“Pën mbadiimpy extëmëts miits nˈanëëmëdë”
“Pën mbadiimpy extëmëts miits nˈanëëmëdë, nˈëxpëjkpëˈatëpts miitsëty, es mˈixyˈattëp ja tëyˈäjtën, es yëˈë tëyˈäjtën yëˈë myajwëˈëmëdëp awäˈätstuuy.” (FWANK 8:31, 32)
¿Ti Jesus myaytyäˈägan? Ko jyënany: “Extëmëts miits nˈanëëmëdë”, yëˈë yˈandijpy tijaty tukniˈˈijxë. Per ojts tnigajpxy ko kyaj yëˈë tjaˈajëty: “Ja nDeetyëts diˈibëts xykyajx, yëˈëts të xytyukˈaneˈemy diˈibëts ngäjxëp es diˈibëts ndukˈëxpëkëp” (Fwank 12:49). Tëgok, duˈun tmënuˈkxtakyë Tyeety: “Ja mˈayuk yëˈë duˈun ja tëyˈäjtën”. Pääty ko tyukniˈˈijxë, xëmë ojts ttukäjpxpetyë Diosë yˈAyuk (Juan 17:17, Traducción del Nuevo Mundo [NM]; Matewʉ 4:4, 7, 10). ¿Wiˈix mbäät tpadundë Jesusë yˈayuk pënaty jantsy panëjkxëdëp? Ko tˈaxäjëdë Biiblyë, Diosë yˈAyuk, extëm diˈib myëdäjtypy ja “tëyˈäjtën”, tmëmëdowdët ets jap dyajtsoondët tijaty tukniˈˈijxëdëp.
Yˈijxpajtën ja tim jawyiimbë kristianëty. Apostëlë Pablo, diˈib kanäägë neky jyaay mä Biiblyë, nan myëjˈijxë Diosë yˈAyuk extëmë Jesus. Yëˈë jyënany: “Dios wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën, es tëgekyë [...] tuump oy” (2 Timotee 3:16). Ja yetyëjkëty diˈib yaˈëxpëjktë mä ja naymyujkën ojts yaˈˈanëëmëdë ets kyaj “tyukniˈˈixëdët ja wiinkpë ayuk diˈib kyaj të tˈaxäjëdë mä Dios” (Tito 1:7, 9, Biblia en Lenguaje Sencillo [Nuevo Testamento]). Pënaty pyanëjkxtë Kristë nan ojts yaˈˈanëëmëdë ets nyaygyuentˈatëdët parë kyaj yajwinˈëëndët mëdë “wiinkpë ëxpëjkëny y wiinkpë winmaˈany jaˈa kaˈpë tyëyˈajtëty, jaˈ ko jaˈa duˈumbë jaˈay kaˈp jaˈa ëxpëjkëny jim yajtsoˈongëxy mä jaˈa Kristojëny” (Colosenses 2:8, Nuevo Testamento de Mazatlán [NTM]).
¿Pën tyam nanduˈun tyuundëp? Mä jëmëjt 1965 ja Vaticano tkupëjky tuˈugë liibrë diˈib xyëˈäjtypy Constitución dogmática sobre la divina revelación. Extëm tuk peky jyënaˈany, ojts jatëgok yajjääybyety mä Catecismo de la Iglesia Católica: “Tijaty yajnigäjpxp mä Tsäjptëjk kyaj tukëˈëyë tsyoony mä Biiblyë. Ets duˈun majtsk peky yajwintsëˈëgëyaˈany ets yˈitäˈäny mëj, duˈun ja kostumbrë diˈib tsäjptëgoty ets duˈunë Biiblyë”. Tuˈugë ministra diˈib Toronto (Canadá), jyënaˈany mä rebistë Macleanˈs: “¿Tiko xytyuˈumoˈoyëm tuˈugë ääw yoˈkn [...] diˈib myajtsk mil jëmëjtëp? Ëtsäjtëm nan nmëdäjtëmë oyatypyë winmäˈäny mä wiˈix tijaty nduˈunëm, per kyaj tyuny ko xëmë ndukwäˈkpajtëmë Jesusë tyukniˈˈijxën etsë Biiblyë”.
New Catholic Encyclopedia duˈun tmaytyaˈagyë Jyobaa tyestiigëty: “Duˈun jyukyˈattë extëmë Biiblyë jyënaˈany ets jap dyajpëtsëmdë tijaty tukniˈˈijxëdëp”. Näämnëm, tuˈugë yetyëjk diˈib Canadá ojts tkajpxypyoty tuˈugë Testiigë diˈibë nety mëtmaytyäˈäganëp, ets tˈanmääy: “Nnijäˈäbëts pën miitsëty”. Ta tniˈˈijxë ja Biiblyë ets jyënany: “Tadë liibrë diˈib mgëkonyˈajtypy yëˈë myajtukˈëxkäjptëp”.