Nˈoktukniˈˈijxëmë jäˈäy extëm mbäät tmëbeky
1. Parë oy ndukniˈˈijxëmë Diosë yˈAyuk, ¿ti kyaj jeˈeyë tsyekyëty nduˈunëm?
1 Mayë Dios mëduumbë diˈib oy yaˈëxpëjktëp extëmë apostëlë Pääblë, pyëjktëbë kuentë ko parë tuˈugë jäˈäy yajtukniˈˈixët “oy” ja Diosë yˈAyuk kyaj jeˈeyë tsyekyëty ndukwingugäjxëm (2 Tim. 2:15). ¿Ti mbäät nduˈunëm parë jäˈäy tmëbëkët tijaty ndukniˈˈijxëm? (Apos. 28:23.)
2. ¿Ti mbäät nduˈunëm parë jäˈäy niˈigyë twintsëˈëgëdë Diosë yˈAyuk?
2 Tukˈix ja jäˈäy wiˈix jyënaˈanyë Diosë yˈAyuk. Tuk peky, yëˈë ko nyajtuˈunëmë Biiblyë extëm mbäädë jäˈäy twintsëˈëgë ets tˈixët extëmë Diosë yˈAyuk. Ko jäˈäy tˈixët wiˈix nmëbëjkëmë Diosë yˈAyuk, mbäät yëˈë pyudëkëty ets tmëdoogukët ko ndukwingugäjxëm tuˈugë tekstë (Ebre. 4:12). Mbäät nˈanmäˈäyëm: “Okˈix wiˈix jyënaˈanyë Dios yˈAyuk, yëˈëts diˈib xypyudëjkëp parëts nnijawë wiˈixë Dios wyinmay mä diˈib yam nmaytyakëm”. Xëmë yˈoyëty nyajtuˈunëmë Diosë yˈAyuk ets ndukwingugäjxëmë jäˈäy.
3. Ko naty të ngäjxëm tuˈugë tekstë, ¿ti mbäät nduˈunëm parë ja jäˈäy tjaygyukët?
3 Myëmajtsk peky, tsojkëp nimaytyakëm ja tekstë. Mayë jäˈäy kyaj pojënë tjaygyukëdë ko tim ogäˈän yajtukwingugäjxë tuˈugë tekstë. Pääty xëmë yˈoyëty nimaytyakëm wiˈix tyuˈugyë ja tekstë mët diˈib jam nmaytyakëm (Luk. 24:26, 27). Tsojkëp nikäjxëmbijtëm ja ää ayuk diˈib miimp mä ja tekstë parë jäˈäy tjaygyukët ti jam mëët nmaytyakëm. Oy nanduˈun ko ti nyajtëˈëjëm parë nˈijxëm pën të tjaygyukë (Pro. 20:5; Apos. 8:30).
4. ¿Ti ja tuk peky mbäät nduˈunëm parë jäˈäy ndukniˈˈijxëm extëm mbäät tmëbeky?
4 Nˈoktukjaygyujkëm mëdë Biiblyë. Myëdëgëk peky, tsojkëp njäjtëm mä jäˈäyë jyot kyorasoon ko ndukjaygyujkëm mëdë Biiblyë. Nˈoktukˈijxëm ja jäˈäy wiˈix mbäät pyudëkëty tuˈugë tekstë. Ko ndukjaygyujkëm mëdë Biiblyë mbäät dyajtëgatsy ja jyot wyinmäˈäny (Apos. 17:2-4; 19:8). Extëm nˈokpëjtakëm, ko naty të ndukwingugäjxëmë Salmo 83:18, mbäät nˈanmäˈäyëm: “Jëjpˈam nnijäˈäjëm wiˈix tuˈugë jäˈäy txëˈaty parë mëët nnaymyaˈayëm”. Ta net nyajtëˈëjëm: “Wiˈix mˈokwinmay, ¿waˈandaa mas oy nmënuˈkxtakëmë Dios ko nnijäˈäjëm ti txëˈaty?”. Ko ja jäˈäy ndukˈijxëm wiˈix mbäät dyajtuny tuˈugë tekstë mä jyukyˈäjtën, ta tˈixët ko kajaa tsyobääty. Ko ndukniˈˈijxëm ja Diosë yˈAyuk extëm mbäädë jäˈäy tmëbeky, yëˈë may pudëkëdëp parë tmëdundët ja Dios diˈib tëyˈäjtën (Jer. 10:10).