Ko tijaty yˈayoˈonbëjtaˈaky: ¿yëˈë xytyukˈijxëm ko Dios axëkjäˈäy?

NÄÄGË JÄˈÄY JYËNÄˈÄNDË: “Dios, yëˈë diˈib tuump ko tijaty yˈayoˈonbëjtaˈaky, yëˈko yëˈë diˈib anaˈamp yä naxwiiny, pääty yˈaxëkjäˈäyëty”.

BIIBLYË JYËNAˈANY: “Niˈamukë naxwinyëdë jäˈäy yˈity mä ja axëkjäˈäy dyajtunyë myëkˈäjtën” (1 Juan 5:19, Traducción del Nuevo Mundo [TNM]). Biiblyë tnimaytyaˈaky ko tyäˈädë “axëkjäˈäy”, yëˈë Satanás (Matewʉ 13:19; Markʉs 4:15). ¿Tëyˈäjtënëdaa? Okwinmayë tyäˈädë: pënë Satanás myëdäjtypyë mëkˈäjtën mä naxwinyëdë jäˈäy, pes mbäädë jäˈäy dyajjëmbity extëm yëˈë, yˈatsokët, këˈëm tijaty nyaytyukmëtsokëdët ets kyaj tˈixtët tijaty extëm yˈixëty. ¿Ti kyaj tyäˈädë xypyudëjkëm parë nimaytyakëm tiko jäˈäy dyajwindëgoytyë naxwinyëdë? Mayë ëxpëkyjyaˈay jyënäˈändë ko mbäädë net tijaty yˈayoˈonbëjtaˈaky ko jäˈäy dyajwindëgoytyë naxwinyëdë, mbäät këˈëm dyajmëjwindäˈäktë ets mbäät niˈigyë jäˈäy yˈayoˈonbääty.

Per ¿tiko Dios tnaˈixy etsë Satanás tmëdatëdë mëkˈäjtën? Parë nˈatsoˈojëmbijtëm, min nˈokˈijxëm ti tuun jäjtë ko tsyondakyë jukyˈäjtën. Adán mëdë Eva kyaj tkupëjktë etsë Dios yˈanaˈamëdët, ets desde mä tadë tiempë, ak duˈunë naxwinyëdë jäˈäy yˈadëˈëtstë. Päätyë net niˈamukë yˈanaˈamëdë Satanás, ja Diosë myëtsip. Jesus ojts ttijˈyë Mëjkuˈu, “ja diˈib yˈaneˈembyë naxwinyëdë jäˈäy” (Juan 14:30, TNM). Per kyaj yˈanaˈamäˈäny winë xëë winë tiempë.

Jyobaa,a mëk tjawë ko tˈixyë ayoˈon diˈibë Satanás yajjaˈäjtypy. Biiblyë myaytyakypy wiˈixë Jyobaa nyayjäˈäwë ko ja israelitëty tpattë amay jotmay, duˈun jyënaˈany: “Nuˈun ja tiempë nyajxy mä yˈayoˈonbat jyotmaybyattë yëˈëjëty, nanduˈun yëˈë tmëmääy tmëdäjy” (Isaías 63:9). Mët ko jyantsy pyaˈˈayoy, të ttuknibëjtäägë dyajkutëgoyaˈanyë Satanás diˈib tyam mëk axëëk anaˈamp, ets tim tsojk duˈun ttunäˈäny. Yëˈë të tpëjtaˈagyë yˈUˈunk, Jesukristë, parë tyunët Rey winë xëë winë tiempë.

TI YˈANDIJPY PARË ËTSÄJTËM: Satanás kyaj tkuwäˈänyë naxwinyëdë jäˈäy ko tijaty yˈayoˈonbëjtaˈaky, perë Jesus kyuwäˈänaampy. Ko yˈijty yä Naxwiiny ojts tkuwäˈäny ja yˈëxpëjkpëty ko myiinyë mëk poj. Biiblyë jyënaˈany: “Net ja Jesus pyëdeˈky es tˈooy ja poj, es tˈanmääy ja mejny: ¡Amonyë! ¡Tëmijtkë! Ta ja poj myoˈty, es tëgekyë oj wyëˈëmëtyaˈay amonyë es tëmijtkë”. Ta ja yˈëxpëjkpëty myony yˈijx myonyjäˈäwëdë ets nyayˈanmääyëdë nixim niyam: “¿Pënë dëˈënë tyäˈädë, ko axtë yëˈë poj esë mejny mëmëdoojëp?” (Markʉs 4:37-41). Tyäˈädë yëˈë xytyukˈijxëm ko Jesus kyuwäˈänaampy niˈamukë jäˈäy ko nety yˈaneˈemy (Daniel 7:13, 14).

[Notë]