Pënaty kyäjpxtëbë ëxpëjkpajn yëˈë nyijawëyandëp

¿Waˈandaa Dios tkupëjktäˈäy oytyim pën jäˈäyëty?

▪ Kyupëjktaapy, pesë Biiblyë jyënaˈany: “Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es tmëduny” (Apostʉlʉty 10:34, 35).

Yä nˈijxëm ko Dios kyaj duˈun wyinmay extëmë naxwinyëdë jäˈäy. Pes mayë jäˈäy wyinmaytyë ko yëˈëjëty niˈigyë yˈoyˈattë ets kyaj dyuˈunëtyë wiink jäˈäy. Duˈun wyinmääyë Charles Darwin, diˈib kyujäˈäyë: “Ja näˈä, [...] yëˈë rasë diˈib mas kuwijy dyajkutëgooytyaˈayët ets twingudëgatsˈattëdë rasë diˈib jukyˈäjttëp extëmë jëyujk animalën”. Jotmaymyëët njënäˈänëm ko mayë jäˈäy të ttëytyundë myëguˈuk diˈib wiink lugäär tsoˈondëp mët ko wyinmaytyë ko yëˈëjëty niˈigyë mëj nyaxtë.

Per ¿tëyˈäjtëndaa ko jäˈäy diˈib tuk it tuk naxwinyëdë niˈigyë yˈoyëty? ¿Të tˈëxpëjkpëtsëmdë ëxpekyjyaˈay mä jäˈäyë syelulas ko ta diˈib mas oy? Kyaj, Bryan Sykes diˈib yaˈëxpëjkp mä Universidad de Oxford, yëˈë yˈëxpëjkpëtseempy mä yˈity jääybyety wiˈix tuˈugë jäˈäy yˈixˈatäˈäny (ADN), jyënaˈany: “Kyaj myiny mä selulas diˈib yajnigëxëˈëgëp ko tëgatsyatyë rasë. [...] Xëmëts xyajtëwdë pën abekyë yˈADN grieegë jäˈäy mëdë italianë jäˈäy, per kyaj, kyaj yˈabekyatyëty. [...] Niˈamukë tuktëëmˈäjt tukˈäätsˈäjtëm”.

Tyäˈädë tuˈugyëp extëmë Biiblyë jyënaˈany, ko Dios jeˈeyë ojts dyajkojy tuˈugë yetyëjk ets tuˈugë toxytyëjk ets ak jam ntsoˈondäˈäyëm (Génesis 3:20; Apostʉlʉty 17:26). Pääty, Dios windum ak tuknaxë jäˈäy.

Jyobaa kyaj yëˈë tˈixy ti koloor nˈixˈäjtëm o wiˈix ja wiin jëjp nmëdäjtëm, yëˈë yˈijxypy diˈib mas jëjpˈam: ja ngorasoonˈäjtëm. Yëˈë jyënaˈany: “Naxwinyëdë jäˈäy duˈun tijaty tpayoˈoytyë extëm tˈixtë, per ëjts yëˈëjëts nˈijxypyë korasoon” (1 Samuel 16:7, Nueva Biblia al Día). Ko duˈun nnijäˈäjëm mbäät xyjotkujkmoˈoyëm. Min nˈokˈijxëm tiko.

Oy mä ntsoˈonëm, may kyaj nnayˈoyˈijxëm wiˈix nˈixˈäjtëm, ets kyaj mbäät ti nduˈunëm parë nnayaˈoˈoyëm. Per diˈib mbäät nyaˈoˈoyëm, yëˈë nwinmäˈänyˈäjtëm etsë ngorasoonˈäjtëm ets yëˈë diˈib mas tsobatp (Kolosʉ 3:9-11). Oy ko nbawinmäˈäyëm wiˈix njäˈäyˈäjtëm, net nbëjkëmë kuentë pën mëj këjxm nayjäˈäwëm o pën naxypy nayajnäjxëm mä jäˈäy diˈib wiinktsoo tsoˈomp. Pes ko duˈun nayjäˈäwëm, kyaj tyuˈugyë mëdë Diosë wyinmäˈäny. Pääty tsojkëp nduˈunëmë mëjää ets nyajpëtsëˈëmëm mä jot korasoon (Salmo 139:23, 24).

Pën nduˈunëmë mëjää ets nwinmäˈäyëm extëmë Jyobaa, ta nëjkx xypyudëjkëm. Biiblyë jyënaˈany: “Yëˈë Jyobaa, tyukˈijxëtyaapy tukëˈëyë naxwinyëdë parë myëjää ttukpudëkëyaˈany pënaty amuumë kyorasoon ijtp mët yëˈë” (2 Crónicas 16:9). ¡Jantsy oy nayjäˈäwëm ko xëmë yˈadëyë tyäˈädë ää ayuk, oy mä ntsoˈonëm!