Diˈib nnayajtëˈëwëm

◼ ¿Ti mbäät tuˈugë jäˈäy twinmay mä kyaˈookynyëm pën tsyejpy ets tijaty myëdäjtypy tmëwëˈëmëdë Diosë kyäjpn?

Ko tuˈugë jäˈäy yˈooky, duˈunyë tniˈokˈtutäˈäy tijaty myëdäjtypy (Ecl. 9:5, 6). Pääty mayë jäˈäy dyaˈoyëdë tuˈugë testamentë o dyajnekytyëkëdë wiˈix ttsoktë wyäˈkxët ja jyukyˈäjt myadakënëty (2 Rey. 20:1). Mä tadë neky diˈib kojp, nan jap yajnigajpxy pënë tadë jäˈäy diˈib nyikëjxmˈataampy wiˈix tijaty yajtunäˈäny o diˈib yajtijp albacea. Mä mayë paˈis, ko tuˈugë jäˈäy yˈooky ets kyaj të dyajkojˈyë tyestamentë, ta ja kuduunk justisë këˈëm tˈixtë wiˈix mbäät dyajwäˈkxtë tijatyë nety myëdäjtypy ja jäˈäy. Pääty, pën të ndukniwinmäˈäyëm wiˈix tijaty nyajwëˈëmäˈänëm o pën jam ti nyakäˈänëm mä Diosë kyäjpn, jëjpˈam ets nyaˈoˈoyëm tuˈugë testamentë ets yajxon nwinˈijxëm ja jäˈäy diˈib nduknikëjxmˈatäˈänëm wiˈix tijaty wyëˈëmdäˈäyët. Pën mˈaknijawëyaampy niˈigyë wiˈix xyaˈoyët ja testamentë ko tijaty xynyayakäˈänët, mbäät xyajtëy Betel.

Mëjwiin kajaajë tuunk tnikëjxmˈaty diˈib tijaty yajtukmëwëˈëmëp. Tˈijxtäˈäyët tijatyë nety ja jäˈäy myëdäjtypy, ja yˈit lyugäär, ja myeeny syentääbë ets ta net dyajwäˈkxtäˈäyët, tyäˈädë kajaa tiempë dyajtunäˈäny ets nanduˈun parë dyajnekytyëjkëtyaˈayët. Ja kuduunk justisë nan nyigajpxypy wiˈix tijaty yajtunët. Pääty tsojkëp yajxon yaˈixët pën diˈib nyikëjxmˈataampy, kyaj nwinmäˈäyëm ko oy tijaty ttunäˈäny mët ko tuˈugyë mëët nˈëxpëjkëm. Tsojkëp nwinˈijxëm ja jäˈäy diˈib mbäät duˈun ttuny, diˈib kyuytyunëp extëmë nety të nduknipëjkëm, ets diˈib tëyˈäjtën myëët yajwäˈkxëp (ixë ¡Despertad! del 8 de diciembre de 1998, mä jyënaˈany: “Los beneficios de la planificación patrimonial”).

Ko pën mduknipëkëdët ets xyˈixët tijaty myëdäjtypy mä kyaˈookynyëm. Oy ko jawyiin xyˈixët nuˈun tyunäˈäny ja meeny sentääbë etsë Dios xymyënuˈkxtäˈägët, ta net yajxon xywyinmayët pën mbäät duˈun xytyuny (Luk. 14:28-32). Ko nety ja jäˈäy të yˈooky mijts mnikëjxmˈäjtypy ets xytyukˈawanët ja jäˈäy diˈib tijaty yajmoˈoyäämp. Nan mijts mnikëjxmˈäjtypy ets xyajwäˈkxët ja jyukyˈäjt myadakën extëm jyënaˈany ja ley ets extëm të wyeˈemy mä testamentë. Ja jäˈäy diˈib nyikëjxmˈäjtypy duˈunën mbäät ttuundäˈäy extëm të wyeˈemy mä testamentë, oy wyaanëty o myëjwiin kyajaajëty diˈib të yajtukmëwëˈëmë. Ets tijaty yajnayäjkp mä Diosë kyäjpn, duˈun xyëëdëkët extëm yaˈixyˈattë Jyobaa tyestiigëty mä gobiernë (Luk. 16:10; 21:1-4).