Jesus tyukniˈˈijxë ja yˈëxpëjkpëty wiˈix nyuˈkxtäˈäktët

Tukëˈëyë diˈib tyuundë fariseety, yëˈë parë ttukˈixandë ja wiink jäˈäy. Ko ijty pën ttukmëdundë oyˈäjtën, yëˈë parë nyayajmëjpëtsëmëdë. Extëm nˈokpëjtakëm, ko ijty nyuˈkxtäˈäktë mä mayjyaˈay yajpäättë yëˈë parë jäˈäy yˈixëdët. Agëbajky ijty tjattë wiˈix nyuˈkxtäˈäktët ets yëˈë nyikäjpxmiin nyikäjpxëjptëp mäjaty ja sinagoogë ets nëˈääy tuˈääy parë jäˈäy tmëdowdët. Pääty, mëjˈixyë jäˈäy tjäˈäwëdë ko Jesus jyënany: “Këdii duˈun mnuˈkxtäˈäktë extëmë fariseety. Yëˈëjëty wyinmaytyë ko Dios jyantsy yˈoymyëdowaampy ko ääw ayuk tnipiw tnikondët, per kyaj tyëyˈäjtënëty. Ko mnuˈkxtäˈägët, yëˈë duˈun parë Jyobaa xymyëtmaytyäˈägët, kyaj yëˈëyë xynyikäjpxëmbitët diˈib të xyjaty. Pesë Jyobaa tsyojkypy parë xytyukmëtmaytyäˈägët wiˈix meerë mnayjawëty”.

Jesus ta yˈakjënany wiˈix mbäät nuˈkxtakëm: “NDeetyˈäjtëm mä mˈity jam tsäjpotm, waˈanë mxëëw twäˈätsy. Yajmin ja mˈAnaˈam mGutujkën. Waˈan dyajtuny ja mtsojkën, duˈun extëm jam tsäjpotm nanduˈun yä naxwiiny”. Ta netë Jesus yˈanmääyëdë ko tsojkëp tninuˈkxtäägëdët bom bom ja kyaˈay yˈukën, tˈamdowdëdë maˈkxën, ets tijaty yajtëgoyˈäjttëp.

Nanduˈunë Jesus jyënany: “Xëmë mnuˈkxtäˈägët. Amdoowˈadëˈëtsë Jyobaa ja oyˈäjtën. Niˈamukë tääk teety myoˈoyandëbe yˈuˈunk yˈënäˈk diˈib oy. Pënë mˈuˈunk mˈamdoowëbë tsäjpkaaky, ¿mmoˈoyëp tuˈugë tsää? Ets pën mˈamdoowëp tuˈugë äjkx, ¿mmoˈoyëp tuˈugë tsäˈäny?”.

Ta netë Jesus tnimaytyaky ti diˈib xytyukniˈˈijxëm: “Pën mijts mmoobyë mˈuˈunk mˈënäˈk ja oybyë regalë, ¡pes mas niˈigyë ja mDeetyë tsäjpotmëdë mmoˈoyaˈanyëtyë espiritë santë! Jeˈeyë ko xyˈamdowët”. ¿Mduumpy duˈun extëmë Jesus jyënany? ¿Ti mˈamdoobyë Jyobaa ko xymyënuˈkxtaˈaky?