CILONGESA 47
Mwalibwahesela Kumimbwitika Ndi?
Kushwa hamunashangumukila kulilongesa Mbimbiliya, mwalilongesa byuma byabingi hali Yehova. Co twakulahela ngwetu muli na kupangesa bimunalilongesa. Oloni hamo muli na kuliziba ngweni kumwalibwaheselele kulikundika kuli Yehova na kumimbwitika. Muno mu cilongesa, tusimutwiya byuma bikalingisa bamo bonwe kubambwitika na kumona mumwasa kubihyanena.
1. Munapande kulilongesa biñanda bya kupwa hali simbu kanda bamimbwitike?
Simbu kanda bamimbwitike, munapande ‘kuzibuka busunga.’ (1 Timateo 2:4) Oloni kukulumbununa ngwabo munapande kuzibuka bikumbululo ku bihula byoshe bibanasa kumihula kutalesa ku Mbimbiliya. Nameme baka-Kilistu babanambwitika laja, bacili na kutwalelelaho kulilongesa. (Kolose 1:9, 10) Oloni kuli bilongesa bimo bya seho bya mu Mbimbiliya bimunapande kuzibuka. Bakulunu mu cikungulukilo bamikwasa mumone indi bimunalilongesa binapumo.
2. Bika bimunapande kulinga simbu kanda bamimbwitike?
Simbu kanda bamimbwitike, munapande ‘kutenguluka na kwiluka kuli Njambi.’ (Tandeni Vilinga 3:19.) Oku kulumbununa ngwabo muliziba kubihya mwafwa ya bubi bwoshe-bwoshe bumunalingi na kulomba Yehova amikonekele. Munapande lalo kulyakela cilengo ca kujeneka kulinga byuma byabibi na kulinga mwoshe mumwasela mangana muzibise Njambi kubwaha. Kutundaho, munapande kukunguluka na kupwa muka-kwambulula wa kujeneka kumbwitika.
3. Mwafwa bika lyoba kulyapandele kumyonowesa kulikundika kuli Yehova na kumimbwitika?
Bamo bakatewe ngwabo nga balikundika kuli Yehova na kubambwitika, hamo kulutwe bakonowa kushulisilila bibanamukulahesa. Cili bene, bisimbu bimo munasa kusebuka ngwe mubalingile bangamba ba Njambi bamo ba kusañulu. Yehova azibuka ngwendi bangamba bendi kubasa kulinga byuma byoshe mu kulumbunuka. (Tandeni Myaso 103:13, 14.) Oloni ashaka ngwendi mulinge mwoshe mumwasela kulinga byuma byabibwa. Co amikwasa. Yehova natukulahesa ngwendi ‘nacimo cahi casa kututundisa ku cizemo cendi.’—Tandeni Loma 8:38, 39.
TONDESESENI
Kuzibuka Yehova na kutambula bukwasi bwendi kumikwasa bati mangana muhyane byuma bije bimyonowesa kumimbwitika?
4. Zibukeni mwamubwa Yehova
Biñanda bya kupwa hali bimunapande kuzibuka hali Yehova simbu kanda bamimbwitike? Munapande kuzibuka mwamubwa Yehova na kumuzema na kulinga byuma bije bimuzibisa kubwaha ku mbunge. Kengeni VIDIO mangana mumone bamo mubanalingila ngoco. Kutundaho, simutwiyeni ha cihula cinatako.
Kwesekesa na vidio, bika bibalingile bamo mangana babambwitike?
Tandeni Loma 12:2, na kusimutwiya ha bihula binatako:
Kuma kuli biñanda bimo bya mu Mbimbiliya bikamilingisa muuwasane ndi? Kuma mwakulahela ngweni Bakaleho ba Yehova bali na kulongesa busunga ndi?
Nga muli na kuuwasana, bika bimunapande kulinga?
