Mä myaxuˈunkˈäjtyë Jesús axtë mä yˈoˈky

Ja anklës Gabryel ojts yajtuknigexy tuˈugë kiixy diˈib jantsy oyjyaˈay, txëˈäjty Mariiʉ. Gabryel ta tˈanmääyë Mariiʉ ko tpäädäˈäny tuˈugë uˈunk diˈib anaˈamäämp extëmë rey winë xëë winë tiempë. Tyäˈädë uˈunk yëˈë Jesús diˈib maxuˈunkˈäjt mä jëyujk tsäjkää yˈity, jap ja borreegë kuentˈäjtpë ojts kyuˈixëdë. Ok ta net ja jäˈäyëty diˈib tsoˈondëp mä xëë pyëtsemy tˈijxtë tuˈugë mëtsäˈä diˈib ojts myënëjxëdë mä Jesús. Nijawëyäˈänëm nandëˈën pën diˈib yajkëxëˈk ja mëtsäˈä, ets wiˈixë Jesús kyaj yˈoˈky ko ja jäˈäy tjaˈëxtääytyë winmäˈäny ets yˈoogët.

Ok nijawëyäˈänëm wiˈixë Jesús ojts tmëtkajxy tmëtmaytyaˈaky ja mëjäˈäytyëjk diˈib yaˈëxpëjktëp mä Diosë tyëjk, ko ja jyëmëjt tmëdäjty mäjmajtsk. Kyum 18 jëmëjt ta nyëbejty, ta net tyëjkë ëwäˈx käjxwäˈxpë ets ja jäˈäyëty ttukniˈijxë Diosë yˈAnaˈam Kyutujkënë, pes päätyë netyë Dios të kyexyëty yä Naxwiiny. Ta twinˈijxy nimäjmajtskë yetyëjk diˈib yˈapostëlëˈäjt ets diˈib pudëjkëdë mä ja tuunk.

Jesús ojts nandëˈën ttuny mayë mëjˈäjtënë. Yajkääjy yaˈuk milˈamë jäˈäy mët tuˈuk majtskë äjkxuˈunk etsë tsäjkaaky. Yaˈagëdakë pumäˈäy jyaˈay ets axtë yajpëdëˈkë oˈkpë. Ok ta net nijawëyäˈänëm tijatyë Jesús jäjt këbajtë ja xëë mä nety yˈooganë, ets wiˈix yˈoˈky. Tëgëk jëmëjt ja kujmë Jesús ojts yˈëwaˈxy kyäjxwaˈxy, pääty mä tyäˈädë MYËDËDUJK Peky ja nyajxyë tiempë naa 34 jëmëjt.