Nijawë Diosë yˈAyuk
¿Ti tunan jatanëp ja xëë mä yajpayoˈoyäˈändë jäˈäy?
Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.
1. ¿Ti yˈandijpy ja xëë mä yajpayoˈoyäˈändë jäˈäy?
Extëm yaˈixy mä tyäˈädë dibujë, duˈun mayë jäˈäy wyinmaytyë ko yëˈë diˈib tunan jatanëp mä diˈibë Biiblyë tyijpy, ja xëë mä yajpayoˈoyäˈändë jäˈäy. Twinmaytyë ko miyonkˈamë anmë tyuˈukmukäˈändë Dios windum parë yajpayoˈoyaˈany tijaty të ttundë. Ets ko nääk yajmoˈoyäˈändë jukyˈäjtën jam tsäjpotm, ets nääk nyëjkxäˈändë mä ayoodakn. Perë Biiblyë kyaj duˈun tyukniˈˈixë, jyënaˈany ko ja xëë mä yajpayoˈoyäˈändë jäˈäy, jaa mä jyëjptëgoyaˈanyë axëkˈäjtën yä naxwiiny (Salmo 96:13). Dios yëˈë të ttuunkmoˈoyë Jesus extëmë Fes parë ttunët ja tëyˈäjtënë mä naxwinyëdë jäˈäy. (Käjpxë Isaías 11:1-5 etsë Apostʉlʉty 17:31.)
2. ¿Wiˈix yajtunäˈänyë tëyˈäjtënë ja xëë mä yajpayoˈoyäˈändë jäˈäy?
Adán, ja tim jawyiimbë yetyëjk, yëˈë myëbokytyuunë Jyobaa Dios. Ets mët yëˈëgyëjxmë pyoky, ta niˈamukë tyëëm yˈääts pyokytyundë, yˈayowdë ets yˈooktë (Romanʉs 5:12). Parë yˈoyëdë tyäˈädë jotmay, ta Jesus dyajjukypyëkäˈäny miyonkˈamë jäˈäy diˈib të yˈooktë. Mä Diˈibʉ Jatanʉp o Apocalipsis jyënaˈany ko ja tyunäˈäny jyatäˈänyëty mä Jesukristë yˈanaˈamäˈäny tuk mil jëmëjt. (Käjpxë Diˈibʉ Jatanʉp 20:4, 11, 12.)
Ja oˈkpë diˈibë nety të jyukypyëjktë yajpayoˈoyandëp, per kyaj extëm të jyukyˈattë mä kyaˈooktënëm, yëˈë yajpayoˈoyäämp wiˈixë nety tmëmëdowdë ja jembyë anaˈamën diˈibë Dios yakaampy extëm jyënaˈany mä Diˈibʉ Jatanʉp kapitulo 20 (Romanʉs 6:7). Apostëlë Pablo ojts tmaytyaˈaky ko jyukypyëkäˈändë “oyjyaˈay es nandëˈën diˈibë ijt kaˈoyjyaˈay” parë tnijawëdët pënën Dios. (Käjpxë Apostʉlʉty 24:15.)
3. ¿Tijaty ak yajtunäämp ja xëë mä yajpayoˈoyäˈändë jäˈäy?
Pënaty të yˈooktë ets kyaj të tˈixyˈattë Jyobaa ets nan kyaj të tmëduundë, jukypyëkandëp parë tmëdundët. Pën tyuundëp duˈun, të nety jyukypyëktë parë tpäättët ja “jikyˈäjtën winë xëë winë tiempë”. Per pënaty kyaj tmëmëdowäˈändë Dios, tyäˈädë jyukypyëkäˈändë parë yajtukumëdowdët. (Käjpxë Fwank 5:28, 29 etsë Isaías 26:10; 65:20.)
Ko jyëjpkëxët mä yajpayoˈoyäˈändë jäˈäy tuk mil jëmëjt, të netyë Jyobaa dyajjëmbity ja naxwinyëdë jäˈäy wäˈäts extëm ojts dyajkojy. ¡Jantsy tsuj ja kumäˈäyën diˈib yˈaxäjëyandëp pënaty mëdoodëp! (1 Korintʉ 15:24-28). Ta netë Dios tnasmatsëyaˈanyë Mëjkuˈu diˈibë nety të yˈity tsumy tuk mil jëmëjt, parë naxwinyëdë jäˈäy tˈakˈijxmatsäˈäny. Satanás nëjkxëbë jäˈäy ttukmastuˈudäˈänyë Jyobaa nuˈun tmëmadaˈaky, per pënaty myëmadaktëbë tyäˈädë jotmay, nëjkxëp jyukyˈattë winë xëë yä Naxwiiny. (Käjpxë Isaías 25:8 etsë Diˈibʉ Jatanʉp 20:7-9.)
4. ¿Diˈibë jatuˈugë xëë mä yajpayoˈoyäˈändë jäˈäy diˈib yajminaambyë kunuˈkxën?
Biiblyë myaytyakypy jatuˈugë xëë mä yajpayoˈoyäˈändë jäˈäy. Yëˈë diˈib tunan jatanëp mä tyäˈädë jukyˈäjtënë jyëjpkëxanë. Tyäˈädë xëë ajotkumonë jyäˈtäˈäny, duˈun extëm ja xëë mä myiiny ja Ayoˈonduu ko Noé jyukyˈajty, mä yˈoˈktääy ja axëkjäˈäy. Tim tsojk kyutëgoyaˈany “ja pekyjyaˈayëty”, o axëkjäˈäyëty, parë mbäädë naxwinyëdë jäˈäy jyukyˈattë “mä tëgekyë yajtunët diˈibë tëyˈäjtën”. (Käjpxë 2 Peedrʉ 3:6, 7, 13.)
Pën mˈaknijawëyaampy, ix mä pajina 213 axtë 215 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.
[Dibujë mä pajina 16]
Mä yajpayoˈoyë jäˈäy, yëˈë yaˈoˈoyë Gustave Doré (1832-1883)
[Yëˈë të dyakyë dibujë]
Diˈib yaˈoˈoyë Doré
[Dibujë mä pajina 16]
[Dibujë mä pajina 17]
[Dibujë mä pajina 17]