¡Kyajtsë nety nˈoogäˈäny!

WIˈIXËTS NˈYEˈKY NBEJTY

Japëts nmaxuˈunkˈäjty Paddington, tuˈugë lugäär mëdiˈibë Londres (Inglaterra). Yëˈëyëtsë nety mëdë ndääk ntsëënë ets nidëgëëgëts ntsëˈë. Ja ndeetyëts näˈä ganäˈäty ijty jyaˈty mët ko jeˈeyë myëˈuuky.

Kots nmutskˈäjty, xytyukniˈˈijxëtsë ndääk etsëtsë Dios nmënuˈkxtäˈägët kots nmanaxanët. Tamëtsë nety nanduˈun tuˈugë nBiiblyë mëdiˈibë jeˈeyë myëmiimbyë Salmos ets këˈëmëts ijty ja ëy nmaˈkxy parëts nˈëy. Tëgok ojtsëts ngajpxy mä tuˈugë liibrë mëdiˈibëts nëgoo ojts xyˈokˈyajmääy xyˈokˈyajtäjnë, duˈun jap jyënany tuk pëky: “Jäˈtäämbë tiempë mä kyaj mnekykyuxëënyëyaˈany”. Kyajts nmääy kots duˈun ojts ngajpxy, jeˈeyëts nwinmääy tits xytyukmiimp xytyukkëdakp. Tats nnayajtëëwë: “Yëˈëyëdaa yäˈädë jukyˈäjtënëˈäjtp? ¿Tits yä nduumpy?”. ¡Kyajtsë nety nˈoogäˈäny!

Njantsy nyijawëyanëts wiˈixë jäˈäy tyun kyäjpxtë mëdë kaˈoybyëtëjk. Njamëtmaytyäˈäganëtsë oˈkpë, päätyëts ijty nëjkxtë mëdëtsë nmëˈˈëskuelëˈënäˈk kampyoon. Nˈijxtëts nanduˈunë pelikula mëdiˈibë jantsy atsëˈëk jantsy ajäˈäwëp. Xyˈatsëˈkëdëts, per njantsy yˈoyˈijxtëts.

Kotsë njëmëjt 10, axëëgëtsë nety njukyˈäjnë. Tëjkëts juˈkpë ets tats ojts xyˈadëjkënë. Ok, tats njuˈktsondakyë mariwanë. Ets kotsë njëmëjt 11, tats ndëjkë ukpë, naa tëgatsyëty njäˈäwë, per jantsy oyëts ijty xyajnayjyawëty kots nmuktëgoyëty. Njantsy tsyojkënyëˈäjtëtsë ëy etsë etsy, pääty nëjkxpëts ijty mäjatyë xëëw tyunyëty ets mä diskotekë. Kootsëts ijty ngeˈeky mätsë ndëjk ets ayuˈutsyëts ndëkë kots njäjnë monyëm. Jakumbom, kyajts ijty nëjkxy eskuelë mët ko jantsy anuˈkxëbëts ets tsubäˈämduunëbëts. Ets kots ijty nëjkxy, duˈunyëmëts njantsy yˈuuky.

Ja jëmëjt mätsë nety ja nˈeskuelë nyajkäˈpxnë, kyajts oy ja ngalifikasion nekyjyuˈty. Ja ndäägëts kyaj nety tnijawë wiˈixëts ja njukyˈäjtënë nyajnëjkxy, pääty ko tnijäˈäwë, jantsy axëëk ojts nyayjyawëty ets tats xytyukjotˈambëjky. Tats ojts nayˈoojëdë, ets tats ojts ntsoˈonë mätsë ndëjk. Yëˈëts ojts nbanëjkxnë Tony mëdiˈibëtsë nety noobyëˈajtypy. Yëˈë maˈtspë nety, tyoˈkypyë droogë ets jantsy awäˈän. Ok, tats ojts nwëˈëmy uˈunkmëët, jeˈeyëtsë netyë njëmëjt 16 kots nbatyë nˈuˈunk.

WIˈIXË BIIBLYË DYAJTËGÄJTSYËTSË NJUKYˈÄJTËN

Japëtsë nety nˈity mä tuˈugë albergë mä yˈittë toxytyëjk mëdiˈibë naytyuˈukˈuˈunkpattëp kots nˈixyˈajtyë Jyobaa tyestiigëty. Nimajtsk ijtyë Testiigë myindë parë tkuˈixëdë ja toxytyëjkëty mëdiˈibë jap tsënääytyëp. Tëgok, tats ojts nmëdoowˈity parëts ndukˈixäˈändë ko jeˈeyë wyinˈëëndë. Per ja Testiigëty tsuj yajxonëts ojts xyˈatsowdë kots tijaty nyajtëëy ets yëˈë yajtuundë Biiblyë. Njantsy yˈoyˈijxëts ko jyaˈayˈäjttë ajëëky amëguˈuk, päätyëts ngupëjky nˈëxpëkäˈänyë Biiblyë.

