¿MNIJÄˈÄWËBË NETY?

¿Wiˈix ijty tëëyëp kyojˈyë nekyxyaatsy ets wiˈix tyuny?

Mä Evangelio diˈib jyaayë Lucas, jyënaˈany ko Jesus ojts txäˈtstëy ja nekyxyaatsy diˈib jyaayë Isaías, ta ojts tkajpxy ets ta jatëgok tˈaxäˈtsmujky. Apostëlë Pablo nan nyigajxë ja nyekyxyaatsyë abityˈambë parë ja Timoteo tmëjäˈtët (Lukʉs 4:16-20; 2 Timotee 4:13).

¿Wiˈix ijty kyojy ja nekyxyaatsy? Tukpedasaty ja poˈo dyajtuˈukmuktë, duˈun ja pergamino o papiro axtë ko dyajjäˈttë tukwijtsëˈëky. Ets ta net tkëxpittë mä tuˈugë kepy ets tuk pëkyaty tjäˈäytyë jodotytsyoo axtë ko dyajwindujktäˈäytyë ja nekyxyaatsy. Pën jantsy yeny ja pergamino, ta dyajtundë majtskë kepy, ets ja diˈib kyajpxy tukˈaduˈumgëˈë tˈaxäˈtstuˈuty ets tukˈaduˈumgëˈë tˈaxäätsy axtë ko tpääty ja tekstë diˈib yˈëxtaapy.

Tuˈugë diksionaaryë jyënaˈany: “Tuˈugë nekyxyaatsy mbäät ijty yenyˈaty axtë naa mäjk metrën extëmxyëp tuˈugë liibrë ets kyaj nëgoo lugäär dyaˈˈaduky ko yaˈˈaxäätsy” (The Anchor Bible Dictionary). Extëm ja Evangelio diˈib jyaayë Lucas, ja yajpawinmay yenyˈajty naa taxtujk metrë jakujkmën. Näˈäty, yajpagaˈp ijty ja nekyxyaatsy, anikëjxytsyoo ets abatkëˈëytsyoo, ets dyajtëˈkxëdë mët tuˈugë tsää ets nan yˈujktëp.

¿Pënaty ijty “nyigëbäjkˈäjttëp ja saserdotëty” diˈib yajmaytyakp mä Escrituras Griegas Cristianas?

Desde ko yajpëjtakyë saserdotëty jam Israel, ojts yajniˈanaˈamë ets jeˈeyë jyamˈatët tuˈugë saserdotë wintsën diˈib duˈun tunëp axtë ko yˈoogët (Números 35:25). Aarón yëˈë diˈib tim jawyiin tuun saserdotë wintsën ets duˈun tyuundë niˈuˈunk niˈënäˈk, ja uˈunkteety yëˈë ijty tyukmëwëˈëmëp ja yˈuˈungë kaˈaxkopkpë (Éxodo 29:9). Nimay ja yˈuˈunk yˈokë Aarón diˈib yetyëjk tyuundë saserdotë, per jeˈeyë niduˈuk nimajtsk diˈib tuundë saserdotë wintsën.

Ko ja israelitëty ojts yˈanaˈamëdë wiink nax wiink käjpn, ta ja anaˈambëtëjk diˈib kyaj yˈisraelitëty dyajtëgäjtstë ja saserdotë wintsën näˈä ttim tsojktë. Per waˈan twinˈijxtë ja saserdotë wintsën mä ja tyëëm yˈäätsë Aarón, mä ja familyë diˈibë nety mëj ijttëp. Per ¿pënën yajtijp ja diˈib “nyigëbäjkˈäjttëp ja saserdotëty”? Waˈan yëˈëjëty ja diˈibë nety mëj ijttëp mä ja saserdotëty. Nan waˈan yëˈëjëty ja diˈib nyigëbäjkˈäjttëp ja 24 grupë, diˈibë nety tsoˈondëp mä saserdotë wintsënë fyamilyë ets mä saserdotë wintsënëty, diˈibë nety të tmastuˈuttë tyuunk extëmë Anás (1 Crónicas 24:1-19; Mateo 2:4, Traducción del Nuevo Mundo, [TNM]; Marcos 8:31, TNM; Hechos 4:6, TNM).