Jesus yaˈˈagëdakë jäˈäy sääbëdë xëëw

Ja fariseety yˈaxëkˈijxtë Jesus ets yˈëxtääytyë winmäˈäny parë yajmatsët. Jyënandë ko Jesus kyaj mbäät dyaˈˈagëdaˈagyë päˈäm jäˈäy sääbëdë xëëw, jaˈko poˈkxën xëëw. Mä tuˈugë sääbëdë, Jesus ta tˈijxy tuˈugë yetyëjk diˈib wiints tˈamdoyë limosnë nëˈääy tuˈääy. Ta Jesus tˈanmääy ja yˈëxpëjkpëty: “Ixtë wiˈixë Diosë myëjääw dyaˈˈagëdäˈägäˈänyë tyäˈädë yetyëjk”. Ta netë Jesus dyaˈoˈkyë moˈonts mëdë tsyujy ets ta waanë ttukwinguguˈtsë ja yetyëjk ets tˈanmääy: “Nëjkx mwimbujy mä ja nëëdankë diˈib Siloam”. Ta ja yetyëjk duˈun ttuuny ets ta yˈijxpëjky, ninäˈänëmë nety kyaˈixy.

Ja jäˈäyëty mëjˈixy tjäˈäwëdë ets jyënandë: “¿Ti kyaj yëˈëjëtyë tyäˈädë yetyëjk diˈib ijty yˈamdoobyë limosnë? ¡Pes tim duˈun yˈixëty!”. Ta yˈatsooy: “Ëjtsën ja yetyëjk diˈib maxuˈunkˈäjt wiints”. Ta jäˈäy yajtëëwëdë: “¿Ets tiko tyam mˈixy?”. Ta tmaytyaky ti nety të tyuny të jyatyëty. Ta ojts yajwoownëjkxy mä fariseety parë ttukmëtmaytyäˈägët.

Ta ja yetyëjk ttukmëtmaytyakyë fariseety: “Yëˈëtsë Jesus të xytyukwinguguutsë moˈonts etsëts të xyˈanëëmë parëts nwimbujët. Ets duˈuntsën të nduny, päätyëts të nˈijxpëky”. Ta ja fariseety nyayˈanmääyëdë: “Pënë Jesus yaˈˈagëdakypyë jäˈäy sääbëdë xëëw, kyaj jamë myëkˈäjtën tsyoony mä Dios”. Perë wiinkpë jyënandë: “Pënë myëkˈäjtën kyaj jam tsyoony mä Dios, ¿wiˈixën mbäät dyaˈˈagëdaˈagyë päˈäm jäˈäy?”.

Ja fariseety ta ojts tnigaxëdë ja tyääk tyeetyë tyäˈädë yetyëjk ets dyajtëëwdë: “¿Wiˈixën ko tyamë tyäˈädë mˈuˈunk yˈixy?”. Ta tsyëˈkëdë ja tyääk tyeety, mët ko të nety ja fariseety jyënäˈändë ko yˈëxkaxandëp mä sinagoogë pënaty myëbëjktëbë Jesus. Pääty yˈatsoowdë: “Kyajts nnijawëdë, yajtëwdë yëˈë”. Ta ja fariseety tˈakˈyajtëëwdë tijaty ja yetyëjk ets yˈatsoowëdë: “Të ndukmëtmaytyaktäˈäytyë. ¿Tikots xyˈaktimˈyajtëwdë?”. Ta jyantsy jotˈambëjktë ja fariseety ets tjëbijpëtsëëmdë.

Ok, ta Jesus ojts tninëjkxy ja yetyëjk ets dyajtëëy: “¿Mmëbëjkypyë Mesías?”. Ja yetyëjk ta yˈatsooy: “Koxyëbëts nˈoknijawë pën yëˈë, nmëbëkëbëts”. Jesus ta tˈanmääy: “Ëjtsën ja Mesías”. ¿Këdii Jesus oyjyaˈaytyak mët ja yetyëjk diˈibë nety wiints? Yaˈˈagëdak ets nan pyudëjkë parë tmëdatëdë mëbëjkën.