DIˈIB MIIMP MÄ NYIˈAK: ¿TI MYAYTYAKYPYË BIIBLYË?

¿Tiko mbäät xynyijawë tijatyë Biiblyë myaytyakypy?

Abëtsemy nyaxwinyëdë jäˈäy tˈixyˈatyë Biiblyë. ¿Tiko? Yëˈko nyimaytyakypyë jäˈäy diˈib jantsy jyukyˈäjttë ets diˈib jäjt këbajttë extëm näˈäty njäjtëm, nan myaytyakypy wiˈix yˈijttë mëdë jyiiky myëguˈuk ets mëdë Dios. Kajaa diˈib xytyukniˈˈijxëm. Wingëjxy myaytyaˈaky ets yajxon yajjaygyukë, pääty mbäät yajkäjpxnaxy kanäk mëgoˈpx ayuk parë jäˈäy tjaygyukëdët oy mä tsyëënëdët ets oy ti tiempë jyukyˈattët. Xëmë pyudëkë kyäjpxwijën.

Per diˈib mas jëjpˈam, yëˈë ko Biiblyë yëˈë Dios jyaˈäjtypy. Nyimaytyakypy ti txëˈaty, wiˈix jyaˈayˈaty ets ti tyuknibëjtakë ko ojts dyajkojˈyë Naxwinyëdë etsë jäˈäy. Nan nyimaytyakypy wiˈixë Satanás tnibëdëˈëgyë Dios ets wiˈixë tyäˈädë tsip oy kyugëxëyaˈany. Oy ko ngäjpxëm extëm mbäät niˈigyë nnijäˈäwëm, net nmëdäjtëmë mëbëjkën parë nˈawijx njëjpˈijxëm ja kunuˈkxën.

Diˈibë Biiblyë xytyuknijäˈäwëm kyaj yajmaytyaˈaky mä wiinkpë liibrë, extëm:

▪ ¿Mä ntsoˈonëm ets tiko nˈayoˈojëm?

▪ ¿Ti Dios tyuun parë dyaˈˈawäˈätspëtsëëmyë naxwinyëdë jäˈäy?

▪ ¿Ti Jesus tyuun ëtsäjtëmgyëjxm?

▪ Mä tiempë myiny kyëdaˈaky, ¿wiˈix jyatäˈänyë Naxwinyëdë etsë jäˈäy?

Käjpxë artikulo diˈib ak miimp parë xynyijawët tijatyë Biiblyë myaytyakypy.

[Dibujë diˈib mä pajina 3]

[Rekuäädrë diˈib mä pajina 3]

WIˈIX YˈIXËTYË BIIBLYË?

Diˈib jëjpˈam myaytyakypy: Diosë Kyutujkën dyajminäˈänyë jotkujkˈäjtën ets ttunäˈänyë tëyˈäjtën yä Naxwiiny

Diˈib myëmiimpy: Ja tmëminy 39 liibruˈunk diˈib yajjääy ebreo (tuk pëky majtsk pëky yajjääy arameo) ets 27 diˈib yajjääy grieegë

Pënaty jyaaytyë: Ja tjääytyë 40 yetyëjk, ja tiempë nyajxy parë yajjääytyaay 1,600 jëmëjt, yajjääytsyoˈony 1513 mä kyajnëm myinyë Jesus ets yajjääytyaay mä jëmëjt 98 mä Jesus të myiny

Kanäk ayuk: Të yajkäjpxnaxy naxy 2,500 ayuk, kaˈpxy o jeˈeyë tuk pëky