Juan yajtukˈijx tijaty tunan jatanëp

Ko apostëlë Juan pujxndëgoty yˈijty mä isla diˈib Patmos, ta Jesus tyukˈijxë 16 pëky diˈib tunan jatanëp. Mä duˈun yajtukˈijxy, ta tˈijxyë Juan wiˈixë Jyobaa xyëëw wyaˈatsy, wiˈix myinyë yˈAnaˈam Kyutujkën ets wiˈixë tsyojkën yajtunäˈäny yä naxwiiny extëm jam tsäjpotm.

Mä tuˈugë kumäˈäy, ta Juan tˈijxy wiˈixë Jyobaa yˈuˈunyë mä yajkutuky. Ets të yajnadukyëty 24 mëjjäˈäytyëjk, akpoopxoxyëty ets tmëdattë kyoronë diˈib oorë. Mä yajkutukyë Jyobaa ta pyëtsëmyë tëˈkx jäjjën extëmë anaaw jëtsuk. Ta ja 24 mëjjäˈäytyëjk tniwindäˈäktë Jyobaa ets tˈawdattë. Mä ja tuˈugë kumäˈäy, ta Juan tˈijxy ja tëgoy myayjyaˈay diˈib tsoˈondëp mä tukëˈëyë nasionk, nax käjpn ets kanäägë ayuk tkäjpxtë diˈib yˈawdäjttëbë Jyobaa. Ja Borreeguˈunk yëˈë Jesus, diˈib pyastoorˈäjttëp ets diˈib tuˈumooyëdëp mä ja nëë diˈib yajkypyë jukyˈäjtën. Ta jatëgok tˈijxy ko Jesus yˈanaˈamtsoony extëmë rey jam tsäjpotm mët ja 24 mëjjäˈäytyëjk. Ta jatëgokë Juan tˈijxy ko Jesus tsyiptuny mëdë Dragón o Satanás etsë kyaˈoybyëtëjk. Ta Jesus yˈëxkajxëdë tsäjpotm ets kyujëbijpnäjxëdë yä naxwiiny.

Ta jatëgokë Juan tˈijxy ja Borreeguˈunk mët ja 144,000 tyanëdë mä ja kopk diˈib Sion. Juan nan yˈijx tuˈugë anklës kyaagëdity mä tukëˈëyë naxwinyëdë diˈib jënäämp: “Yajmëjpëtsëmdë Dios ets mëjkumaytyë”.

Ets mä jatuˈugë kumäˈäy, tˈijxy wiˈix tyunyëty ja tsip diˈib xyëwˈäjtypy Armajedon. Mä tyäˈädë tsip, Jesus mët ja tsyiptuumbëty tmëmadäˈäktë ja Satanásë jyaˈay. Timˈok, ta Juan tˈijxy ko niˈamukë tuˈugyë yˈittë ets agujk jotkujk, duˈun jam tsäjpotm ets yä naxwiiny. Nan yˈijxy wiˈix kyutëgoyë Satanás mët ja tyëëm yˈääts o pënaty panëjkxëdëp. Duˈun jam tsäjpotm ets yä naxwiiny akwäˈätsë Diosë xyëëw dyaˈijtëdë ets yëˈëyë yˈawdäjttëbë Jyobaa.