Mët ko yˈoyjyaˈaytyaky

MÄ TUˈUGË käjpn diˈib xyëwˈäjtypy Gujarat (India), jamë nety tsyëënë John mëdë fyamilyë. Ja tyeety ja nyëbejty extëmë Jyobaa tyestiigë 60 jëmëjtëp. Perë John mëdë tyääk ets mët nimëgoxkë myëgaˈax tsäjptëgotyë nety yoˈoytyë ets myëtsipˈäjttëp ja tyeetyë ryelijyonk.

Per tëgok, ta ja tyeety yˈanmääyë ets tmënëjkxët tuˈugë soobrë mä ja myëtnaymyaayëbë diˈib nanduˈun Testiigë. Mä tadë jopy të netyë John dyajtsayutyë kyëˈë mët ko dyaˈˈawatsy tuˈugë latë. Per kom myëmëdowaambyë netyë tyeety, ta tˈabijty ja kyëˈë ets ojts nyijkxy mä tsyëënë ja tyeetyë myëtnaymyaayëbë.

Ko jam jyajty, yëˈëyë nety jam ja kyudëjk diˈib nanduˈun Testiigë ets ta ojts tˈaxäjë ja soobrë. Ko tyäˈädë nmëguˈukˈäjtëm tˈijxy wiˈixë John të nyayajtsayutyëty, ta dyajtsoybyejty, ojts tpuj tjaˈtsë ja tsyayut ets tpijty tmojtsy. Ta net ojts tmoˈoy tuk tasë tee ets nuˈun jam jyejky, tsuj yajxon ttukmëtmaytyakyë Biiblyë.

John, ta kyaj nëgoo tëgatsy nyekywyinmääy mä Jyobaa tyestiigëty, ta dyajtëëy tuˈuk majtsk diˈibë nety nyijawëyaampy. Pes duˈunë nety tmëbëky ko Jesus yëˈë Dios ets ko tsojkëp twingäjpxtäˈägëdë María, per ja tyeety kyaj nety duˈun tmëbëky. Ja nmëguˈukˈäjtëm të nety tjatyë gujarati, ta ojts dyaˈpwaˈkxy ja Biiblyë ets ttukmëtmaytyaky mä kyëˈëm ayuk wiˈix jyënaˈany. Ok, ta tmooyë foyetë “Estas buenas nuevas del reino”.

Ko ojts tkajpxy, ta John jyënany ko të nety tpääty ja tëyˈäjtën. Ta net ojts nyijkxy tsäjptëgoty ets dyajtëëy ja teety extëmë nety të dyajtëy ja nmëguˈukˈäjtëm. Per ja teety jeˈeyë yˈawäˈändaky, ta tyuknikäˈtsë ja Biiblyë ets myëyaxkakë: “¡Satanás të mjëmbity! ¿Tukˈijxkëts mä Biiblyë mä jyënaˈany ko Jesus kyaj yëˈëjëtyë Dios? ¿Tukˈijxkëts mä jyënaˈany ko kyaj yˈoyëty nwingäjpxtakëmë María? ¿¡Aber oktukˈijxkëts!?”. John kyaj duˈun tyim winmääy pën duˈun ja teety yˈatsowëdët, ta tˈanmääy: “Ninäˈätsë ngëˈë ndeky nganekypyëjtäˈägäˈäny mä tyäˈädë tsäjptëjk”. Ets duˈunën ttuuny.

John ta tyëjkë ëxpëjkpë mëdë Jyobaa tyestiigëty ets tkupëjky ja tëyˈäjtën, ta tmëduuntsondakyë Jyobaa. Tamë fyamilyë diˈib nanduˈun tëjkëdë ëxpëjkpë. Tyambäädë John tmëdaty ja tay mä ja yˈaˈoygyëˈë, ets ko tˈixy, ta tjamyetsy wiˈix ja nmëguˈukˈäjtëm yˈoyjyaˈaytyaky 60 jëmëjtëp, ets ko yëˈë pudëjkë parë tpaty ja tëyˈäjtën (2 Kor. 6:4, 6).