CILONGESA 49
Twasa Kuyoya Myaka Yoshe
“Bakawana kuyoya kwa myaka yoshe.”—IWANO 17:3.
MWASO 147 Njambi Natukulahesa Kuyoya kwa Myaka Yoshe
BILI MUNO MU CILONGESAa
1. Kusinganyekesesa ha cikulaheso ca Yehova ca kuyoya myaka yoshe kutukwasa bati?
YEHOVA nakulahesa ngwendi baje bononoka kuli ikeye bakayoya “myaka yoshe.” (Loma 6:23) Nga tusinganyekesesa ha byuma byanatukulahesa Yehova, co tumuzema manene. Cakumwenako, Tate yetu wa mwilu watuzema manene, co kakatuseze.
2. Cikulaheso ca kukayoya myaka yoshe citukwasa bati?
2 Cikulaheso canatukulahesa Njambi ca kuyoya myaka yoshe, citukwasa tukolese omwo tuliwana na byeseko. Nameme bitozi betu batuleka ngwabo batutsiya, kutulikele kupangela Yehova. Mwafwa bika? Mwafwa tuzibuka ngwetu nameme tunatsi, Yehova akatusangula, co tukayoya myaka yoshe. (Iwano 5:28, 29; 1 Kori 15:55-58; Hebe 2:15) Bika bitulingisa tukulahele ngwetu twasa kuyoya myaka yoshe? Tusimutwiyeni ha byuma binatako.
YEHOVA WAKALAKO KU MYAKA YOSHE
3. Bika bitulingisa tukulahele ngwetu Yehova akatwana mwonyo wa myaka yoshe? (Myaso 102:12, 24, 27)
3 Tuzibuka ngwetu Yehova akatwana mwonyo wa myaka yoshe mwafwa ikeye akana mwonyo, co lalo wakalako myaka yoshe. (Myaso 36:9) Tusimutwiyeni ha mikanda imo ya mu Mbimbiliya ije imwesa ngwayo Yehova wakalako myaka yoshe, co lalo atwalelelaho kukalako myaka yoshe. Mukanda wa Myaso 90:2 wendeka ngwawo Yehova wakalako “myaka yoshe.” Mukanda wa Myaso 102 nawo umwesa ngoco. (Tandeni Myaso 102:12, 24, 27.) Co kapolofweto Hambakuke wendekele hali Tate yetu wa mwilu ngwendi: “Obe Yehova, yobe wakalako myaka yoshe. Yobe wapwa Njambi yange Wakujela, kuwesi kutsa.”—Hamba 1:12.
4. Kuma tunapande kulishoshomwena nga kutukaluwila kuzibisisa ngwetu Yehova wakalako myaka yoshe ndi? Lumbununeni.
4 Kuma kukamikaluwila kuzibisisa ngweni Yehova wakalako “myaka yoshe” ndi? (Isaya 40:28) Banu babangi bakalizibi ngoco. Elihu wendekele hali Njambi ngwendi: ‘Kutwasa kuzibuka bungi bwa myaka yendi.’ (Yombi 36:26) Oloni kujeneka kuzibisisa byuma bimo kukulumbununa ngwabo bya makuli. Cakumwenako, nameme kunasa kutukaluwila kuzibisisa mwakapangela malaiti, kuma oku kulumbununa ngwabo kuwakeleko ndi? Embwe. Mu ngila imolika. Kunasa kutukaluwila kuzibisisa ngwetu Yehova wakalako myaka yoshe, co lalo atwalelelaho kukalako. Oloni oku kukulumbununa ngwabo Njambi kakeleko myaka yoshe. Oku kumwesa ngwabo Njambi atwalelelaho kukalako myaka yoshe nameme tuzibisisa ngoco nambe embwe. (Loma 11:33-36) Co lalo wakeleko simbu kanda byuma byoshe bya mwilu na hasi bikaleko kwambateselela na litangwa na bingongonosi. Yehova natuleke ngwendi ikeye “watangele kaye na nzili yendi.” Wakeleko simbu kanda ‘ajangumune melu.’ (Njele 51:15; Bili 17:24) Cuma muka cikwabo citulingisa tukulahele ngwetu twasa kukayoya myaka yoshe?
