Kyajtsë nety nmëbëkyë Dios

WIˈIXËTS NˈYEˈKY NBEJTY

Nmaxuˈunkˈäjtyëts mä tuˈugë käjpn mëdiˈibë wëˈëmp Sajonia, mä ja paˈis mëdiˈibë nety yajtijp República Democrática Alemana (RDA). Ndääk ndeetyëts tsuj yajxonëts xyajˈyaˈk xyajpajttë, xytsyojktëts ets xymyooytyëts ja ëwij käjpxwijën wiˈixëts mbäät oyë njukyˈäjtën nyajnëjkxtë. Kom ja gobiernë mëdiˈibë nety anaˈamp mä República Democrática, yëˈë ja partiidë comunistë, pääty may ja jäˈäy mäts ntsëënë kyaj nety tmëjpëjktäˈäktë ja relijyonk. Ëjts kyajtsë nety nmëbëkyë Dios. Majtsk pëky ja winmäˈäny mëdiˈibëts nmëyaˈk nmëbajtë: kojëts kyaj nmëbëkyë Dios ets kojëts nbuwäˈägë ja partiidë comunistë.

¿Tikotsë nety nbuwäˈägë yäˈädë partiidë? Yëˈko nˈoymyëdoobyëts nety parë jäˈäy tuknax tijaty tmëdattët. Duˈunëtsë nety nwinmay ko tsojkëp nigijpxy tijaty yajmëdatët parë kyaj jyaˈˈatëdë kumeenyjyaˈay ets ni ayoobë jäˈäy. Päätyëts ojts nduktëkë tuˈugë organisasion mä ënäˈktëjk tyundë mëdiˈibë nanduˈun winmääytyëp. Kotsë netyë njëmëjt 14, tajëts ojts niˈëxpëjkë ets niduungë wiˈix mbäät jatëgok tyuunëmbityë neky mëdiˈibë të yˈoktuumbë. Ja kuduunk justisë jyantsy yˈoyˈijxtë ets axtë xymyooyëts tuˈugë premië. Oyëtsë nety jeˈeyënëm nˈyaˈkpëtsëmy, nˈixyˈäjtëts näägë politikëtëjk mëdiˈibë jëjpˈam tuundëp. Ets duˈunëts nety nwinmay ko oy mëdiˈibëts ndunaampy ets ko mbäädëts ja nxëëw njukyˈäjtën jotkujk nyajnaxy.

Per ta ajotkumonë tyëgäjtsy ja jukyˈäjtën. Mä jëmëjt 1989, ta jäˈäy ojts tjittë ja muro de Berlín, ets mä kanäägë paˈis mëdiˈibë Europa pëtsëëmdääytyë ja gobiernë comunistë. Axëëgëts ojts nnayjyawëty kots duˈun nˈijxy. Ets ok, tajëts nnijäˈäwë wiˈixë nety mayë jäˈäy axëëk të jyat të kyëbattë, extëm pënatyë nety kyaj të tpuwäˈägëdë ja partiidë comunistë. Päätyëts nnayajtëëwë, ¿wiˈix ko dyuˈunëty? ¿Ti kyaj yäˈädë partiidë tyukniˈˈixë ko ak tuknaxë jäˈäy? ¿Nëgoobëdaa duˈun të wyinˈëëndë? Tukëˈëyë mëdiˈibë tuun jäjtë nmëmääy nmëdäjëts.

Päätyëts ojts ndimymyastutnë ets yëˈëtsë net ojts njotmooynyë ja ëy yaˈaxy ets kotsë dibujë ngoy. Tajëts ojts nyajkujayë mä tuˈugë eskuelë mä yajniˈëxpëkë ëy yaˈaxy ets wiˈixëts mbäädë dibujë ngoy parëts ok ndëkët mä unibersidad; yëˈëtsë nety nduunkˈataampy mätsë njukyˈäjtën. Axëëgëts ja njukyˈäjtën ojts nyajnëjkxy kyaj dyuˈunëty extëmëts ja ndääk ndeety xytyukniˈˈijxëdë. Ndukxondäˈäganëts, pääty axtë ojtsëts njëdijty mët kanäägë toˈoxyˈënäˈk. Per ni kots duˈun njukyˈajty, ni ja ëy yaˈaxy ets ni kots ngoyë dibujë, tkayajjëwaˈky ja nˈamay njotmayëts, axtë nigëxëˈk mä ja kuäädrë mëdiˈibëts ngoopy ko mon tukëtsë nety yajpääty. Duˈunyëmëts nnayajtëëwë: ¿Tidaa ko duˈun yˈixëtyë yäˈädë jukyˈäjtën? ¿Wiˈixëdaa jukyˈäjtënë myiny kyëdaˈaky?

Kots ojts nijawë wiˈix yajnimaytyaky, duˈunyëts ojts xyajwëˈëmë. Tëgok mätsë eskuelë, ojtsëts ninëjkxy tuk grupë nmëguˈuktëjk mëdiˈibë nety jam nyimaytyaktëp wiˈix ja jukyˈäjtën myiny kyëdaˈaky ets tamë nety yajpäätyë Mandya mëdiˈibë testiigë. Yëˈë ojtsëts xymyooy tuˈugë oybyë käjpxwijën, duˈunëts xyˈanmääy: “Andreas, pën mnijawëyaampy tiko duˈun yˈixëtyë jukyˈäjtën ets ti miimp këdakp, ëxpëkë Biiblyë”.

