¿Nyaˈëxpëjkëm oyë jäˈäy?

1. ¿Ti nyikëjxmˈäjttëp niˈamukë pënaty yaˈëxpëjktëbë jäˈäy?

¹ Nipën mbäät tkamëdunyë Dios “pën kyaj dyajminy yëˈë Dios Teety” (Fwank 6:44). Per oy yëˈë dyajminy, pënaty yaˈëxpëjktëbë jäˈäy nyikëjxmˈäjttëp parë tpudëkëdët ets tmëwingondëdë Jyobaa (Sant. 4:8). Pääty, tsojkëp ets jawyiin yajxon nˈëxpëjkëm. Parë jäˈäy tjaygyukët ets wyimbatët, kyaj jeˈeyë tsyekyëty tkäjpxëdë parrafo ets tˈatsoojëmbitët extëm jam myiny.

2. ¿Ti mbäät nduˈunëm parë oyë jäˈäy nyaˈëxpëjkëm?

² Parë oyë jäˈäy nyaˈëxpëjkëm, tsojkëp nbudëjkëm ets: 1) tjaygyukët wiˈixë Biiblyë tyukniˈˈixë, 2) tkupëkët ets 3) tkuytyunët (Fwank 3:16; 17:3; Sant. 2:26). Näˈäty, mbäät nyaxy kanäk poˈo parë duˈun ttunët, per jëjpˈam ets ttunëdë tyäˈädë tëgëk pëkypyë parë tmëwingonëdë Jyobaa ets nyaywyandäˈägëdët mä yëˈë.

3. ¿Tijaty mbäät nyajtëˈëwëmë jäˈäy pën oy nyaˈëxpëkäˈänëm, ets tiko?

³ ¿Ti wyinmaapy ja jäˈäy diˈib nyaˈëxpëjkëm? Parë nnijäˈäwëm pën ja jäˈäy jyaygyujkëp ets kyupëjkypy extëmë Biiblyë tyukniˈˈixë, tsojkëp nyajtëˈëwëm wiˈix wyinmay ets kyaj ëtsäjtëm nigäjpxtäˈäyëm (Sant. 1:19). ¿Jyaygyujkëp ja jäˈäy wiˈixë Biiblyë tyukniˈˈixë ti jam mëët nˈëxpëjkëm? ¿Mbäät këˈëm tnimaytyaˈaky wiˈix tjaygyukë? ¿Wiˈix wyinmay ti jam mëët nˈëxpëjkëm? ¿Myëbëjkypy tijatyë Biiblyë tukniˈˈijxëp ets jyaygyujkëp ko mbäät pyudëkëty? (1 Tes. 2:13.) ¿Jyaygyujkëp ko jëjpˈam dyajtëgatsëdë jyukyˈäjtën? (Kol. 3:10.) Parë nnijäˈäwëm wiˈixën meerë wyinmay ja jäˈäy diˈib nyaˈëxpëjkëm, tsojkëp yajxon niwinmäˈäyëm ti nyajtëwäˈänëm etsë net yajxon nmëdooˈijtëm (Mat. 16:13-16).

4. ¿Ti mbäät nduˈunëm pën ja diˈib nyaˈëxpëjkëm tsiptakxëp tjaygyukët o tkuytyunët tijatyë Biiblyë tukniˈˈijxëp?

⁴ Myënëjkxypyë tiempë parë jäˈäy nyayajtëgatsëdët, pes të tˈijxwëˈëmdë wiˈix ja kostumbrë tmëdattë ets wiˈix wyinmaytyë (2 Kor. 10:5). ¿Ti mbäät nduˈunëm pën ja jäˈäy diˈib nyaˈëxpëjkëm kyaj tsojk tjaygyukë ja tëyˈäjtën o kyaj tkuytyuny? Tsojkëp nmëmaˈkxtujkëm ets nyajnäjxëmë tiempë parë Diosë yˈAyuk etsë myëjää yˈadëk tyuktëkëdët (1 Kor. 3:6, 7; Eb. 4:12). Pën tsiptakxëp tjaygyukët o tkuytyunët ti jam mëët nˈëxpëjkëm, mbäät ninäjxëm etsë wiinkpë nˈëxpëjkëm. Pën duˈunyëm ndukniˈˈijxëm tijatyë Biiblyë myaytyakypy mëdë maˈkxtujkën etsë tsojkën, ko tiempë nyaxët mbäät dyajtëgatsyë jyukyˈäjtën.