YEHOVA WATUTANGELE TUYOYE MYAKA YOSHE
5. Lilabelelo muka libakelenalyo ba Adama na Eva?
5 Yehova mwatangele byuma lwakulibanga, wayongwele ngwendi banu batwaleleleho kuyoya nameme byuma bikwabo byatangele byasele kutsa. Yehova walekele Adama ngwendi: “Oloni ku bushuka bwa muti wa mana a kuzibuka bubwa na bubi, kesi ukalyeko. Omwo nga ukalyako, co ukatsa ku litangwa lije bene.” (Kusha 2:17) Ngwe Adama na Eva bononokele Yehova ngwe kubatsile. Mu kwita kwa simbu, hamo Yehova wesi kubatabesele kulya ku “muti wa mwonyo.” Oku kwesi kulumbunwine ngwabo Njambi nabatabesa ‘bayoye myaka yoshe.’b—Kusha 3:22.
6-7. (a) Byuma muka bikwabo bimwesa ngwabyo Njambi watangele banu mangana bayoye mwaka yoshe? (b) Byuma muka bimushaka kukalikuwa kulutwe? (Taleni bikupulo)
6 Baka-sayansi bamo banawana bukaleho bumwesa ngwabo bwongo bwetu bwasa kutulika byuma byabingi kutubakana bije bitwasa kuzibuka mu kuyoya kwetu. Ei ñanda ikomokesa. Mu 2010, libulu limo lyalumbunwine ngwalyo bwongo bwetu bwasa kutulika biñanda bije bitwasa kwesekesa ku vidio ya maola 3 milyoni, ije itwasa kukenga mu myaka ya kutubakana 300. Oloni bwongo bwetu bwasa kutulika biñanda byabingi kutubakana bibanamwesa omu mu libulu. Nameme ngoco, ei ñanda imwesa ngwayo Yehova watangele bwongo bwetu bwase kutulika biñanda byabingi kutubakana bije bitwasa kutulika mu myaka 70 nambe 80.—Myaso 90:10.
7 Yehova watutangele lalo na lishungu lya kushaka kuyoya myaka yoshe. Mbimbiliya inendeka ha banu ngwayo Njambi “naka kuyoya kwa myaka yoshe mu bimbunge byabo.” (Kwambu 3:11, NWT) Mukemwo twamona kutsa kupwa citozi. (1 Kori 15:26) Nga tubinja manene, kuma tukatumama lika na kubandamena litangwa lya kutsa ndi? Embwe. Kakengi tukai ku cipatela mangana bakatwane bumbanda buje butukwasa tukanguke. Tukalingi mwoshe mutwasela mangana keti tutse. Co nga munu itwazema natsi, ipwe mwanike nambe mukulunu, tukazibi manene kubabala ku mbunge. (Iwano 11:32, 33) Twasa kutwalelelaho kulilongesa na kukala na lishungu lya kukayoya myaka yoshe mwafwa Ishamatanga yetu wa cizemo mukemwo mwatutangelele, co twakulahela ngwetu akashulisilila biyongola byendi. Oloni kuli byuma bikwabo lalo bitulingisa tukulahele ngwetu tukayoya myaka yoshe. Tusimutwiyeni ha byuma byalingile Yehova kusañulu, bije bimwesa ngwabyo ashaka kushulisilila biyongola byakele nabyo ha kulibanga.
Lilabelelo lya kukayoya myaka yoshe likatulingisa tusinganyekesese ha byuma bitukalikuwa kulutwe (Taleni paragirafu 7)c
BIYONGOLA BYA YEHOVA KUBYATENGULUKILE
8. Mukanda wa Isaya 55:11 utulongesa bika ha byuma byanayongola kutulingila Njambi?
8 Nameme ba Adama na Eva balingile bubi na kunena butsi ku bana babo, oloni biyongola bya Yehova kubyatengulukile. (Tandeni Isaya 55:11.) Anga ashaka ngwendi banu ba kulongwa bakayoye myaka yoshe. Byuma byanendeka Yehova nebi byanalingi mangana ashulisilile biyongola byendi, bikebyo bitulingisa twendeke ngoco.
