María, jaa tyäägë Jesus, tsojkëbë nety yˈitët jotmëk parë ttunët ti Jyobaa tuknipëjkë. Yëˈë yajmaxuˈunkˈataampy tuˈugë uˈunk oyë nety kyajnëm tmëttsëënë yetyëjk. María kyaj nety tnijawë wiˈix yeeky pyety tuˈugë uˈunk, per yëˈë nety yajmaxuˈunkˈataampy, ja mëdiˈibë yajtijäämp Mesías. Waˈan ojts tmëmay tmëdäjy wiˈixë net ttukmëtmaytyäˈägëdë José mëdiˈibë nety pyëkaampy (Luk. 1:​26-33). ¿Ti María pudëjkë? Yëˈko tˈëxtääyë naybyudëkë. Extëm nˈokpëjktakëm, yajtëëwë ja anklës Gabriel wiˈix mbäät dyajˈyeeky dyajpety ja Diosë yˈUˈunk (Luk. 1:34). Ko tiempë nyajxy, ta María ojts nyëjkxy “mä tuˈugë käjpn diˈibë ijtp Judeeë tunoty kopkoty” parë tkuˈixëyaˈanyë Elisabet. Elisabet jyotmëkwingäjpxë María ets ojts tnaskäjpxë mët yëˈëgyëjxmë espiritë santë ti nety tyunaampy ja uˈunk mëdiˈibë yajmaxuˈunkˈataampy (Luk. 1:​39-45). María ta yˈatsooy ko Jyobaa yëˈë nety ja myëkˈäjtën të dyaˈixyëty (Luk. 1:​46-51). Jyobaa yëˈë yajtuunë Gabriel etsë Elisabet parë tjotmëkmooyë María. w23.10 paj. 14, 15 parr. 10-12

Të yajwinˈixtë Diosmëduumbëty 144,000 mëdiˈibë mëdë Jesus tyunäˈändë saserdotë jam tsäjpotm, yäˈädë nmëguˈukˈäjtëm jantsy oy mëdë Dios nyaymyayëdë (Diˈibʉ Jat. 14:1). Mientrës jyukyˈattë yä Naxwiiny, Dios të wyinˈixëdë mët yëˈëgyëjxmë yˈespiritë santë etsë net yˈuˈunkniwäˈänëdë. Ja lugäärë Wäˈätspë mëdiˈibë nety yajpatp mä ja tabernakulo, yëˈë yˈandijpy ko jantsy oy mëdë Dios nyaymyayëdë (Rom. 8:​15-17). Ets ja lugäärë Mëk Wäˈätspë, yëˈë yˈandijpy ja tsäjp mä yajpäätyë Jyobaa. “Ja kortinë” mëdiˈibë yajnaywyäˈkxëp, yëˈë yˈandijpy ja Jesusë nyiniˈkx kyëbäjk mëdiˈibë myëdäjt yä Naxwiiny. Jesus naxwinyëdë jäˈäyë nety, pääty kyaj mbäät tyëjkë tsäjpotm parë tyunët saserdotë wintsën mä ja templë mëdiˈibë Jyobaa jyaˈäjtypy. Ko Jesus dyajkyë nyiniˈkx kyëbäjk extëmë wintsëˈkën parë ttukˈoyˈatët niˈamukë ja naxwinyëdë jäˈäy, ta yˈawatsy ja tuˈu parë mbäät tyëkëdë tsäjpotm pënaty të yajwinˈixtë yˈanaˈamdët. Ets parë nyëjkxtët tsäjpotm, tsojkëp nanduˈun dyajwëˈëmdët ja nyiniˈkx kyëbäjk mëdiˈibë yä Naxwiiny (Eb. 10:​19, 20; 1 Kor. 15:50). w23.10 paj. 28 parr. 13

Gedeón kyaj jyotˈambëjky ko nyibëdëˈkëdë ja tyëëm yˈäätsë Efraín (Juec. 8:​1-3). Niˈigyë yˈijty yujy tudaˈaky ets tmëdoowˈijty wiˈix yaˈˈanmääy, ta net ojts tnaxˈëy tnaxkajpxy. Pënaty tuundëp mëjjäˈäy nanduˈun tijaty ttundë extëmë Gedeón, ko yajxon tmëdoowˈittë ets yuunk naxypy tˈatsoowëmbittë ko jam pën yˈëbäät kyäjpxpäädëdë (Sant. 3:13). Ko duˈun ttundë, ta dyajjapˈattë tuˈugyëˈäjtën mä Diosë kyäjpn. Gedeón yëˈë yajmëjpëtsëëmë Jyobaa ko jäˈäy ojts myëjkugäjpxëdë ko tmëmadaky ja myëtsip (Juec. 8:​22, 23). ¿Wiˈix mbäädë mëjjäˈäytyëjk tpanëjkxëdë yˈijxpajtën? Ko yëˈë dyajmëjpëtsëmdëdë Jyobaa ko nety jam ti oy ttundë (1 Kor. 4:​6, 7). Extëm ko tuˈugë mëjjäˈäy yaˈˈanëëmët ko jantsy oy tyimtukniˈˈijxënë, mbäät yˈatsoy ko japën duˈun myiny mä Diosë yˈAyuk ets ko niˈamukë nˈawij nˈagajëm mët ko Diosë kyäjpn xytyukniˈˈijxëm. Pënaty tuundëp mëjjäˈäy oy ko näˈäganäˈäty nyayajtëwëdët pën extëm tyukniˈˈixëdë yëˈë yajmëjpëtsëëmdëbë Jyobaa o yëˈë këˈëm nayajmëjpëtsëëmëdëp. w23.06 paj. 4 parr. 7, 8