¿Wiˈix tyuˈuyoˈoyë Diosë tyuunk Centroamérica?
1. ¿Ti yˈandijpyë tadë karrë diˈib tsäjpotm, ets tiko jyënaˈany ko yëˈë Jyobaa yajˈyeˈepy?
1 Mä Ezequiel kapitulo 1 jap yajnimaytyaˈagyë Jyobaa ko yëˈë yajˈyeˈepy tuˈugë mëj karrë diˈib tsäjpotm. Tyäˈädë karrë taxkë ryueedë ets këˈëm yoˈoy, pes yëˈë myëjääˈäjtypyë espiritë santë ets mbäät yuˈkxy xitsoo yatsoo. Tyäˈädë karrë yëˈë yˈandijpyë Jyobaa kyäjpn, ets ko jyënaˈany ko yëˈë yajˈyeˈebyë Jyobaa yëˈë yˈandijpy ko yëˈë tyuˈumoopy ets ttuktuny tijaty tyuknibëjktakëp (Eze. 1:4-28).
2, 3. 1) ¿Tijaty tyam nˈijxëm tuun jäjtëp mä Diosë kyäjpn? 2) ¿Tijaty xytyukˈijxëm ko tuˈugyë yajpäättë Jyobaa kyäjpn?
2 Diˈib tyam tuunë jäjtëp. Nuˈun tyamë xëë jëmëjt tyuˈuyoˈoy, kanäk peky kujk tijaty yajwijtsˈoyë mä Diosë kyäjpn, diˈib xytyukˈijxëm ko kyaj pyoˈkxyë tyäˈädë karrë diˈibë Jyobaa myëdäjtypy, extëm ko të yajpuwitsy tijaty nˈëxpëjkëm mä naymyujkën, ko pyëtsemy jeˈeyë ëxpëjkpajn mä Betel diˈib mëj ets ko tyuny mas niˈigyë medios electrónicos parë mas pojënë tyuˈuyoˈoyë ayuk. ¡Jantsy oy nayjäˈäwëm ko tyam nˈijxëm tijaty jaa tuun jäjtëp!
3 Ja kugajpxy Amós jyënany ko tyukjäˈtaambyë naty ja tiempë mä yajpäädäˈändë tuˈugyë ja jäˈäy diˈib tsoˈondëp oytyim määjëty ets yëˈë myënëjkxandëbë Diosë xyëë (Amós 9:11, 12; Apos. 15:15-17). Kom yëˈë Jyobaa käjpnˈäjtëdëp, pääty tuˈugyë yajpäättë oy kyäjpxtë wiink ayuk, tsyoondë wiink nax wiink käjpn ets oy wiink koloor yˈixˈattë.
4, 5. ¿Ti näämnëm të ttuknibëjktäägë Diˈib wyooyoˈoytyëbë Jyobaa Tyestiigëty, ets tiko?
4 Diˈib wyooyoˈoytyëbë Jyobaa Tyestiigëty yëˈë tyam yˈijxtëp naxwinyëdë abëtsemy etsë Betelë mëjatypyë ttunët tuunk diˈib yajtuump mä näägë Betelë mutskatypyë. Extëm diˈib yajpattëp Centroamérica të yajtuknibëjktäägë etsë Betel diˈib Nëwinm tˈixët wiˈix tyuˈuyoˈoyë Diosë tyuunk Costa Rica, El Salvador, Guatemala, Honduras, Nicaragua ets Panamá, duˈun extëm kujk tˈixy kanäk jëmëjt wiˈixë tyuˈuyoˈoyë tuunk diˈib Belice. Ko duˈun të yajtuny, ta të yˈadujktäˈäyë Betel mä tyäˈädë tëdujkpë paˈis. Ets duˈun jeˈeyë mä tuˈugë lugäär yaˈijxtäˈäy ti naybyudëkë tsyojktëbë nmëguˈukˈäjtëm.
5 Ko duˈun të yajtuknibëjktäägë, yëˈë parë mas oy yaˈixët wiˈix nyëˈëyoˈoy tyuˈuyoˈoyë Diosë tyuunk ets yajpudëkët “niˈamukë pënatyë Jyobaa yajmiimpy ets pënaty kyupëjktëp ko yaˈˈanëëmëdë parë tmëjkumaytyëdë Jyobaa mëdë nyax kyäjpn” (Organizados, pajina 4; Sal. 145:21; Diˈibʉ Jat. 22:17). Ja tuk peky tiko të yˈadujktäˈäyë Betel, yëˈë parë yajˈyakëdë naybyudëkë mä tyëgoyˈaty, jaˈko tyam mas niˈigyë myëjwindëkë Diosë tyuunk. Ets nan yëˈë parë nmëduˈunëm tuˈugyë Jyobaa.
6. ¿Ti näämnëm të yajtuny Centroamérica?
