DIˈIB MIIMP MÄ NYIˈAK: ¿MBÄÄT NTSËˈKËM KO MYINYË KUTËGOˈOYËN?

Ko myinyë kutëgoˈoyën ¿ntsëˈkëm, ndukxondakëm, o axëëk xyajnayjäˈäwëm?

¿Wiˈix mnayjawëty ko xywyinmayë 21 äämbë disiembrë 2012 mä nety tyëgatsäˈänyë jukyˈäjtën abëtsemy nyaxwinyëdë extëm mayë jäˈäy të jyënäˈändë? Mbäät mnayjawëty jotkujk, axëëk o kyaj xytyimëjpëjtaˈaky. ¿Waˈandaa jatëgok kyaj të tyëyˈäjtëndëkë ko tnigäjpxtë myinyë kutëgoˈoyën?

¿Ets wiˈix mwinmay ko Biiblyë tmaytyaˈagyë kutëgoˈoyën? (Matewʉ 24:3.) Ta diˈib tsëˈkëdëp ko wyinmaytyë Naxwinyëdë tyoyaˈany. Ets ta diˈib tyukˈijt tyukxoondëp ko tˈixtë mumaty mä wiˈix atsëˈëk ajawë tyunäˈäny jyatäˈänyëtyë kutëgoˈoyën. Ets may të tsyipkaˈxnëdë, kyaj tˈokmëdowanëdë ko myinyë kutëgoˈoyën. Per ¿päätyëdaa duˈun nyayjawëdë mët ko jäˈäy duˈun tmaytyäˈäktë ets kyaj mët ko Biiblyë duˈun jyënaˈany?

Waˈan mëjˈixy mëjmëdoy xyjawët ko xynyijawët wiˈixë Biiblyë jyënaˈany. Jap xytyuknijäˈäwëm tiko mbäät nˈawijx njëjpˈijxëm ko myinyë kutëgoˈoyën, nan nyimaytyakypy ko mbäät axëëk nnayjäˈäwëm ko nwinmäˈäyëm ko nëgoo yˈokjajknë ja kutëgoˈoyën. Pääty, min nˈokˈijxëm taxk pëky wiˈixë Biiblyë tˈatsoojëmbity diˈibë jäˈäy nayajtëëwëdëp.

¿Waˈandaa tyoyaˈanyë Naxwinyëdë?

BIIBLYË TˈATSOOJËMBITY: “[Dios] të dyajkojˈyë naxwinyëdë mä ja lyugäärë täˈtspëkypyë; ni jeˈeyë kyayuˈkxäˈäny mä ja lyugäär axtë winë xëë winë tiempë” (SALMO 104:5).

Naxwinyëdë kyaj kyutëgoyaˈany, kyaj yajnoˈogäˈäny ets nitii kyayajwindëgoyaˈanyëty. Biiblyë jyënaˈany ko yëˈë diˈibë jäˈäy tyuktsëënëyandëp winë xëë winë tiempë. Salmo 37:29 jyënaˈany: “Pënaty jukyˈäjttëp tëyˈäjtën myëët tjaˈˈatäˈändë naxwinyëdë, ets ttuktsëënëyäˈändë xëmëkyëjxm” (Salmo 115:16; Isaías 45:18).

Ko Dios ojts dyajkojˈyë Naxwinyëdë, ta jyënany ko tukëˈëyë “jantsy oy”, ets tyam duˈunyëm wyinmay (Génesis 1:31). Dios kyaj dyajkutëgoyaˈanyë Naxwinyëdë, yëˈë yajkutëgoyaampy pënaty “yajmäˈttëp”, ets kyaj tnasˈixëyaˈany parë wyindëgooytyaˈayët (Diˈibʉ Jatanʉp [Apocalipsis] 11:18).

Per waˈan yëˈë xywyinmayë 2 Peedrʉ 3:7, mä jyënaˈany: “Perë tsäjp esë nax diˈibë jaa tyam, Dios të jyënaˈany ko yajtoyaampy”. ¿Ti kyaj yëˈë tˈandijy ko Naxwinyëdë tyoyaˈany? Näˈäty, ko Biiblyë tmaytyaˈagyë tsäjp, nax etsë jëën yajnikejpy. Extëm nˈokpëjtakëm, Génesis 11:1 jyënaˈany ko “tukëˈëyë ja naxwinyëdë jeˈeyë nety tuˈugë ää ayuk tkäjpxtë”. Ko jyënaˈany “naxwinyëdë”, yëˈë myaytyakypyë jäˈäy.

