¿Tiko mbäät xynyijawë Diosë yˈAnaˈam Kyutujkën?

Miyonkˈamë jäˈäy tˈawixtë etsë Diosë yˈAnaˈam Kyutujkënë jyotkujkmoˈoyëdët. Pääty tpanëjkxtë extëmë Jesus tˈanmääy ja yˈëxpëjkpëty ets duˈun nyuˈkxtäˈäktët: “Yajminë mˈAnaˈamën. Waˈan dyajtuny ja mtsojkën, duˈun extëm jam tsäjpotm nanduˈun yä Naxwiiny” (Mateo 6:10, Traducción del Nuevo Mundo).

Per oy mayë jäˈäy tjanijawëyäˈändë Diosë yˈAnaˈam Kyutujkën, mayë relijyonk kyaj tmëjpëjtäˈäktë. Tuˈugë jäˈäy diˈib tijaty yˈëxpëjkpëtsëëmpy, H. G. Wells, yajmonyˈijx yajmonyjäˈäwë tiko Jesus tmëjpëjtaky “diˈib tyij Tsäjpotmëdë Kyutujkën”. Per mä mayë tsäjptëjk kyaj nëgoo yajnimaytyaˈagyë tyäˈädë Kutujkën ets nan kyaj nëgoo pën yajtukniˈˈixë.

Per ëëtsëty, Jyobaa tyestiigëty xëmëts nimaytyäˈäktë Diosë yˈAnaˈam Kyutujkën. Extëm nˈokpëjtakëm, tyäˈädë rebistë diˈib mgajpxypy mayë jäˈäy tˈixyˈattë, pes ja pyëtsëmy 220 ayuk ets yëˈë diˈib niˈigyë wäˈkxp abëtsemy nyaxwinyëdë, pes ja pyëtsëmy naa 46 miyongën, tuˈuk tuˈugë numero. ¿Ets ti diˈib xëmë myaytyakypy? Okˈix wiˈix txëˈatyë rebistë: Diˈib Xytyukˈawäˈänëm. Yëˈë nyigajpxypyë Jyobaa yˈAnaˈamën.a

¿Tikots niˈigyë ndundë mëjää parëts nimaytyäˈäktë Diosë yˈAnaˈam Kyutujkën? Yëˈko Biiblyë yëˈë diˈib xëmë myaytyakypy. Ets nan ijttëbëts seguurë ko Diosë yˈAnaˈam Kyutujkën, yëˈëyë ja gobiernë diˈib mbäät dyajjëjptëgoy tukëˈëyë amay jotmay diˈib myëdäjtypyë naxwinyëdë jäˈäy.

Nduundëbëtsë mëjää parëts nbanëjkxtë Jesusë yˈijxpajtën. Pes yëˈë Diosë yˈAnaˈam Kyutujkën diˈib mas jëjpˈam pyëjtak, ets yëˈë diˈib mas myaytyak ko ojts kyäjpxwaˈkxy (Lukʉs 4:43). ¿Tiko jëjpˈam tpëjtaky? ¿Ti mbäädë Diosë yˈAnaˈam Kyutujkën mdukmëdunyëty? Käjpxë artikulo diˈib aknëjkxp parë xynyijawët wiˈixë Biiblyë tˈatsoojëmbity.