6 Pääty ko të tsyondaˈagyë julië poˈo axtë oktuubrë 2010, ja të yˈadujktäˈäy tuˈuk tuˈugë Betel diˈib yajpatp Centroamérica. Ets näägë nmëguˈukˈäjtëm të yajwowdë mä Betel diˈib Nëwinm parë jam tyundët etsë wiinkpë të yajkaxtë käjpxwäˈkxpë parë dyajmëjwindëkëdët ja Diosë tyuunk.
7. Ko tijaty ttunäˈändë Diˈib wyooyoˈoytyëbë Jyobaa Tyestiigëty, ¿ti jayëjp tyuundëp?
7 Nˈokpanëjkxëm extëmë Jyobaa xynyëˈëmoˈoy xytyuˈumoˈoyëm. Diˈib wyooyoˈoytyëbë Jyobaa Tyestiigëty të yajxon tpayoˈoytyë ets të jyantsy nyuˈkxtäˈäktë parë duˈun të ttundë. Tëgok jyënanyë nmëguˈukˈäjtëm diˈib xyëˈäjt Milton G. Henschel diˈib kanäk jëmëjt tuun mët Diˈib wyooyoˈoytyëbë Jyobaa Tyestiigëty: “¿Jaˈäjtpë wiinkpë grupë yä Naxwiiny diˈib jawyiin pyayoˈoytyëp mä Biiblyë ko ti ttunäˈändë?”. Kyaj nimää (ixë “Testimonio cabal”, pajina 111-113, parrafo 10). Mbäät nˈijtëm seguurë ko yëˈë xëmë të tpanëjkxtë wiˈix të tyuˈumoˈoyëdë Jyobaa yˈespiritë santë.
8. ¿Wiˈix mbäät tuˈuk tuˈugë Dios mëduumbë tpanëjkxyë karrë diˈib tsäjpotm?
8 Tadë Komitee diˈib tuundëp Betel mä tuˈuk tuˈugë paˈis diˈib Centroamérica të tkupëktë tijaty të ttuknibëjktäägë Diˈib wyooyoˈoytyëbë Jyobaa Tyestiigëty, ets yˈawijxtëp nanduˈun parë ja nmëguˈukˈäjtëm nanduˈun tkupëktët diˈib tuundëp misioneerë, sirkuitë, distritë, prekusoor diˈib tuundëp mëjjäˈäy, diˈib pudëjkëdëp ets niˈamukë ëwäˈkx käjpxwäˈkxpë. Jyobaa kunuˈkxanëdëp mët ko tpanëjkxtë extëm nyijkxy ja karrë diˈib tsäjpotm ets ko tpanëjkxtë extëm nyëˈëmoˈoy tyuˈumoˈoyëdë ja diˈib yajnëjkxtëbë jëjpˈamˈäjtën (Ebre. 13:17).
9. ¿Ti mbäät xypyudëjkëm parë yajxon nˈixyˈäjtëmë nmëguˈukˈäjtëm diˈib yajpattëp mä tyäˈädë paˈis?
9 Mä pajina 8 axtë 10, myiny tuˈugë mapë mä yajnigajpxy wiˈixë nmëguˈukˈäjtëm ttuunëdë Diosë tyuunk mä tuˈuk tuˈugë tyäˈädë paˈis. ¿Të xyˈixy mä myajpääty? Pën mˈaknijawëyaampy wiˈix yˈixëtyë yˈit lyugäär, jyaˈay, wiˈix tsyondakyë Diosë tyuunk ets wiˈix të kyajaajë, ix mä Anuario de los testigos de Jehová. Mbäät ja xypyayoˈoytyë mä mDiosˈawdattë mëdë mFamilyë. Ko nˈixyˈäjtëm yajxonë tyäˈädë nmëguˈukˈäjtëm diˈib yajpattëp mä tyäˈädë paˈis, yëˈë nëjkx xyajtuˈugyëm mä ja mëbëjkën nmëdäjtëm (Éfe. 6:21; Fili. 1:12).