9. Bika byanatukulahesa Njambi? (Ndanyele 12:2, 13)
9 Yehova nakulahesa ngwendi akasangula batsi na kubana mwonyo wa myaka yoshe. (Bili 24:15; Tito 1:1, 2) Yombi uje wapwile munalume wa kulongwa wakulahelele ngwendi Yehova ashungwiya kukasangula batsi. (Yombi 14:14, 15) Kapolofweto Daniele wazibukile ngwendi banu bakasanguka na kukayoya myaka yoshe. (Myaso 37:29; tandeni Ndanyele 12:2, 13.) Bajuda ba mu simbu ya Yesu nabo bazibukile ngwabo Yehova akana bangamba bendi ba kulongwa kuyoya kwa “myaka yoshe.” (Luka 10:25; 18:18) Yesu welukilile-ilukilile kwendekele bya kusanguka, co nendi bamusangwile kuli Ishe.—Mate 19:29; 22:31, 32; Luka 18:30; Iwano 11:25.
Cikomokeso calingile Elinja ca kusangula muna fwile citukwasa bati? (Taleni paragirafu 10)
10. Mizimbu ya banu basangukile kusañulu imwesa bika? (Taleni cikupulo.)
10 Yehova ikeye Muka-kwana Kuyoya, co ali na nzili ya kusangula batsi. Wanene Elinja nzili ya kusangula muna fwile wa ku Zalefate. (1 Vimye 17:21-23) Kutundaho, Njambi wakwasele kapolofweto Elisha asangule mwana wa munalume wa munakazi wa ku Shuneme. (2 Vimye 4:18-20, 34-37) Ei mizimbu na mizimbu ikwabo imwesa ngwayo Yehova ali na nzili ya kusangula batsi. Yesu mwakele hano hasi, wamwesele ngwendi Ishe namwana nzili ya kusangula batsi. (Iwano 11:23-25, 43, 44) Ha simbu ino Yesu ali mwilu, co banamwana “moko yoshe ya mwilu na hasi.” Ngeci, akashulisilila cikulaheso ca kusangula “boshe bali mu bimbumbo bya canukiso” na kubana kuyoya kwa myaka yoshe.—Mate 28:18; Iwano 5:25-29.
11. Mulambu wa Yesu utukwasa bati tukayoye myaka yoshe?
11 Mwafwa bika Yehova watabesele Munendi bamutsiye butsi bwa kubabala manene? Yesu wakumbulwile eci cihula omwo wendekele ngwendi: “Njambi wazemene manene kaye mukemwo wanene Munendi umolika mangana woshe amukulahela keti anyonge, oloni awane kuyoya kwa myaka yoshe.” (Iwano 3:16) Njambi wanene Munendi kupwa mulambu mangana tukawane kuyoya kwa myaka yoshe. (Mate 20:28) Kapositolo Paulu wamwesele seho yebi biyongola bya Njambi mwasonekele ngwendi: “Ha kuwana ngwe kutsa kwezile kwitila muli munu umolika, na kusanguka nakwo kwija kwitila muli munu umolika. Mwafwa ngecilika boshe mubali na kutsa mwafwa ya Adama, mu ngila imolika, boshe bakayoya kwitila muli Kristu.”—1 Kori 15:21, 22.
12. Yehova akashulisilila bati byuma byanayongola kutulingila kupangesa Bumwene bwendi?
12 Yesu walongesele baka-kumukabangeya balombe Bumwene bwa Njambi bwije na cizango ca Njambi cilingiwe hano hasi. (Mate 6:9, 10) Njambi ashaka ngwendi banu bakayoye myaka yoshe hano hasi. Ngeci, nangula Munendi kupwa Mwene mu Bumwene bwa Mesiya mangana ashulisilile ebi biyongola. Njambi natwalelelaho kwangula banu ba kupwa 144,000 kutunda hano hasi mangana bakapangele hamo na Yesu mu kushulisilila cizango cendi.—Kujo 5:9, 10.