Ko 2 Peedrʉ 3:7 tmaytyaˈagyë tsäjp, nax etsë jëën, niwij nikajp. Ets mbäät njaygyujkëm ko ngäjpxëmë bersikulo 5 etsë 6 mä tmaytyaˈaky ko ja Ayoˈonduu myiiny mä Noé jyukyˈajty. Yëˈë jäˈäy kutëgooytyë, kyaj yëˈëjëty ja Naxwinyëdë. Ja “nax” diˈib kutëgooy, yëˈë ja axëkjäˈäy ets ja “tsäjp”, yëˈë ja jäˈäyëty diˈibë nety anaˈamdëp (Génesis 6:11). Diˈibë bersikulo 7 myaytyakypy, yëˈë mä kyutëgoyaˈany niˈamukë axëkjäˈäy mët ja yˈanaˈambëtëjk, duˈunxyëp extëm ko yajnoˈktäˈäy.

¿Ti tunan jatanëp ko myinëdë kutëgoˈoyën?

BIIBLYË TˈATSOOJËMBITY: “Dios yajkutëgoyaambyë naxwinyëdë es tëgekyë yˈaxëkwinmäˈänyëty. Per ja jäˈäyëty diˈibë kyuytyiimpy ja tsyojkënë Dios, jikyˈatëp winë xëë” (1 FWANK 2:17, Ja Oibyʉ Tʉiˈya̱jtʉn).

Ko jyënaˈany kyutëgoyaˈanyë “naxwinyëdë”, yëˈë yˈandijpy ko kyutëgoyaˈanyë jäˈäy diˈib kyaj ttuunë Diosë tsyojkën. Duˈun extëm tuˈugë doktoor dyajtsoˈogyë jäˈäy ko ttsujkpëtsëmyë tumoor diˈibë kanser myëdäjtypy, nanduˈunë Dios dyajkutëgoyaˈanyë axëkjäˈäy yä Naxwiiny parë oyjyaˈay jyukyˈattët agujk jotkujk (Salmo 37:9). Pääty, oy ko myinyë kutëgoˈoyën.

Diˈib mbäät xypyudëjkëm parë kyaj tëgatsy nwinmäˈäyëm ko myinyë kutëgoˈoyën, yëˈë ko mä näägë Biiblyë të yajkäjpxnaxy “mä jyëjptëgoyanë tyäˈädë jukyˈäjtën” (Mateo 24:3, Traducción del Nuevo Mundo [TNM]). Pääty, pënë jäˈäy etsë Naxwinyëdë duˈunyëm jyaˈˈatäˈäny ko nety të nyaxyë kutëgoˈoyën, mbäät nˈijtëm seguurë ko tsyondäˈägäˈänyë jembyë jukyˈäjtën yä Naxwiiny. Etsë Biiblyë myaytyakypy “jaˈa tsënaay jukyˈajtëny jaˈa mëtyiibë miimp këdaakpëny” (Lucas 18:30, Nuevo Testamento de Mazatlán [NTM]).

Jesus ja ojts ttijy ja tiempë diˈib miin këdakp “mä tëgekyë yˈoyët jemy”. Yëˈë yajjukyˈataambyë jäˈäy extëmë Dios tjatsejky (Matewʉ 19:28). Taanëmë net ndukˈoyˈatäˈänëmë tyäˈädë kunuˈkxën:

◼ Jantsy tsuj jyëmbitäˈänyë Naxwinyëdë mä niˈamukë jäˈäy nyayjawëyäˈänëdë seguurë ets agujk jotkujk (Isaías 35:1; Miqueas 4:4).

◼ Oybyë tuunk diˈib yajtukxondakp (Isaías 65:21-23).

◼ Yˈagëdäˈägäˈänyë jäˈäy diˈib pëjk ijxëdëp (Isaías 33:24).

◼ Yˈënäˈkëyäˈändë jäˈäy (Job 33:25).

◼ Jyukypyëkäˈändë oˈkpë (Fwank 5:28, 29).

Pën nduˈunëmë “Diosë tsyojkën”, kyaj tiko ntsëˈkëm ko myinyë kutëgoˈoyën, niˈigyë mbäät nˈawijx njëjpˈijxëm.

¿Jantsy wingon yˈijnë kutëgoˈoyën?

BIIBLYË TˈATSOOJËMBITY: “Ko xyˈixtët duˈun tyuny jyatyëty, nnijawëdë ko Diosë yˈAnaˈam Kyutujkën wingon yˈity” (LUCAS 21:31, TNM).

Profesoor Richard Kyle tkujäˈäyë mä lyiibrë: “Ko ajotkumonë tijaty tyëgatsy ets ko jäˈäy nyaynyibëdëˈëgëdë, ta niˈigyë tnaskäjpxëdë ko myinyë kutëgoˈoyën”. (The Last Days Are Here Again [Të jyëmbity mä xëë tiempë jyëjpkëxanë.]) Per niˈigyë tijaty yajnaskäjpxë ko kyaj yajnijawë tiko duˈun tyuny jyatyëty.

