Bika Byasa Kumikwasa Mutande Mbimbiliya Simbu Yoshe?
KUMA simbu imo kukamikaluwila kulikuwa kutanda Mbimbiliya calumingo na calumingo ndi? Tubaboshe tukalizibi ngoco bisimbu bimo. Oloni acisinganyekeni ha byuma bitukalingi simbu yoshe byakufwa ngwe kutana. Tukalifwiti mangana tutane, oloni munima ya kutana tukalizibi bwino. Kutanda Mbimbiliya nakwo tunasa kucesekesa ku ‘kutana na mema kwitila mu lijwi.’ (Efeso 5:26) Tucisimutwiyeni ha byuma byasa kumikwasa:
Bwaheseni cinoneko. Cilongesa ca munu endilika capwa cimo ca “byuma bya seho manene” byanapande kulinga muka-Kristu woshe. (Filp 1:10) Nga mushaka ngweni mukabangeye mwamubwa cinoneko ceni ca kutanda Mbimbiliya, co munapande kucaka haje hamwasa kucimona simbu yoshe. Mwasa kucaka ha libaya lya mizimbu nambe ha cikolo ca fuliji. Co lalo mwasa kwaka alamu ha foni nambe ha likina lyeni mangana imyanukise simbu ya kulinga cilongesa ca munu endilika.
Anguleni simbu na ngila ya kulilongeselamo ije imikwasa. Ngila muka imukapangesa mu kutanda Mbimbiliya? Cakumwenako, kuma mukaka mbunge ku byuma bimutanda ha ola imolika ndi? Indi mukaka mbunge ku byuma bimutanda ha minutu yaindondo ha bisimbu byakuliseza-seza? Yeni babenya muzibuka bimikwasa. Ngeci anguleni simbu imunona ngweni yaibwa. Nga muliziba ngweni kumwasa kutanda Mbimbiliya ha simbu imunangula, co esekeni kuitanda mu minutu 10 lika. Nga mutanda Mbimbiliya ha minutu 10, mwasa kulilongesa byabingi kutubakana kulikela. Nga mwalikuu kutanda Mbimbiliya ha minutu 10, co mwasa kukala na lishungu lya kutwalelelaho kuitanda.—Filp 2:13.
Anguleni cimweja biñanda bimushaka kulilongesa. Nga kumwangwila cimweja byuma bimushaka kulilongesa simbu kanda mushangumuke kulilongesa, co kumwesi na ‘kupangesa mwamubwa simbu yeni.’ (Efeso 5:16) Mwasa kunoneka mukana wa byuma bimushaka kulilongesa. Nga muli na cihula ha ñanda ije kumuzibisisa mwamubwa, co cibwezeleleni ku mukana weni. Co lalo munima ya cilongesa ceni, mwasa kubwezelelela bisimpi ku cinoneko ceni bimushaka kukalilongesa ha cilongesa cinatako.
Tengululeniko cinoneko ceni nga kunapande kulinga ngoco. Cuma ca seho manene cinapu kutanda Mbimbiliya calumingo na calumingo. Ngeci mwasa kwangula kutengulula ku simbu na biñanda bimushaka kulilongesa na kwangula litangwa lyeka nga kunapande. Kulinga ngoco kumikwasa mulilongese Mbimbiliya calumingo na calumingo.
Kulilongesa Mbimbiliya simbu yoshe kukatukwasa manene. Kukanyamesa busamba bwetu na Yehova na kutukwasa twangule mwamubwa byakulinga, co lalo kutukwasa tukole ku sipilitu.—Yosh 1:8.