13. Yehova ali na kulinga bika ano matangwa, co bangamba bendi banapande kulinga bika?
13 Yehova ali na kukungulula “mbunga yakama” ya banu, co ali na kubalongesa mwakukayoyela mu Bumwene bwendi. (Kujo 7:9, 10; Jems 2:8) Nameme banu babangi mu kaye banalyangununa mwafwa ya bizindo na binzita, oloni baje bali mu mbunga yakama bali na kweseka mubasela mwoshe kuhyana bizindo. Kunapu lika ngwe bali na kufula mikwale yabo kupwa matemo. (Mika 4:3) Kubesi na kulikobelesa mu binzita bije bili na kutsiya banu babangi, oloni bali na kulongesa banu bya Njambi wa busunga na biyongola byendi mangana babakwase kuwana “kuyoya kwa busunga.” (1 Timo 6:19) Baka-naanga yabo banasa kubalwisa, co lalo banasa kuhutuwa mwafwa ya kukundwiya Bumwene bwa Njambi, oloni Yehova kabayengula. (Mate 6:25, 30-33; Luka 18:29, 30) Ebi byuma bimwesa ngwabyo Bumwene bwa Njambi kubuli, co buli na kushulisilila biyongola bya Yehova.
TUKAYOYA MWAMUBWA KULUTWE
14-15. Yehova akashulisilila bati cikulaheso cendi ca kunyongesa kutsa?
14 Ha simbu ino, Yesu napu Mwene wa Bumwene bwa Njambi mwilu, co akashulisilila byuma byoshe byanakulahesa Yehova. (2 Kori 1:20) Yesu natwalelelaho kuhyana bitozi bendi kushwa mu 1914. (Myaso 110:1, 2) Yesu na bakubwabesa ololo bamaneselela kufungulula kwabo mubakanyongesa baka-bubi.—Kujo 6:2.
15 Ha myaka 1,000 yakayula Yesu, batsi bakasanguka, co banu ba kulongwa bakapwa ba kulumbunuka. Munima ya ceseko ca mamaneselelo, baje bakakula Yehova kupwa baka-busunga ‘bakakala mu lifuti, co bakayoyamo myaka yoshe.’ (Myaso 37:10, 11, 29) Tukabwahelela manene omwo “kutsa, cije capwa citozi wamamaneselelo, bakacinyongesa.”—1 Kori 15:26.
16. Cuma muka cakama cinapande kutushongangeya tupangele Yehova?
16 Ngwe mutunasimutwiya muno mu cilongesa, lilabelelo lyetu lya kukayoya myaka yoshe lyatunda mu Mbimbiliya. Eli lilabelelo litukwasa tutwaleleleho kupwa ba kulongwa nameme byuma binakaluwa manene muno mu matangwa a kukotoka. Oloni nga tushaka kuzibisa Yehova kubwaha ku mbunge, kutwapandele lika kumupangela mwafwa ya kushaka kukayoya myaka yoshe. Kuzema manene Yehova na Yesu kukekwo kunapande kutushongangeya tutwaleleleho kupwa ba kulongwa kuli bakebo. (2 Kori 5:14, 15) Cizemo cikeco cinapande kutushongangeya tubatembwinine na kuleka bakwetu bya lilabelelo lituli nalyo. (Loma 10:13-15) Nga tweseka mutwasela mwoshe kupwa baka-kwana, co Yehova apwa kabusamba ketu.—Hebe 13:16.
17. Bika byanapande kulinga umo na umo wetu? (Mateu 7:13, 14)
17 Kuma neni mukatambula kuyoya kwa myaka yoshe ndi? Yehova ashaka ngwendi tukayoye myaka yoshe. Ngeci tunapande kutwalelelaho kwenda mu ngila ije itwala ku mwonyo wa myaka yoshe. (Tandeni Mateu 7:13, 14.) Byuma bikafwa bati mutukayoya myaka yoshe? Tukasimutwiya ha cihula eci mu cilongesa cinatako.
MWASO 141 Kuyoya Kwapwa kwa Kukomokesa
a Kuma mushaka kukayoya myaka yoshe ndi? Yehova natukulahesa ngwendi litangwa limo tukasa kuyoya kwa kujeneka kulishoshomwena ha kutsa. Muno mu cilongesa, tusimutwiya ha byuma bimo bitulingisa tukulahele ngwetu Yehova akashulisilila byuma byanakulahesa.
b Taleni cipalo ca “Mubanalumbunwina Lijwi lya ‘Myaka Yoshe’ mu Mbimbiliya.”
c KULUMBUNUNA CIKUPULO: Ndolome wa kakulukazi ali na kusinganyekesesa ha byuma byakalikuwa kulutwe mwa kayoya myaka yoshe.