YAJTËˈËWËN DIˈIB YAˈˈATSOOJËMBIJTP MÄ BIIBLYË

¿Tiko yˈoyëty nuˈkxtakëm?

Dios tsyejpy ets xëmë nmëgäjpxëm ets kyaj njëjptsëˈk njëjpjäˈäwëm ko ndukmëtmaytyakëm tijaty xyjotmaytyuˈunëm (Lukʉs 18:1-7). Yëˈë myëdooˈijtypy wiˈix nˈanmäˈäyëm mët ko mëj xyajnäjxëm. Jantsy oyjyaˈayë nDeetyˈäjtëmë tsäjpotmëdë, pääty xyˈanmäˈäyëm ets nmëtmaytyakëm. ¿Mtsojkënyëˈajtypy xymyëtmaytyäˈägäˈäny? (Käjpxë Filipʉs 4:6.)

Ko Dios nmënuˈkxtakëm kyaj yëˈëyëty parë nˈamdoˈojëmë naybyudëkë, nan yëˈë parë nmëwingoˈonëm (Salmo 8:3, 4). Koogoo ndukmëtmaytyakëm wiˈix nnayjäˈäwëm, ta niˈigyë mëët nnaymyaaybyëjkëm. (Käjpxë Santya̱ˈa̱gʉ 4:8.)

¿Wiˈix mbäät nnuˈkxtakëm?

Dios kyaj ttseky ets agëbajky njäjtëm wiˈix nmënuˈkxtakëm ets yëˈëyë nikäjpxëmbijtëm, nan kyaj tnigajpxy wiˈix mbäät naybyëjtakëm. Diˈib tsyejpy, yëˈë ets nmënuˈkxtakëm amumduˈukjot (Matewʉ 6:7). Extëm nˈokpëjtakëm, Ana diˈib jukyˈäjt ja tiempë mä israelitëty jyukyˈäjttë, ojts nyuˈkxtaˈaky mët ko tpatyë amay jotmay mä fyamilyë. Ets ok, ko nyajxy ja yˈamay jyotmay, ta Dios tmënuˈkxtaky parë tmooyë dyoskujuyëm. (Käjpxë 1 Samuel 1:10, 12, 13, 26, 27 etsë 2:1.)

¡Jantsy oy nnayjäˈäwëm ko mbäädë Dios ndukmëtmaytyakëmë amay jotmay! Nan mbäät nmëjkugäjpxëm ets nmoˈoyëmë dyoskujuyëm mët ko tijaty xytyukmëduˈunëm. Pääty nˈokmënuˈkxtakëm xëmë. (Käjpxë Salmo 145:14-16.)

Pën mˈaknijawëyaampy, ixë kapitulo 17 mä tyäˈädë liibrë ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty

Nan mbäät xyajpëtsëmy mä www.jw.org/mco