Oybyë ayuk diˈib nyimaytyakypy ja kutujkën yajkäjpxwäˈkxäämp
“Tyäˈädë oybyë ayuk diˈibë nyimaytyakypy ja tsäjpotmëdë kutujkën yajkäjxwäˈxäämp es yajknijawët mä tëgekyë naxwinyëdë.” (MATEWɄ 24:14)
¿Ti Jesus myaytyäˈägan? Lucas tmaytyaˈaky ko Jesus “jyëdijty käjpngäjpn es tkäjxwaˈxy ja oybyë ayuk diˈibë nyigajxypy ja Diosë kyutujkën” (Lukʉs 8:1). Jesus jyënany: “Tsojkëp nandëˈën ëj nnëjxët mä wiinkpë käjpn es nˈawanëdëts ja oybyë ayuk diˈibë nyigajxypy ja Diosë kyutujkën, jaˈa ko päätyëts ja Dios të xykyexy” (Lukʉs 4:43). Tim jawyiin ojts tˈanëëmë ja yˈëxpëjkpëty ets tkäjpxwäˈkxtët ja oybyë ayuk mä ja nax käjpn diˈibaty wingon wëˈëmp. Per ok, ta tˈanmääy: “Es net miits xypyëjtäˈäktët ja tëyˈäjtën ëjtskyëjxm [...] [mä] tëgekyë naxwinyëdë” (Apostʉlʉty 1:8; Lukʉs 10:1).
Yˈijxpajtën ja tim jawyiimbë kristianëty. Ja Jesusë yˈëxpëjkpëty netyë ojts nyëjkxtë ëwäˈkx käjpxwäˈkxpë. Apostʉlʉty 5:42 jyënaˈany: “Es kyaj tmastuttë esë jäˈäy dyaˈëxpëkët, es tkäjxwäˈxtë ja oybyë ayuk ko Jesus jaˈa dëˈën ja Kristë. Dëˈën ttuundë bom bom mëj tsäjptëjk nyabotsoty es nandëˈën dyaˈëxpejky tëjkmdëjkm”. Niˈamukë ttuundë tyäˈädë tuunk, kyaj jeˈeyë niduˈuk nimajtsk. August Neander, diˈib yˈëxpëjkpëtseempy tijaty tuun jäjtë, jyënaˈany: “Celso, diˈib kyäjpxpatë kristianëty, ojts tnixiˈiky ttukxiˈiky ko ja diˈib ëwäˈkx käjpxwäˈkxtëp yëˈë diˈibë sapatë yaˈoˈoyëdëp, diˈibë lanë tyuunkˈäjttëp etsë poˈo, diˈib mëk tsuu mëk lokë ets nitii ëxpëjkënë tkamëdattë”. Jean Bernardi ojts tkujayë mä lyiibrë: “Niˈamukë kristianë, tsojkëp kyäjpxwäˈkxët oytyim määjëty, ets tmëtmaytyäˈägët oytyim pënëty, nëˈääy tuˈääy, mäjatyë nax käjpn, määyoty, ets mä jäˈäyë jyëën tyëjk. Duˈun nyëjkxtë mä oyë jäˈäy kyupëkëdë ets mä oy kyakupëkëdë. [...] Abëtsemy Nyaxwinyëdë” (Les premiers siècles de LˈÉglise [Ko tsyoneˈky tsyondakyë Tsäjptëjk]).
¿Pën tyam nanduˈun tyuundëp? David Watson, tuˈugë teety diˈib tuump mä relijyonk anglicana, jyënaˈany: “Kyaj tyamë jäˈäy tnekymyëjpëjtäˈäktë Dios mët ko tsäjptëgoty kyaj pën kyäjpxwäˈkxäˈäny ets tyukniˈˈixëyaˈany”. Etsë José Luis Pérez Guadalupe mä lyiibrë diˈib xyëˈäjtypy: ¿Por qué se van los católicos?, jap jyënaˈany ko Jyobaa tyestiigëty “të yajxon ttukniwitsëdë parë janääm jatsojk nyëjkxtë käjpxwäˈkxpë tëjkmdëjkm”, kyaj duˈun ttundë ebanjelikë, adbentistë o wiinkpë relijyonk.
Tuˈugë ëxpëjkpajn diˈib yajpëtseembyë Cato Institute ojts yajkujayë wiˈix jyënanyë Jonathan Turley: “Jeˈeyë tsyekyëty njënäˈänëm Jyobaa tyestiigëty parë jäˈäy wyinmayët ko yëˈë diˈib ëwäˈkx käjpxwäˈkxtëp ets jyäˈttë mä jäˈäy meerë jyantsy tyundë. Ko Jyobaa tyestiigëty nyëjkxtë tëjkmdëjkm, kyaj jeˈeyë duˈun ttundë parë nyimayëdët, yëˈë duˈun yaˈijxëdëp ja myëbëjkën” (Cato Supreme Court Review, 2001-2002).
[Rekuäädrë diˈib miimp mä pajina 9]
¿Të xypyekyë kuentë pën yajmaytyaktëp?
Të nˈijxëm mä kanäägë artikulo wiˈixë Biiblyë tmaytyaˈaky tijaty yajtukˈëxkäjp pënaty jyantsy pyanëjkxtëbë Kristë. ¿Mbäädë net mijts xyˈëxkapy? Ta mayë grupë etsë relijyonk diˈib wiˈixëm nyayxyëëmoˈoyëdë ets nyayajnaxëdë kristianë. Per jamyats wiˈixë Jesus tˈanmääy ja yˈëxpëjkpëty: “Kyaj nidëgekyëty diˈibëts xyˈanmääytyëp: Wintsën, Wintsën, tyëkëdët tsäjpotm, yëˈëyë tëkëdëp diˈibë tyuundëp ja tsyojkënë nDeetyëts” (Matewʉ 7:21). Pääty, parë ndukˈoyˈäjtëmë ja kunuˈkxën diˈib yajminaambyë Diosë yˈAnaˈamën, tsojkëp nˈëxkäjpëm pënaty tyuundëbë Diosë tsyojkën, o pënaty jyantsy pyanëjkxtëbë Kristë ets nyajpatëm mët yëˈëjëty. ¿Mˈaknijawëyaampy wiˈix yˈixˈatäˈänyë Diosë Kyutujkën ets ja kunuˈkxën diˈib yajminaampy? (Lukʉs 4:43.) Mmaytyäˈäk mëdë Jyobaa tyestiigë diˈib të mmoˈoyëtyë tyäˈädë rebistë.