5. Keti mutabese cuma coshe-coshe cimyonowese kumimbwitika
Nga tulikundika kuli Yehova na kutumbwitika, tunapande kuzibuka ngwetu twasa kuliwana na bukalu. Kengeni VIDIO na kusimutwiya ha bihula binatako.
Kwesekesa na vidio, byuma muka byahyanene Narangerel mangana apangele Yehova?
Kuzema Yehova kunamukwasele bati ahyane bukalu bwanaliwanene nabwo?
Tandeni Visimo 29:25 na 2 Timateo 1:7. Kutundaho, simutwiyeni ha cihula cinatako:
Bika bitukwasa tuhyane byeseko?
6. Kulaheleni ngweni Yehova amikwasa
Yehova amikwasa nga mushaka kulinga byuma byatonda. Kengeni VIDIO na kusimutwiya ha bihula binatako.
Kwesekesa na vidio, bika byalingisile uje muka-kulilongesa Mbimbiliya akotokele kumumbwitika?
Byuma muka byalilongesele bije byamukwasele akulahele manene Yehova?
Tandeni Isaya 41:10, 13, na kusimutwiya ha cihula cinatako.
Bika bimilingisa mukulahele ngweni mushulisilila bimukulahesa Yehova omwo mulikundika kuli ikeye?
7. Kandeleleni kuli Yehova mwafwa wamizema
Kusinganyekesesa mwamizemena Yehova kumilingisa mumukandelele na kushaka kumupangela mu kuyoya kweni kwoshe. Tandeni Myaso 40:5, na kusimutwiya ha cihula cinatako:
Byuma muka byanamilingila Yehova bije bikamilingisa mumukandelele manene?
Kapolofweto Njelemiya wazemene manene Yehova na Lijwi lyendi. Co walizibile ngwendi kupwa ngamba ya Yehova kwapwile kubezika kwakama. Wendekele ngwendi: “Omwo wendekele kuli yange, njatolililile majwi oshe na kuwononoka, omwo njapwa nji wobe, yobe Shukulu Kalunga Njambi Muka-nzili Yoshe.” (Njelemiya 15:16) Kumbululeni bihula binatako:
Mwafwa bika kupwa Mukaleho wa Yehova kunapu kubezika kwakama?
Kuma neni mushaka kumimbwitika na kupwa Mukaleho wa Yehova ndi?
Kuma kuli bimo bili na kumyonowesa kumimbwitika ndi?
Bika bimunapande kulinga mangana bamimbwitike?
BAMO BAKENDEKA NGWABO: “Hamo kunjasa kutwalelelaho kupwa wa kulongwa kuli Yehova munima ya kunjimbwitika.”
Neni mukemwo mumukalizibila ndi?
SIMPI YAKAMA
Yehova asa kumikwasa muhyane byuma byoshe-byoshe bije bimumona ngweni bimyonowesa kumimbwitika.
Kwitulukamo
Biñanda bya kupwa hali bya mu Mbimbiliya bimunapande kuzibuka simbu kanda bamimbwitike?
Byuma muka bimunapande kutengululako mu kuyoya kweni mangana bamimbwitike?
Mwafwa bika lyoba kulyapandele kumyonowesa kulikundika kuli Yehova na kumimbwitika?
WANENI BIKWABO
Bika binapande kumilingisa bamimbwitike?
“Mwalibwahesela Kumimbwitika Ndi?” (Kaposhi ka Kukengela ka March 2020)
Nangukeni mumwasa kuhyanena byuma bije binasa kumyonowesa kulikundika kuli Yehova na kumimbwitika.
“Bika Binjonowesa Kunjimbwitika?” (Kaposhi ka Kukengela ka March 2019)
Moneni byakwasele munalume umo ahyane byuma bije byamwene ngwendi bimwonowesa kumumbwitika.
Ha kulibanga, munalume wa lizina lya Ataa kashakele kumumbwitika. Nangukeni byamulingisile amone ngwendi banapande kumumbwitika.