Kyajtsë nety nˈity seguurë pën mbäädëtsë Biiblyë xypyudëkë, per tajëts njënany kots ngäjpxäˈäny. Mandy tajëts xytyukˈijxyë Daniel kapitulo 2, ets kots ojts ngajpxy, kyajëts nmëbëkany. Pes mä yäˈädë tekstë yëˈë nyimaytyakypy kanäägë gobiernë mëdiˈibë wäˈkpëtsëmäämp axtë mä ndiempëˈäjtëm. Mandy tajëts xyˈaktukˈijxy kanäägë tekstë mä tnimaytyaˈaky ti miimp këdakp. Taanëmëts ojts nnijawë tijatyëtsë nety nmëmääy nmëdajpy. Per tajëts nnayajtëëwë: ¿Pën duˈun ojts duˈun tkujayë? ¿Pën duˈun ojts tnaskäjpxë extëm meerë tyunäˈäny jyatäˈänyëty? ¿Waˈandaa yëˈë dyajtëyˈäjtëndëkë ko jantsy tamë Dios?

WIˈIXË BIIBLYË DYAJTËGÄJTYËTSË NJUKYˈÄJTËN

Mandy xytyukˈixyˈäjtëts tuˈugë kasäädë jäˈäy mëdiˈibë Testiigë, Horst mëdë Angelika. Yëˈëjëts xypyudëjkëdë parëts njaygyujkë Biiblyë. Tajëts nbëky kuentë ko yëˈëyë Jyobaa tyestiigëty yajtuundëbë Diosë xyëëw ets ttukniˈˈixëdë wiink jäˈäy (Salmo 83:18; Mateo 6:⁠9, Traducción del Nuevo Mundo). Ojtsëts nanduˈun nnijawë ko Jyobaa twandaˈaky jyukyˈatäˈänyë naxwinyëdë jäˈäy mä it lugäärë tsujpë. Salmo 37:⁠9 jyënaˈany: “Pënaty yˈëwxijt jyëjpˈijxtëbë Jyobaa yëˈë jyaˈˈatandëbë naxwinyëdë”. Njantsy yˈoymyëdoowëts kots nnijäˈäwë ko mbäät niˈamukë jäˈäy tpäättë duˈumbë jukyˈäjtënë pën kyuytyuundëbë Diosë yˈanaˈamën.

Ojts tsyiptaˈaky etsëtsë jukyˈäjtënë nyajtëgatsët extëmë Biiblyë tniˈanaˈamë. Mëj këjxmëtsë nety nnayjyawëty mët ko mayë jäˈäy yˈoyˈijxypy wiˈixëts ngoyë kuäädrë ets wiˈixëts nxuˈuxy ngoy, pääty tsojkëbëts nety nˈitët yujy tudaˈaky. Ojts nanduˈun tsyiptaˈaky nyajnëjkxëdëts wäˈäts ja njukyˈäjtënëts. Mëjwiin kajaats nguˈëw ngukäjpxë ko Jyobaa tpaˈˈayoy, tmëmaˈkxtuky ets ttsoky pënaty tyuundëbë mëjääw parë jyukyˈattë extëm yëˈë tniˈanaˈamë.

Desde mutsknëm, yëˈëts yajtukniˈˈijxë ko kyaj jyamëtyë Dios ets wiˈix wyinmaytyë partiidë comunistë, per kotsë nety njëmëjt mäjmokx tëgëëk, tats nnijäˈäwë Biiblyë ets yëˈë yajtëgäjtsëts ja njukyˈäjtën. Kyajëts ojts nˈoknayjyäˈäwënë awäˈäts tukwäˈäts ets kyajëts nanduˈun ojts nˈokmëmääy nˈokmëdäjnë wiˈix ja tiempë myiiny kyëdaˈaky. Jats nnëbejty mä jëmëjt 1993 ets mä jëmëjt 2000, tats nbëjky mëdë Tabitha, mëdiˈibë nanduˈun myëduumbyë Jyobaa. Jamëts nimajtsk ja nxëëw ndiempë nyajtundë mäts ja jäˈäy ndukniˈˈixëdë wiˈix jyënaˈanyë Biiblyë. Nimayë yäˈädë jäˈäy duˈun të yaak të pyattë extëm ëjts. Pääty jantsy jotkujkëts nnayjyawëty kots ndukˈixyˈattë Jyobaa.

TI KUNUˈKXËNËTS TË NˈAXÄJË

Kots ndëjkë ëxpëjkpë mëdë Jyobaa tyestiigëty, ja ndääk ndeetyëts kyaj tˈoyˈijxtë. Per ok, ta tpëjktë kuentë wiˈixëts agujk jotkujk njukyˈaty. Ets tyam agujk jotkujkëts njantsy nyayjyawëty mët ko tam tˈëxpëjknëdë Biiblyë ets nëjkxtëp reunyonk.

Nimajtsk mëdë Tabitha nguytyuundëbëts ja ëwij käjpxwijën mëdiˈibë miimp mä Biiblyë, ets agujk jotkujkëts ngasäädëˈattë. Extëm nˈokpëjktakëm, kots nmëmëdowdë ja käjpxwijën mëdiˈibë yajmooytyëbë kasäädë jäˈäy ets nyaywyintsëˈëgëdët, yëˈë yaˈijtypy mëk ja ntsënäˈäy njukyˈäjtënëts (Ebreeʉsʉty 13:⁠4).

Kyajts nekymyëmay nekymyëdäjy tiko duˈun yˈixëty ja jukyˈäjtën ets wiˈix myiiny kyëdaˈaky, mët ko tyam nyajpäätyëts mëdë nmëguˈukˈäjtëm abëtsëmy naxwinyëdë, mëdiˈibë ijttëp tuˈugyë ets agujk jotkujk. Mä yäˈädë familyë, tuk nax niˈamukë nyajpatëm, yëˈë mëdiˈibëts xëmë nˈëxtääy ets ntsojk desde kots nmutskˈäjty.