¡Tëgoyˈäjtpë nmëguˈukˈäjtëm diˈib yaktëbë kursë!
1. ¿Tiko jyaˈˈatyë kursë abëtsemy nyaxwinyëdë parë pojënë yajjatëdë wiink ayuk?
1 Jyobaa kyuniˈxypyë tadë tuunk ko nmëtmaytyakëmë jäˈäy oy diˈibë “ayuk” tkäjxët (Apos. 20:24; Diˈibʉ Jat. 7:9). Etsë “tyuumbë diˈibë kuwijy” yˈëxtaabyë winmäˈäny parë jäˈäy yajtuknijawët ja tëyˈäjtën oy diˈibë ayuk tkäjxët (Mat. 24:45). Pääty dyajjaˈˈatyë kursë abëtsemy nyaxwinyëdë mä pojënë yajjatyë wiink ayuk. Parë mbäät duˈun yajtuny, jëmëjt jëmëjt yajtukniˈˈixëdë nimayë nmëguˈukˈäjtëm wiˈix dyaktëdë tyäˈädë kursë.
2. ¿Tiko tyëgoyˈaty diˈibë kursë yakëp?
2 Nuˈun kujk nyaxy mëgoxk jëmëjt, mä tyäˈädë paˈis ja të yˈëxpëktë nmëguˈukˈäjtëm 144 diˈib wiˈixëmë ayuk tkäjxtë, ja wyinëˈaty 34 ayuk. Yëˈë diˈibë net të dyaktë kursë ets të ttukniˈˈixëdë 13,000 naxyë käjxwäˈxpë parë mbäät tmëtmaytyäˈäktë jäˈäy wiink ayuk. Mä tyäˈädë paˈis ja yajkajxy 68 ayuk ets 364 diˈib tëgäjtsp o variantes, tyäˈädë yëˈë xytyukˈijxëm ko kajaanëmë tuunk yˈakweˈemy. Pääty pën mijts mgajxypy tuˈugë ayuk, oyxyëp ko nanduˈun mjënäˈäny extëm ja kugajpxy Isaiië jyënany: “¡Tyamëts ëjts! Kajxkëts” (Isa. 6:8). ¿Tijaty yaˈˈamdoop tuˈugë jäˈäy diˈib tsyojkënyëˈäjtypy dyakäˈänyë kursë? ¿Wiˈix yajpudëkëyäˈändë?
3. ¿Tijaty yaˈˈamdoop ja nmëguˈukˈäjtëm parë mbäät dyaky ja kursë?
3 Tijaty yaˈˈamdoop. Tsojkëp oy yˈitët mëdë Jyobaa. Pääty yëˈë yajwinˈijxp diˈib tuump mëjjäˈäy o diˈib pyudëjkëbë mëjjäˈäy. Kyaj yajnigajxy axtë näägë jyëmëjt, nëgokë oy mëk yajpääty. Mbäät diˈib naytyuˈuk o kasäädë. Oyxyëp ko tkajxy ja ayuk diˈib tukniˈˈixëyäämp, per pën kyaj, nëgokë yajxon të tjäjnë ja ayuk. Pënaty tsyojkënyëˈäjttëp dyakäˈändë kursë yëˈë yˈawanëbë sirkuitë, ets yëˈë diˈibë net kyaxëp ja neky jam Betel mä tnigajxy wiˈixë tyäˈädë nmëguˈukˈäjtëm yajpääty ets nanduˈun ja neky diˈibë mëjjäˈäytyëjkëty të tjäˈäytyë mä nyaymyukyëty ja nmëguˈukˈäjtëm.
