Panëjkxtë ja kugajpxyëtyë yˈijxpajtën: Oseas
1. ¿Ti mbäät nduˈunëm mët ko Jyobaa yˈoyjyaˈayëty ets pyaˈˈayoy?
1 Ko nwinmäˈäyëm wiˈixë Jyobaa yˈoyjyaˈayëty ets wiˈix pyaˈˈayoy, mbäät nnayajtëˈëwëm: “¿Tijatyëts nˈaˈijxëp nmastuˈudët parëts nmëdunëdë Jyobaa?” (Sal. 103:2-4; 116:12). Oseas ojts nyayoxyëty parë tmëmëdooyë Jyobaa ets xondaˈakyˈää xondaˈakyjyot duˈun ttuuny. ¿Wiˈix mbäät nbanëjkxëmë yˈijxpajtën?
2. ¿Wiˈix mbäät nbanëjkxëmë yˈijxpajtënë Oseas parë nmadakëm?
2 Nˈokkäjpxwäˈkxëm oy tsyiptaˈagyë tiempë. Oseas jam ojts kyäjpxwaˈkxy mä ja mäjkpë tëëm ääts diˈib Israel, mä nety nimay ja israelitëty kyaj tnekymyëdundë Jyobaa. Ja rey Jeroboán segundo, “yëˈë nety tyuumpy diˈibë Jyobaa yˈaxëkˈijxypy” ets niˈigyë nety dyajmëjwindëkë mä yaˈˈawdatyë tsäjkää maxuˈunk diˈib yajtsondakë Jeroboán primero (2 Rey. 14:23, 24). Ets ja reyëty diˈib ak anaˈamdë nan kyaj ti ttundë parë tyäˈädë jotmay yˈoyët, axtë kyutëgooytyë mä jëmëjt 740 mä kyajnëm myinyë Jesus. Per oy niˈigyë myëjwindëjkë ja relijyonk diˈib kyaj tyëyˈäjtënëty, Oseas myëduunë Jyobaa naa 59 jëmëjtën. Ets ëtsäjtëm, ¿nan të nbëjtakëmë winmäˈäny parë xëmë ngäjpxwäˈkxäˈänëm oyë jäˈäy tkaˈoymyëdowët ets oy xytyukmëtsipˈäjtëm? (2 Tim. 4:2.)
3. ¿Wiˈixë Oseas dyaˈijxë Jyobaa pyaˈˈayoˈojën?
3 Nˈokˈijxëm ko Jyobaa paˈˈayoop. Jyobaa duˈun tˈanmääyë Oseas: “Wow tuˈugë mnëdoˈoxy diˈib të tyuundëgoy” (Os. 1:2). Oseas mëdë nyëdoˈoxy, Gómer, pyattë tuˈugë yˈuˈunk, per ok, ta tˈakpaty ja nimajtskë yˈuˈunk diˈib waˈan kyaj yëˈë tˈuˈungëtyë Oseas. Oseas ojts tpokymyeˈkxy ja nyëdoˈoxy, diˈib yaˈijxë ko Jyobaa nanduˈun nety tpaˈˈayowäˈäny ja israelitëty diˈib të jyodëmbittë (Os. 3:1; Rom. 9:22-26). Ets ëtsäjtëm, ¿nmastuˈudäˈänëm tijaty njatsojkënyëˈäjtëm parë nduknijäˈäwëm “oytyim diˈibë jäˈäyëty” ko Jyobaa paˈˈayoop? (1 Kor. 9:19-23.)
4. ¿Tijaty nˈaˈijxëm nmastuˈudäˈänëm parë niˈigyë nmëduˈunëmë Jyobaa?
4 Näägë Dios mëduumbë të tmastuˈuttë oybyë tyuunk o mä tsooxë yajmëjuytyë parë niˈigyë dyajtunäˈändë tiempë mä Dios tyuunk. Ta wiinkpë diˈib kyaj të pyëktë o diˈib kyaj tmëdattë yˈuˈunk mët ko niˈigyë Dios tmëdunäˈändë. Näˈäty, mbäät nwinmäˈäyëm ko tsip nduˈunëm diˈibë Oseas tyuun. Per pën nmëjjäˈäwëm wiˈixë Jyobaa jyantsy yˈoyjyaˈayëty ets pën nmëbëjkëm ko xymyoˈoyäˈänëmë myëjää, mbäät xyajtuˈunëm extëmë nety ninäˈä të ngawinmäˈäyëm, duˈun extëm dyajtuunyë Oseas (Mat. 19:26; Filip. 2:13).