Tuˈugë tuunk diˈib jantsy jotkujk xyajnayjäˈäwëm
1. ¿Ti tuunk tyam yajtuump parë jäˈäy tˈixyˈatëdë Jyobaa?
1 Ko ojts ja jäˈäy tˈixtë wiˈixë Jesus dyaˈˈagëdaky ja päˈäm jäˈäy, ta jyantsy nyayjäˈäwëdë agujk jotkujk (Luk. 5:24-26). Nanduˈun tyam, jantsy jotkujk nnayjäˈäwëm ko nbudëjkëmë jäˈäy parë tˈixyˈatëdë Jyobaa (Diˈibʉ Jat. 22:1, 2, 17). ¿Këdii xyajxondakëm ko ngäjpxëmë eksperiensyë mä wiˈixë Diosë yˈAyuk etsë myëjää dyaˈoyë jäˈäyë jyukyˈäjtën? Per mas jotkujk nnayjäˈäwëm ko nyaˈëxpëjkëm tuˈugë jäˈäy ets nbudëjkëm parë wyimbatët.
2. ¿Ti xondakën nbatëm ko jäˈäy ndukniˈˈijxëmë tëyˈäjtën?
2 ¿Ti txëˈatyë Dios? ¿Tiko tnasˈixë ayoˈon? ¿Ti yˈAnaˈam Kyutujkën tyukmëdunaambyë naxwinyëdë jäˈäy? Jantsy jotkujk nnayjäˈäwëm ko nˈatsoˈojëmbijtëmë tyäˈädë yajtëˈëwën, per mas jotkujk nnayjäˈäwëm ko nˈijxëm wiˈixë jäˈäy tjantsy tyukxondaˈaky ko tnijawë ja tëyˈäjtën (Pro. 15:23; Luk. 24:32). Ko tuˈugë jäˈäy wyimbety, ta dyajtuuntsondaknë Diosë xyëë, tpëjktaknë oyë wyit xyox, tmastutnë kostumbrë diˈib kyaj yˈoyëty ets tmëtmaytyaknë jäˈäy. Ets pën naytyukëdëjkëbë Jyobaa ets nyëbety, ta nmëguˈukˈäjtënë ets mëët tuˈugyë nduˈunënë. Ko nˈijxëm duˈun ja jäˈäy ttuundäˈäy diˈib nyaˈëxpëjkëm, yëˈë ja tuk peky diˈib xyajxondakëm (1 Tes. 2:19, 20).
3. ¿Tijaty mbäät nduˈunëm parë nyaˈëxpëjktsondakëmë jäˈäy?
3 ¿Mbäät mduny? Pën mdunaambyë tyäˈädë tuunk diˈib jantsy jotkujk xyajnayjäˈäwëm, amdowë Jyobaa ets xypyäädët tuˈugë jäˈäy diˈib myaˈëxpëkëp, ta net xytyunët extëmë naty të mnuˈkxtaˈaky (1 Fwank 5:14). Mëtmaytyäˈägë jäˈäy mä yajpääty ets ninëjkx näˈä yajpääty. Anëëmë jäˈäy oytyim näˈäty pën tsyejpy ets xytyukniˈˈixëdë Biiblyë (Ecl. 11:6). Pën mˈijxypy ko tsyojkënyëˈajtypy ets mnipy ja tëyˈäjtën, nijëmbit ets xyajxoogët (1 Kor. 3:6-9).
4. ¿Tiko jyëjpˈamëty ets nyaˈëxpëjkëmë jäˈäy?
4 Taanëm mayë jäˈäy yˈakˈyajpääty diˈib duˈunxyëp extëm ko tyëëtsëdë ets yuˈoogëdë mët ko kyaj tnijawëdë tëyˈäjtën. ¿Pën pudëkëdëp pënaty tëgoyˈäjtxëdëbë Diosë yˈëxpëjkën mët ko yajtukniˈˈixëdë Biiblyë? (Mat. 5:3, 6.) Pääty, nˈokˈëwäˈkx nˈokäjpxwäˈkxëm amumduˈukjot ets nˈokˈyaˈëxpëjkëmë jäˈäy mä kyakëxynyëmë tyäˈädë tuunk (Isa. 6:8).