4. Mä yajtukniwitsë ja kursë, ¿tijaty yajtuump Betel ets tijaty tyuundëbë sirkuitë?
4 ¿Wiˈix yajpudëkëyaˈany? Jam Betel yajmëgäjxäˈäny ja nmëguˈukˈäjtëm diˈibë naty të yajkupeky parë tnigäjxët pën mbäät dyaky ja kursë. Ok, ta jam yajwowäˈäny parë yajtukniˈˈixët wiˈix dyakët ja kursë. Nan jam Betel yaˈˈanëëmëyaˈanyë sirkuitë parë twinˈixët tuk grupë mëjjäˈäytyëjk diˈib mbäät ttukniwitsëdë ja kursë. Net ja maˈestrë aduˈuk dyakët ja kursë. Ets nan yëˈë sirkuitë diˈib wyinˈixëp pënaty pyäättëbë tyäˈädë kursë, ja 26 mbäät jeˈeyë nyëjxtë (1 Kor. 14:40).
5. ¿Wiˈix të yajtukniwitsë ets ja maˈestrë dyakëdë kursë?
5 Ti tyunëp ja maˈestrë. Ja maˈestrë yëˈë yˈawanëbë sirkuitë ti oorë mbäät dyaky ja kursë. Mbäät yaˈëxpeky tuk oorë o axtë tëgëk oorë tuˈukpë sëmään, ets ja mbäät jeˈeyë jyeky axtë tëdujk poˈo. Per mbäät jyeky tuk poˈo o mas waanë, pën ja maˈestrë madakp yaˈëxpëkët kanäkˈok tuˈukpë sëmään.
6. ¿Wiˈix tuˈugë nmëguˈukˈäjtëm dyaˈixyëty ko Jyobaa kyuniˈxypy pënaty nayˈawäˈänëdëp parë dyaktëdë kursë?
6 ¿Mbäät mijts xyakyë kursë? Waˈan näägë nmëguˈukˈäjtëm wyinmaytyë ko kyaj tjattë wiˈix tyukniˈˈixëdë yˈayuk o waˈan wyinmaytyë ko kyaj nëgoo yˈagäjxˈattë. Per mbäädë espiritë santë pyudëkëdë parë ttundët ti Jyobaa tsyejpy (Fwank 14:16). Duˈun extëm tuˈugë nmëguˈukˈäjtëm diˈib yajkypyë kursë ojts tkexyë neky jam Betel mä jyënany: “Yëˈëts miitsëty nˈawanëyandëp ko kyajts ninuˈun të ngaˈeskuelëˈaty. Jats të njaty njäˈäyët ets nekykyäjxëdëts mä Diosë kyäjpn. Mätsë naty ngayajtukniˈˈixë wiˈixëtsë kursë nyakët, duˈunëtsë naty nayjawëty ko kyajts nmëmadäˈägëdë tadë tuunk. Per dyoskujuyëmë Jyobaa, kujkëts njaty wiˈixëts ndukniˈˈixët. Mäts nyakyë kursë jats nˈixy wiˈixë Jyobaa myëjää tyuny ets wiˈixëts xypyudëkë. Tunoty kopkotyëts ntsoony mä jantsy amääyë meeny sentääbë, per ko Dios nmëduˈunëm jantsy mëkjäˈäy nyajpatëm mët tukëˈëyë diˈib yëˈë xymyoˈoyëm”.
7. Ko Jyobaa nˈamdoˈojëm ets tkaxët niˈigyë tuumbë, ¿tixyëbë net mbäät nduˈunëm?
7 Jyobaa ta duˈun tyam tkexy ja tuumbë diˈib nˈamdoˈojëm mä ja pëjtaˈaky myuky (Mat. 9:38). Yëˈë pyudëjkëp milˈamë prekusoorëty etsë käjxwäˈxpë parë nyëjxtët mä tsyekyëtyë naybyudëkë etsë jäˈäy yajtuknijawëdë tëyˈäjtënë diˈib käjxtëp wiink ayuk. ¿Mbäät mijts xypyudëkëdë tyäˈädë nmëguˈukˈäjtëm parë xytyukniˈˈixëdë mˈayuk? Pën duˈun, nëjxëbë Jyobaa mguniˈxyëty mëjwiin kajaa ko duˈun xytyuknibëjtäägët (Mal. 3:10).