Mä tsondaˈaky

TYÄˈÄDË yëˈë tuˈugë liibrë diˈib myëdäjtypyë maytyaˈaky diˈib jantsy tuun jantsy jäjtë. Jap të yajjuuty mä Biiblyë, tuˈugë liibrë diˈib niˈigyë myëjëty abëtsemy Nyaxwinyëdë. Mdukmëtmaytyäˈägëdëp wiˈixë jukyˈäjtënë të nyëˈëyoˈoy tyuˈuyoˈoy mä ja Dios dyajkojtsondaky tijatyëty. Axtë mˈanëˈëmxëdëp nandëˈën ti Dios tyuknibëjtakëp ttunäˈäny mä tiempë myiny kyëdaˈaky.

Tyäˈädë liibrë yëˈë mduknijawëdëp tijaty myëmiimbyë Biiblyë. Mdukˈixyˈatëdëbë jäˈäy diˈibë Biiblyë myaytyakypy ets tijaty tyuundë. Nandëˈën xytyuknijäˈäjëm ko Dios të tˈawanë naxwinyëdë jäˈäy tmoˈoyaˈanyë jukyˈäjtënë winë xëë winë tiempë ko nety ja Naxwinyëdë të jyëmbity tsuj.

Tyäˈädë liibrë ja tmëminyë maytyaˈaky 116. Tuktujk peky nyaywyaˈxyëty. Mä tsyondaˈaky tuk pekyaty tap tukˈääjy miny mä tnigajxy wanaty ti myaytyäˈägaampy. Per dëˈën jap yˈity waapy extëm tijaty tyuun jyäjtë. Tyäˈädë mbäät mbudëkëty ets xynyijawët ti tuun jäjtë jayëjp ets ti tuun jäjtë ok.

Tyäˈädë liibrë wingëjxy myaytyaˈaky. Mayë ënäˈkuˈunk këˈëm tkäjxäˈändë. Yëˈë uˈunk tääk uˈunk teety yˈixandëp wiˈixë yˈënäˈkuˈunk xyondäˈäktë ko ttukwingugäjxëdët kanäk okë tyäˈädë liibrë. Tadë ëxpëjkënë diˈib myëmiimbyë tyäˈädë liibrë yˈoymyëdowaambyë mëjäˈäytyëjk etsë ënäˈktëjk.

Mä kyexy tuˈuk tuˈugë maytyaˈaky tap myinyë tekstë diˈib mä Biiblyë. Oy ko xykyäjxëdë tekstë mä të yajjuutyë tadë maytyaˈaky. Mä kyëjxnë tadë maytyaˈaky 116 jap xypyäädäˈäny yajtëˈëwën, käjxë tadë yajtëˈëwën kogoo xykyäjxët tuˈuk tuˈugë maytyaˈaky, ets xyjamyatsët wiˈix yaˈatsoojëmbity.