Bika Bimunapande Kulinga Mangana Mukayoye mu Kaye Kakaha?

Biñanda binahu binatumwesa ngwabyo ololo Njambi atundisako banu bababi boshe na bukalu bubali na kunena. Twakulahela ngwetu ebi byuma bikalishulisilila. Mwafwa bika? Mwafwa Mbimbiliya inakulahesa ngwayo:

“Kaye na byuma byoshe bilimo . . . bili na kwita.” —1 YOWANO 2:17.

Twakulahela lalo ngwetu kuli bamo bakoboka mwafwa ou mukanda unakulahesa lalo ngwawo:

“Uje alinga cizango ca Njambi akayoya myaka yoshe.”

Ngeci, kwoboka kunemana ha kulinga cizango ca Njambi. Oloni tunapande tahi kuzibuka Njambi asina twase kulinga cizango cendi.

ZIBUKENI NJAMBI MANGANA MUKOBOKE

Bikupulo: 1. Nesi najuka, co natumbama. 2. Ali na kulihwimisako mu mutungo wa kutelekela, co ali na kutala nesi mukwabo uje ali na kutanda kaposhi oku nabwahelela. 3. Mukwabo mubakapangela ali na kumutandela vesi imo ya mu Mbimbiliya na kumwana kadi ya kumutwala ha jw.org.

Yesu wendekele ngwendi: “Co mwonyo wa myaka yoshe ukewo ou, ngeci bakuzibuke yobe Njambi umolika wa busunga.” (Yowano 17:3) Ngeci, nga tushaka kukoboka na kukayoya myaka yoshe, co tunapande tahi ‘kuzibuka’ Njambi. Oku kukulumbununa kukulahela lika ngwetu Njambi kwakala na kuzibukako lika byuma byabindondo hali ikeye embwe. Oloni tunapande kulikuta busamba nendi. Nga tushaka ngwetu busamba bwetu na bakwetu bukanyame, co tunapande kuwana-wanako simbu yaingi ya kusikama nabo. Mu ngila imolika, nga tushaka ngwetu busamba bwetu na Njambi bukanyame, co tunapande kuwana-wanako simbu ya kusimutwiya nendi. Tusimutwiyeni ha biñanda bimo bya mu Mbimbiliya bije bitukwasa tutwaleleleho kukanyamesa busamba bwetu na Njambi.

Biñanda Muka Bitulilongesa mu Mbimbiliya?

Tulilongesa ngwetu Njambi wayongwele ngwendi tuyoye mu Paradaisi hano hasi.

Watangele banu ba kulibanga, Adama na Eva, co wabakele mu lihya lyalibwa lya Edeni. Bapwile ba kulumbunuka, co Njambi wabanene byuma byoshe bibatondele mangana balikuwe kuyoya. Bapandele kuyoya myaka yoshe. Ngeci, ngwe batwaleleleho kwononoka Njambi ngwe kubatsile. Oloni balyangwilile kupokola lishiko lyalyasi lyabanene Njambi.

Tulilongesa bituli na kuyandela.

Mwafwa ya kujeneka kwononoka Njambi Adama wazimbalesele mwonyo wa myaka yoshe, co wonowesele banu boshe hano hasi kuuwana. Mbimbiliya ngwayo: “Ngecibene, bubi bwezile hano ha kaye hali munu umolika, co bubi bwendi bunanene kutsa. Co kutsa kunete ku miyati yoshe ya banu.” (Loma 5:12) Ngwe lika munu mwanasa kutambwila mushongo ku bisemi bendi, bana ba Adama nabo banatambula bubi kuli ikeye. Mukemwo tuli na kukulubala na kutsa.

Tulilongesa byanalingi Njambi mangana atukwase.

Mbimbiliya ngwayo: “Omwo Njambi wazemene baka-kaye manene ngeci wanene Munendi umolika, ngeci woshe akulahela kuli ikeye kesi anyonge, oloni akale na mwonyo wa myaka yoshe.” (Yowano 3:16) Njambi watumine Yesu mangana akutsile banu boshe. Munalume umo wa ku India wa lizina lya Prabhakar wa myaka 86 wendekele ngwendi: “Omwo Yehovaa watumine Munendi kwakunjitsila, namwesa ngwendi wanjizema manene. Cizemo cendi cinanjikwasa njikale na lilabelelo lya kukawana mwonyo wa myaka yoshe.”

Tulilongesa mutwasa kumwesela kukandelela ku byuma byoshe byanatulingila Njambi.

Mbimbiliya ngwayo tumwesa ngwetu twakandelela ku byuma byanatulingila Njambi nga “twononoka mashiko” endi. (1 Yowano 2:3) Yehova Njambi ali na kutukwasa kuzibuka bitunapande kulinga mangana tulikuwe kuyoya. (Isaya 48:17, 18) Njambi kashaka ngwendi tuyande embwe. Natukulahesa ngwendi nga twononoka mashiko endi, co tupwa ba kubwahelela na kukayoya myaka yoshe.

TANDENI MBIMBILIYA HA LITANGWA NA LITANGWA

Nesi ali hanja ha simbu ya cakulya ca mutanya, co ali na kutala mwilu munima ya kutanda Mbimbiliya. — Nga mutwalelelaho kulombela na kulinga cizango ca Njambi, co mukoboka omwo kano kaye kakanyonga

Tukali byakulya mangana tutwaleleleho kuyoya. Oloni Yesu wendekele ngwendi: “Munu kasa kuyoya na makende lika embwe, oloni kubanga na majwi oshe a Njambi.”—Mateo 4:4.

Ano matangwa, twasa kuwana majwi a Yehova mu Mbimbiliya. Nga mutanda eli libulu lya kujela, co muzibuka byuma byalingile Njambi kunima, byali na kulinga ha simbu ino nebi byakalinga kulutwe.

LOMBENI BUKWASI KULI NJAMBI

Bati nga mushaka kwononoka Njambi, oloni kuli na kumikaluwila kwecela kalingolingo kamo kakabi? Nga mukemwo, co kuzibuka Njambi mwamubwa kumikwasa manene.

Tusimutwiyeni hali munakazi wa lizina lya Sakura uje wakele na kulinga bukwizi. Omwo washangumukile kulilongesa Mbimbiliya, wazibukile lishiko lya Njambi lije lyendeka ngwalyo: “Teweni bupangala.” (1 Kolinte 6:18) Ngeci, Sakura walombele nzili kuli Njambi, co wamukwasele ecele aka kalingolingo kendi kakabi. Oloni watwaleleleleho kuliwana na byeseko. Wendekele ngwendi: “Munjikakala na bisinganyeka byabibi, njikalombela kuli Yehova na kumuleka mwoshe munjili na kulizibila mwafwa njizibuka ngwange kunjasa kuhyana eci ceseko likalyange. Kulombela kunanjilingisa njishwenye manene kuyehi na Yehova.” Ngwe mwa Sakura, banu babangi ano matangwa bali na kulilongesa bya Njambi na kumuzibuka. Co akabana nzili mangana batengululeko byuma bimo mu kuyoya na kulinga byuma bije bimuzibisa kubwaha.—Filipu 4:13.

Nga muzibuka mwamubwa Njambi, co nendi ‘amizibuka’ ha kupwa babusamba bendi bazema. (Ngalatiya 4:9; Myaso 25:14) Co mukoboka na kukakobela mu kaye kakaha. Kaye kakaha kakafwa bati? Eci cihula banacikumbulula mu ñanda inatako.

a Mbimbiliya inamwesa ngwayo Yehova likelyo lizina lya Njambi