Kyutëgoyë Jerusalén käjpn

Ja nax käjpn diˈib Judá kanäkˈok tmëjagamgaktë Jyobaa ets janääm jatsojk tˈawdäjttë wiink dios. Nuˈun nyajxyë tadë tiempë, ojtsë Jyobaa tyuknigaxëdë niganäägë kugajpxy parë jyodëmbittët, per yëˈëjëty kyaj myëdoowdë, jeˈeyë tnëxik ttukxiktë. Pääty, ¿ti Jyobaa tyuun parë kyaj tnekyˈawdattëdë wiink dios?

Ja rey Nabucodonosor diˈib Babilonia, ojts tjaˈabëky kanäägë it lugäär, ets ko tjaˈabëjkyë Jerusalén käjpn, ta tmäjtsy ja rey Joaquín, ja prinsipes, tsiptuumbëty ets ja jäˈäyëty diˈib tijaty këˈam yaˈoˈoyëdëp parë ojts dyajnëjkxtë Babilonia. Nan ojts tmënëjkxy ja oorë platë diˈibë nety ijtp mä Jyobaa tyëjk. Ok, ta Nabucodonosor tpëjtaky ja Sedequías parë yˈanaˈamët Judá.

Sedequías ojts tim ogäˈän tˈokmëmëdoy ja Nabucodonosor. Per ja kugajpxyëty diˈib kyaj Jyobaa yajtuunëdë ets ja myëgäjpnbäˈäjëty ojts yˈanëˈëmxëdë parë kyaj tnekymyëmëdowdëdë Nabucodonosor. Jeremías ta yˈanmääyë: “Pën mgujuundakp, jaˈˈatäämbë yuu, oˈk tëgoˈoyën etsë päˈäm”.

Ko netyë Sedequías kujk yˈaneˈemy tuktujk jëmëjt, ta kyujuundaky ets ta tˈamdooyë naybyudëkë parë myindët ja soldäädëtëjk diˈib Egipto. Ta netë Nabucodonosor tkejxy ja syoldäädëtëjk parë dyajkutëgoytyëdë Jerusalén käjpn. Ko jam jyäjttë, ta dyajnadujktääytyë ja käjpn ets jam ojts nyaynyikojëdë. Jeremías ta tˈanmääy ja Sedequías: “Duˈunë Jyobaa jyënaˈany ko pën mnaygyëyäjkëp mä Babilonia, ta mnitsoˈogët mëdë mnax mgäjpn. Per pën kyaj mnaygyëyakyëty, ta dyajnitoyäˈändë Jerusalén käjpn ets myajmënëjkxäˈäny tsumytsyënaabyë”. Sedequías ta yˈatsooy: “¡Kyajts nnaygyëyakäˈänyëty!”.

Ko nyajxy tuk jëmëjt ja kujkm, ta tuk pëkyë Babilonia jäˈäyëty tnajijtuttë ja Jerusalén käjpnë nyabots, mä ojts nyaxtë parë tnoˈktë ja käjpn. Nan ojts tnoˈoktë ja templë, dyaˈoˈktë mayë jäˈäy ets milˈam ojts tmënëjkxtë tsumytsyënaabyë.

Sedequías ojts kyeˈeky, per ta ja Babilonia jäˈäyëty pyatsoˈonëdë ets naa jam yajmäjtsy Jericó, ta ojts yajmënëjkxy mä ja rey Nabucodonosor. Jam ja rey tyukˈijxë wiˈix ja yˈuˈunk yˈënäˈk yˈoˈktääytyë, ta net ojts yajwiintsëty ets yajpëjtaky pujxndëgoty. Jap ojts yˈoˈknë. Perë Jyobaa, ta ttukwandaky ja nax käjpn diˈib Judá: “Ko nyaxët 70 jëmëjt, ta jatëgok nyajjëmbitäˈändë Jerusalén”.

¿Wiˈixë nety jyatäˈändë ja ënäˈktëjk diˈib yajmënëjkxtë Babilonia? ¿Waˈandaa nety duˈunyëm tmëdunäˈändë Jyobaa?