10. Extëm xytyuˈumoˈoyëm Diˈib wyooyoˈoytyëbë Jyobaa Tyestiigëty, ¿wiˈix tyam ndukˈoyˈäjtëm ets wiˈix xypyudëkëyäˈänëm?
10 Ja tiempë mä jyukyˈäjttë apostëlëtëjk, mëjwiin kajaa ttukˈoyˈäjttë Diosë kyäjpn ko nyëˈëmooy tyuˈumooyëdë ja diˈib wooyoˈoyëdë (Apostʉlʉty 16:4, 5). Ets tyam, nanduˈun ttukˈoyˈattë. Extëm nˈokpëjtakëm, näämnëm tuˈugë sirkuitë diˈib Costa Rica jyënany: “Nmooytyëbë dyoskujuyëm ko duˈunë tyäˈädë tuunk xytyundë mët yëˈëgyëjxmë Diosë myëjää. Tyam tsojkˈamëts ngaxtë informë, nbayoˈoytyëts tijatyëts nnijawëyandëp, ngäpxtëts Betel ets nmëgäjpxtëtsë nmëguˈukˈäjtëm mäjatyë naymyujkën. Yëˈë tyam ndukˈoyˈäjtëm diˈibë naxwinyëdë jäˈäy yajjemybyëtsëëmdëp. Ets jotkujkëts nnayjawëty kojëtsë Jyobaa nyax kyäjpn xypyudëkë. Seguurë ko Jyobaa yëˈë duˈun diˈib nëˈëmoopy tuˈumoopy” (Isa. 60:16). Ja tuˈugë nmëguˈukˈäjtëm jyënany: “Jantsy oyëts nayjawëdë ko duˈun të yajtuknibëjtäägë. Ets nmëjkugäjpxëdëp ko kajaa tijaty xytyundë mët yëˈëgyëjxmë programas informáticos. Duˈunxyëp extëm miitsëty yä myajpäättë mët ëëtsëty. Kyajts njawëdë pën jagam yajpäätyë Betel, wingonëts nayjawëdë mëdë Jyobaa nyax kyäjpn diˈib nyëˈëmoopy tyuˈumoopy”.
11. ¿Wiˈix mbäät nnayaˈijtëm tuˈugyë mä nˈawdäjtëmë Jyobaa Dios?
11 Nˈoknayaˈijtëm tuˈugyë. Ko nmëmëdoˈojëm xondaˈakyˈää xondaˈakyjyotë Jesukristë, “diˈib myëdäjtypy ja kutujkën”, ta nëjkx “tiˈigyë jot winmäˈäny” nmëdäjtëm oy mä yajpäädëdë Betel (Éfe. 5:23; 1 Kor. 1:10). Seguurë nˈijtëm ko mas niˈigyë myëjwindëkëyaˈanyë Diosë tyuunk ets ko nˈakˈixäˈänëm tijaty aktunan akjatanëp mä Diosë kyäjpn. Pääty, nˈokˈyajkëktëjkëm mas niˈigyë mëbëjkën, ets nˈoknayaˈijtëm tuˈugyë mä nˈawdäjtëmë Jyobaa Dios. Nˈoknasˈijxëm parë xëmë xynyëˈëmoˈoy xytyuˈumoˈoyëm ja tuumbë diˈib kuwijy (Mat. 24:45-47).
[Mapë diˈib mä pajina 8]
MÉXICO
GUATEMALA
Ciudad de Guatemala
BELICE
Belmopán
HONDURAS
Tegucigalpa
EL SALVADOR
San Salvador
Managua
NICARAGUA
COSTA RICA
San José
PANAMÁ
Ciudad de Panamá
COLOMBIA
Ciudad de México
GUATEMALA
Ninäägë jäˈäy: 14,361,666
Sirkuitë: 25
Naymyujkën: 401
Käjpxwäˈkxpë: 30,015
Prekusoor regulaar: 3,179
Prekusoor espesial: 207
Misioneerë: 30
EL SALVADOR
Ninäägë jäˈäy: 5,835,231
Sirkuitë: 36
Naymyujkën: 665
Käjpxwäˈkxpë: 37,337
Prekusoor regulaar: 2,617
Prekusoor espesial: 280
Misioneerë: 11
COSTA RICA
Ninäägë jäˈäy: 4,509,392
Sirkuitë: 21
Naymyujkën: 394
Käjpxwäˈkxpë: 26,043
Prekusoor regulaar: 2,051
Prekusoor espesial: 92
Misioneerë: 29
BELICE
Ninäägë jäˈäy: 303,283
Sirkuitë: 2
Naymyujkën: 49
Käjpxwäˈkxpë: 2,183
Prekusoor regulaar: 308
Prekusoor espesial: 37
Misioneerë: 9
HONDURAS
Ninäägë jäˈäy: 8,175,763
Sirkuitë: 18
Naymyujkën: 302
Käjpxwäˈkxpë: 19,009
Prekusoor regulaar: 2,739
Prekusoor espesial: 194
Misioneerë: 92
NICARAGUA
Ninäägë jäˈäy: 5,727,000
Sirkuitë: 19
Naymyujkën: 341
Käjpxwäˈkxpë: 22,848
Prekusoor regulaar: 2,471
Prekusoor espesial: 215
Misioneerë: 68
PANAMÁ
Ninäägë jäˈäy: 3,504,483
Sirkuitë: 18
Naymyujkën: 279
Käjpxwäˈkxpë: 13,225
Prekusoor regulaar: 1,484
Prekusoor espesial: 171
Misioneerë: 38
MÉXICO
Ninäägë jäˈäy: 108,782,804
Sirkuitë: 557
Naymyujkën: 12,339
Käjpxwäˈkxpë: 710,454
Prekusoor regulaar: 92,049
Prekusoor espesial: 1,284
Misioneerë: 5
Diˈib yä yajnigäjpxp yëˈë diˈib të yajmaytsyoobëtsemy axtë 31 äämbë agostë 2010