Per tijaty ojts yajnaskäjpxë mä Biiblyë, kyaj jeˈeyë ojts yajkujayë parë yajnimaytyäˈägët tiko tyuny jyatyëtyë axëkˈäjtën. Dios wyinmäˈänymyooy ja kyugajpxyëty parë tnimaytyäˈägët tijaty tunan jatanëp ko nety wyingoonë kutëgoˈoyën. Okˈix wiˈix të yajnaskäjpxë ets xyˈixët pën jaa yˈadëy o kyaj.

◼ Jyaˈˈatäˈänyë tsip, yuu, mëk ujx etsë päˈäm diˈib yaˈoˈkp (Matewʉ 24:7; Lukʉs 21:11).

◼ Myëjwindëkëyaˈanyë axëkˈäjtën (Matewʉ 24:12).

◼ Dyajwindëgoyäˈändë Naxwinyëdë (Diˈibʉ Jatanʉp 11:18).

◼ Këˈëmë jäˈäy nyaytsyokäˈänëdë, tˈookjawëyäˈändë meeny sentääbë, tˈëxtäˈäyäˈändë yëˈëyë xondakën ets kyaj tmëjˈixäˈändë Dios (2 Timotee 3:2, 4).

◼ Nyaywyäˈkxäˈänëdë familyë (2 Timotee 3:2, 3).

◼ Kyaj tmëbëkäˈändë tijaty yajnigëxëˈkypy ko wingoomp ja kutëgoˈoyën (Matewʉ 24:37-39).

◼ Yajkäjpxwäˈkxäˈäny abëtsemy nyaxwinyëdë ja oybyë ayuk diˈib nyimaytyakypyë Diosë yˈAnaˈam Kyutujkën (Matewʉ 24:14).

Jesus jyënany: “Ko xyˈixtët tëgekyë tyäˈädë”, yëˈë nety yajnigëxëˈëgaampy ko wingon yˈijnë ja kutëgoˈoyën (Matewʉ 24:33). Jyobaa tyestiigëty myëbëjktëp ko tyam ta duˈun tyuny jyatyëty ets pääty kyäjpxwäˈkxtë 236 paˈis.

¿Mbäät nwinmäˈäyëm ko ninäˈä kyaminäˈänyë kutëgoˈoyën ko kyajäˈty mä jyayaˈˈawixy?

BIIBLYË TˈATSOOJËMBITY: “Ko jäˈäy [jyënäˈändët]: Tyam sitëy agujk jotkujk ntsënäˈäyëm, kyaj ti amay jotmay, net tiˈin myiny mä yëˈëjëty ja kutëgoˈoyën, extëm dyajnaxtë ja pëjk adoˈonënë toxytyëjkëty ko ja yˈuˈunguˈunk ttimpäädanë, mä niwiˈixtsoo mbäät kyanitseˈeky” (1 TESALÓNIKɄ 5:3).

Biiblyë duˈun tˈijxkijpxyë jyäˈtäˈäny ja kutëgoˈoyën extëm ko tuˈugë toxytyëjk ttimpäädanë yˈuˈunk, ajotkumonë pyëjkëˈëgyë jyot ets kyaj mbäät tkugeˈeky. Mä ja tiempë jyëjpkëxanë, mbäät nˈijxkijpxyëm mët tuˈugë toxytyëjk diˈib uˈunkmëët, yëˈë pyëjknëbë kuentë ko maxuˈuˈunkˈatanëp ja yˈuˈunk. Ets oy kyamaxuˈunkˈatët ja xëë mä të yˈanëˈëmxëty ja doktoor, yëˈë ijtp seguurë ko pyäädanëp ja yˈuˈunk. Tyam, nan nbëjkëmë kuentë ko yëˈë ndukjukyˈäjtëm mä “xëë tiempo [...] kyëxaan tyëgoyaanëjëny”, oy kyaminët ja kutëgoˈoyën mä jäˈäy tjaˈˈawixtë (2 Timoteo 3:1, NTM).

Waˈan mnayajtëyëty: “Pën nigëxëˈkp yajxon, ¿tiko mayë jäˈäy kyaj tpëktë kuentë?”. Biiblyë nyaskäjpxë ko may kyaj tmëjpëjtäˈägäˈändë tijaty yajnigëxëˈkypy ko wyingoonë kutëgoˈoyën, oy yajxon jyakëxëˈëky. Kyaj tmëbëkäˈändë ko ja axëkˈäjtën diˈib tuun jäjtëp, yëˈë yajnigëxëˈkypy ko njukyˈäjtëm mä tiempë jyëjpkëxanë, niˈigyë tyukxiˈigäˈändë ets jyënäˈänäˈändë: “Yëˈë nˈaptëjkˈäjtëm të yˈoˈknëdë, per dëˈënyëm wyeˈemy tëgekyë nandëˈën extëmë naty ko yëˈë naxwinyëdë tsyondaky” (2 Peedrʉ 3:3, 4). Tyäˈädë yëˈë yˈandijpy ko mayë jäˈäy kyaj tmëjpëjtäˈägäˈändë, oy yajxon jyanigëxëˈëky ko yëˈë ndukjukyˈäjtëmë tiempë diˈib jëjpkëxanëp (Matewʉ 24:38, 39).

