaseni banu bashangazale Yehova, keti yeni. Bakwaseni bazeme manene Yehova.
Yehova namilanya kulongesa banu muzimbu wa seo manene. Twakulaela ngwetu mubalongesa mwamubwa mwafwa mupangesa ‘nzili ije ibamyana kuli Njambi.’—1 Petu 4:11.
Yetu bakweni balongesi,
Cibunga ca Kutwamenena ca Bakaleho ba Yehova