Yajmatsyë Jesus

Jesus mët ja yˈapostëlëty ojts nyëjkxtë mä ja kopk diˈib Olivos ets nyäjxtë mä ja yˈajoyë Cedrón. Ja nety naa tsuˈumgujkm ets meerë nety ja poˈo pyikë. Ko jyäjttë Getsemaní, ta Jesus yˈanmääyëdë: “Wëˈëmdë yä ets wijy nayaˈitëdë”. Ta netë Jesus wanaty ojts nyasˈyoˈoyë ets nyaygyoxtënääytyakë. Jantsy määy jantsy täjpë nety ets tmënuˈkxtakyë Jyobaa: “Waˈan dyajtunyë mtsojkën”. Ta netë Jyobaa tkejxy tuˈugë yˈanklës parë jyotkujkmoˈoyëdët. Ta jatëgokë Jesus jyëmbijty mä nety nidëgëëk ja yˈapostëlëty ets ko ttukˈyoˈoybyejty, të nety myanäjxtäˈäytyë. Pääty tˈanmääy: “¡Jotwijtë! Kyaj tyam ttiempëty parë mäˈädët. Të tyam tpääty ja tiempë parëts nyajkëyakët mätsë nmëtsipëty”.

Ta jyajtyë Judas, mët tuk grupë jäˈäyëty ak mëdë yˈespäädë etsë kyepyëty. Judas wäˈätsë nety tnijawë mä Jesus yajpäädäˈäny, mët ko të nety kanäkˈok jap yˈotsy mëdë Jesus ets ja apostëlëty. Judas të nety tˈanëëmë ja soldäädëtëjk ti tyunaampy parë nyigëxëˈëgët pënën Jesus. Nidëyë ojts tninëjkxyë Jesus ets tˈanmääy: “Wiˈix jyaty Wintsën”, ta ojts ttsuˈkxy. Jesus ta yˈanmääyë: “Judas, ¿duˈunëts xykyëyaky mët kots xytsyuˈkxy?”.

Jesus ta wyäˈkpëtsëëmy ets dyajtëëyë jäˈäyëty: “¿Pën mˈëxtääytyëp?”. Yëˈëjëty ta jyënandë: “Yëˈë Jesus diˈib tsoˈomp Nazaret”. Jesus ta yˈatsooy: “Ëjtsë duˈun xëwˈäjtp”. Ta ojts yˈëxtëkëwäˈäktë ets nyayjijtakëdë. Jesus ta jatëgok dyajtëëy: “¿Pën mˈëxtääytyëp?”. Ta jatëgok yˈatsoowdë: “Yëˈë Jesus diˈib tsoˈomp Nazaret”. Jesus ta yˈatsooy: “Të nˈanëëmëdë ko ëjtsë duˈun. Pääty mmastuˈuttë tyäˈädë yetyëjkëty, waˈan tnëjkxtë”.

Ko Pedro tpëjkyë kyuentë ti nety tuun jäjtëp, ta tjuˈtyë yˈespäädë ets ta ttatsktsujktuty ja Malco, diˈibë nety tuumbëˈäjtëbë saserdotë wintsën. Perë Jesus ta ojts ttoonë ja tyatsk ets dyaˈˈagëdaky. Ta netë Pedro tˈanmääy: “Pëjkëˈëgë mˈespäädë. Yëˈko pën mtsiptuump mëdë mˈespäädë, nan yëˈë myaˈoogëdëp”. Ta ja soldäädëty tmäjtstë Jesus ets tkëtsuumdë ets ja apostëlëty ta kyaktääytyë. Ta net ja jäˈäyëty ojts dyajnëjkxtë Jesus mä Anás, ja saserdotë wintsën. Ta Anás dyajustisëpatyë Jesus ets ta net ojts tkexy mä tyëjkë Caifás, ja saserdotë wintsën. Per ¿wiˈix jyäjttë ja apostëlëty?