Tats nnijäˈäwë mä Biiblyë mëdiˈibë tyimˈyajtëgäjtsëtsë njukyˈäjtën. Kots nmutskˈäjty, tsëˈkëbëtsë nety nˈoogët, per tats nnijäˈäwë wiˈixë Jesus jyënany ko jukypyëkandëbë oˈkpë (Fwank 5:​28, 29). Nanduˈunëts nnijäˈäwë ko Dios xymyëmääy xymyëdäjpëts (1 Peedrʉ 5:⁠7). Ja ääw ayuk mëdiˈibë yajpatp mä Jeremías 29:11 ojtsëts xytyimˈajäˈt xytyimjotjäˈtë, mä jyënaˈany: “Wäˈätsëts nnijawë tijatyëts miitsëty ndukmëtsojktëp, duˈun jyënaˈanyë Jyobaa. Ndukmëtsojkypy mˈitët agujk jotkujk ets kyaj mˈamaybyäät mjotmaybyäädët, ndukmëtsojkypyë oyˈäjtënë mä tiempë myiny kyëdaˈaky”. Tats nwinmääy ko mbäädëts njantsy jyukyˈaty mä ja tsujpë it lugäär xëmëkyëjxm (Salmo 37:29).

Jyobaa tyestiigëty jantsy oyëts xyajnayjyäˈäwëdë, pes kots tim jawyiin nˈojtsy mä tyuˈukmuktë, tsuj yajxonëts ojts xyˈagëˈë xyˈaxäjëdë, ajëëky amëguˈuk jyaˈayˈäjttë (Fwank 13:​34, 35). ¡Kyaj nety duˈunë jäˈäy jyaˈayˈattë mätsë nety të nˈokˈyeˈebyë tsäjptëgoty! Ja Jyobaa tyestiigëty kyaj tˈijxtë wiˈixëtsë nety të njukyˈaty, niˈigyë dyajtuundë xyëëw tiempë, xytyukˈijxtëts ko xytsyojktëbëts ets xypyudëjkëdëts. Duˈunëts njäˈäwë extëmëts njiiky nmëguˈugën.

Kots nˈëxpëjkyë Biiblyë, tats njaygyujkë ko tsojkëbëts ja njukyˈäjtënë nyajtëgatsët ets nmëmëdowëdëtsë Diosë yˈanaˈamën. Nëgoots ojts tsyiptakxënë nmastuˈudët ja mariwanë. Nbëjkëtsë kuentë ko ja ëy yaˈaxy mëdiˈibëts nmëdoopy, xytyukˈatsojkpëtsë nety parëts njuˈugëdë mariwanë, päätyëts nyajtëgäjtsy ja ëy yaˈaxy mëdiˈibëts nmëdoowˈijtypy. Kyajts ojts nˈoknëjkxnë mä xëëw ets mä diskotekë mët ko mbäädëtsë nety jatëgok jap niwäˈägë ja nëë. Nˈëxtääyëtsë nmëtnaymyaayëbë mëdiˈibëts mbäät xypyudëkë (Proverbios 13:20).

Tony tamë nety nanduˈun yˈëxpëky mëdë Jyobaa tyestiigëty. Ko yaˈˈatsoowëmbijtääy mëdë Biiblyë tijaty nayajtëëwëp, ta tmëbëjky ko yëˈë nety yajtukniˈˈijxëp ja tëyˈäjtën. Tony yajtëgäjts ja jukyˈäjtënë: myastut ja myëtnaymyaayëbë mëdiˈibë jantsy axëkjäˈäyëty, kyaj ojts yˈokmaˈtsnë ets kyaj nanduˈun ojts tˈokjuˈknë mariwanë. Nˈijxtëts nanduˈun ko parëts mbäät nmëdundë Jyobaa extëm tkupëky, tsojkëbëtsë nety nbëktët etsëts mbäät nyajˈyaak nyajpattë ja nˈuˈunk tsuj yajxon. Päätyëts nbëjktë mä jëmëjt 1982.

Njamyejtsypyëts ko nˈëxtääyëts mä rebistë La Atalaya etsë ¡Despertad!a jäˈäyë yˈeksperiensyë mëdiˈibë nanduˈun yajtëgatstë ja jyukyˈäjtën. Kots nnijäˈäwë wiˈix dyajtëgatstë ja jyukyˈäjtën; xymyëjääwmooyëts parëts ëjts nanduˈun ndunët. Xëmëts nˈamdooyë Jyobaa etsëts xymyëmaˈkxtukët. Jats mëdë Tony nëbejty julië poˈo mä jëmëjt 1982.

TI KUNUˈKXËNËTS TË NˈAXÄJË

Kyajts wiˈix të njaty të ngëbety kots të nmëwingonyë Jyobaa. Ets tëts nˈixtë mëdë Tony ko Jyobaa xëmëts të xypyudëkëdë mäts meerë nyajnaxtë amay jotmay. Kots nbäättë amay jotmay, yëˈë mëdiˈibëts ndukˈijxpajttëp ets tëts nbëktë kuentë ko xëmëts xyˈijxˈit xykyuentëˈattë (Salmo 55:22).

Agujk jotkujkëts nnayjyawëdë kots të nbudëkëdë nnëëx etsëtsë nmäänk parë tmëwingondëdë Jyobaa. Jantsy jotkujkëts nanduˈun nnayjyawëdë kots ja nˈokˈënäˈk tam nanduˈun tˈixyˈattë mas niˈigyë Jyobaa.

Kyajts tyam nekymyëmay nekymyëdäjy tits xytyukmiimp xytyukkëdakp o ja oˈk tëgoˈoyën. Mëdë Tony, jamëts ja nxëëw ndiempë nyajtundë parëts nguˈixëdë sëmään sëmään mäjaty tyuˈukmujktë Jyobaa tyestiigëty etsëts nmëjääwmoˈoytyë nmëguˈuktëjk. Nëjkxtëbëts mëët käjpxwäˈkxpë parëts ndukniˈˈixëdë jäˈäy ko pën pyëjktaktëbë mëbëjkën mä Jesus, mbäät nanduˈun jyukyˈattë xëmëkyëjxm.