Mä tyäˈädë artikulo jeˈeyë tuˈuk pëky majtsk pëky të tmaytyaˈagyë Biiblyë diˈib xytyukˈijxëm ko wingoombë kutëgoˈoyën.a Pën mˈaknijawëyaampy niˈigyë, anëëmë Jyobaa tyestiigë parë myaˈëxpëkëdët namayˈäjtën. Mbäät mˈëxpëky mä mjëën mdëjk, wiink lugäär axtë mä telefënë. Kyaj mmeeny xyajtunët, yëˈëyë mxëë mdiempë, ets mëjwiin kajaa nëjkx xytyukˈoyˈaty. ▪

[Notë]

[Rekuäädrë diˈib mä pajina 6]

¿TË JYOBAA TYESTIIGËTY TNIGÄJPXTË NÄˈÄ MYINÄˈÄNYË KUTËGOˈOYËN ETS KYAJ TË MYINY?

Jyobaa tyestiigëty të tjaˈˈawixtë näˈä myinäˈänyë kutëgoˈoyën, per kyaj të myiny. Duˈun extëmë Jesusë yˈëxpëjkpëty diˈib mä primer siiglë, të tjaˈˈawixtë näˈä myinäˈänyë kutëgoˈoyën, per kyajnëm tpääty ja oorë näˈä Dios të ttuknibëjtäägë (Lukʉs 19:11; Apostʉlʉty 1:6; 2 Tesalónikʉ 2:1, 2). Per oy të duˈun jyaty, nanduˈun njënäˈänëm extëmë Alexander H. Macmillan, diˈib jantsy jeky Testiigëˈäjt, yëˈë jyënany: “Yëˈëjëts xytyukniˈˈijxë ko tsojkëp nˈëxkäjpëmë tëgoˈoyën ets nˈakˈëxpëkëdëts niˈigyë Diosë yˈAyuk parëts mas njaygyukët”.

Per ¿tiko Jyobaa tyestiigëty duˈunyëm jyënäˈändë ko wingoomp ja kutëgoˈoyën? Yëˈko nyijäˈäwëdëp ko jëjpˈam ets tmëmëdowdët extëmë Jesus jyënany: “Wëˈëmdë miitsëty wijˈyëty es mnayjëjpˈixëdëp”. Ko tkakäjpxwäˈkxtët, ta nëjkxë Jesus pyäädëdë extëm myäˈädë ets kyaj nëjkx kyupëkëdë (Markʉs 13:33, 36).

Nˈokpëjtakëm tuˈugë ijxpajtën. Mä näägë lugäär, ta jäˈäy diˈib kyuentˈäjtypyë yukˈit ets ko muum tˈixyë jok pyëdëˈëky, ta ttukˈawäˈänëtyaˈay ja nax käjpn parë pyëtsëmdët, per mbäät kyaj yëˈëjëty tuˈugë toyë. Per ko nyayaˈitëdët jotjuuky ets tnigäjpxët, mbäät mayë jäˈäy nyitsoˈoky.

Nanduˈun të jyattë Jyobaa tyestiigëty të tjaˈˈawixtë näˈä myinäˈänyë kutëgoˈoyën ets kyaj myiiny. Per oy të kyaminy, yëˈë myëmëdoodëbë Jesus parë jäˈäy nyitsoˈoktët ets kyaj tmëjpëjtäˈäktë oyë jäˈäy kyäjpxpäädëdët. Jesus ojts tniˈanaˈamë ets ngäjpxwäˈkxëm, tyäˈädë yëˈë yˈandijpy ko tsojkëbë jäˈäy ndukˈawäˈänëm ko ta wyingoonë kutëgoˈoyën (Apostʉlʉty 10:42).

Jyobaa tyestiigëty ijttëp seguurë ko myinäˈänyë kutëgoˈoyën, päätyë net kyäjpxwäˈkxtë ets kyaj yëˈëyë tmëmay tmëdäjtë näˈä myinäˈäny. Ets oy nwinmäˈäyëm ko kyaj tsojk jyaˈty ja kutëgoˈoyën, nˈawijx njëjpˈijxëm, pes extëm jyënaˈanyë Habacuc 2:3: “Seguurë ko tyunäˈäny jyatäˈänyëty. Tim tsojk jyäˈtäˈäny”.

[Dibujë diˈib mä pajina 4]

[Dibujë diˈib mä pajina 8]