Mä Yajniˈëxpëkë Diosë Tyuunk 2015 xypyudëkëyäˈänëm parë oyë jäˈäy nyaˈëxpëjkëm

¹ David jyënany: “Waˈanëtsë nˈää nˈayuk diˈib pëtsëëmp nˈääjoty ets diˈibëts nbawinmaapy mäjëtsë ngorasoon oy myajnayjawëty, mijts Jyobaa, diˈibëts ntsäägaatsˈäjtypy ets diˈibëts xyaˈˈawäˈätspëtsëëmp” (Sal. 19:14). Ëtsäjtëm nan oy nyajnayjawëyäˈänëmë Jyobaa ets nmëjjawëyäˈänëm ko nimaytyakëm ja tëyˈäjtën mä ngäjpxwäˈkxëm ets mä nduˈukmujkëm. Jyobaa kanäk pëky tijaty dyajtuny parë xytyukniˈˈijxëm wiˈix ngäjpxwäˈkxëm, tuk pëky, yëˈë mä Yajniˈëxpëkë Diosë Tyuunk. Tyäˈädë ëxpëjkën ja tyunyëty sëmään sëmään abëtsemy nyaxwinyëdë, mä 111,000 naxyë naymyujkën. Yëˈë diˈib pudëjkëdëbë nmëguˈukˈäjtëm oy wiˈixëm ja ëxpëjkën tmëdattë parë niˈigyë tjattët wiˈix tnimaytyäˈäktëdë oybyë ayuk amëk jotmëk, ttukjaygyukëdët ja jäˈäy ets tˈëxtäˈäytyëdë winmäˈäny wiˈix ttundët (Apos. 19:8; Kol. 4:6).

² Mä programë diˈib 2015, yaˈëxpëkäˈänyë foyetë Oybyë ayuk diˈib tsoˈomp mä Dios, Biiblyë, ¿ti xytyuknijäˈäjëm?, ¿Ti xytyukniˈˈijxëmë Diosë yˈAyuk?, Mëdow ko Dios mmëgajpxyëty ets mjukyˈatët winë xëë ets ¿Pënaty tyam tyuundëp ti Jyobaa tsyejpy? Ja tuk pëky diˈib jemy yä yajnigäjpxp, yëˈë ko të yajpuwitsyë tiempë mä nyaxyë tekstë diˈib yajtukwijtstutp mä Biiblyë ets nanduˈunë diskursë 1. Min nˈokˈijxëm wiˈix të tyëgatsy ets wiˈix mbäät nyajnäjxëm ja diskursë.

³ Tekstë diˈib yajtukwijtstutp mä Biiblyë. Pënaty patëp dyajnaxët, jeˈeyë majtsk minutë tiempë yajmoˈoyaˈany parë tuk pëky tnimaytyäˈägët diˈib të ttukwijtstuˈuty mä Biiblyë tadë sëmään. Parë tuk pëky tnimaytyäˈägët diˈib mbäät pyudëkëtyë nmëguˈukˈäjtëm ets kyaj dyajniˈigyëdë tiempë, tsojkëp jawyiin yˈëxpëkët. Ta diˈibë net akwëˈëmp tëdujk minutë, tˈanëëmët ja nmëguˈukˈäjtëm ets jeˈeyë tnigäjpxtët 30 segundë ti bersikulo të tpäättë diˈib të pyudëkëdë. Parë duˈun ttundët ja nmëguˈukˈäjtëm, tsojkëp yajxon yˈëxpëktët parë jeˈeyë tnigäjpxtët 30 segundë o waanë. Duˈun mbäädë wiinkpë tnimaytyäˈäktë diˈib nanduˈun të tpayoˈoytyë.

⁴ Numero 1. Jeˈeyë tëgëk minutë o waanë të yajtuknibëjtäägë mä yajkajpxyë Biiblyë. Pënaty patëdëp, tsojkëp kanäkˈok tnikäjpxët mëk, tˈixët pën oy tkajpxy ets pën yajtuˈuwijtsypy parë yajjaygyukët ti jam kyajpxypy. Tsojkëp niˈamukë nduˈunëmë mëjää parë oy nletrëkäjpxëm, pes jëjpˈam parë nDiosˈawdäjtëm. Jotkujk nnayjäˈäwëm ko nˈijxëm mä naymyujkën nimayë ënäˈkuˈunk oy lyetrëkäjpxtë. Ets oy ko nmëjkumäˈäyëmë tääk teety diˈib pyudëjkëdëbë yˈuˈunk yˈënäˈk parë oy lyetrëkäjpxët.

⁵ Numero 2. Yëˈë yajnaxëbë toxytyëjk extëm tuˈugë demostrasyonk diˈib jakëp mëgoxk minutë. Yëˈë yajnaxëp diˈib të yajtuknipëky. Ko pyäädëdët dyajnaxët diˈib miimp mä foyetë ¿Ti xytyukniˈˈijxëmë Diosë yˈAyuk?, duˈun dyajnaxët extëmxyëp jamë jäˈäy tmëtmaytyaˈaky ets tpudëkë mä kyäjpxwaˈkxy. Ets ko pyäädëdët mä wiinkpë ëxpëjkpajn, yëˈë nyimaytyäˈägëp wiˈix myiny ja temë ets twinˈixëdë tekstë diˈib mbäät tkajpxy. Nan mbäät dyajtunyë wiinkpë tekstë diˈib mëët tyuˈugyë. Diˈib yajnäjxypy mä Yajniˈëxpëkë Diosë Tyuunk, yëˈë yˈixaampy pën mëët dyajnaxët.

⁶ Numero 3. Ja jyakäˈäny mëgoxk minutë, mbäät dyajnaxy tuˈugë yetyëjk o toxytyëjk. Pën yëˈë yajmoobyë toxytyëjk, ta dyajnaxët extëmë 2, ets pën yëˈë yetyëjk, ta dyajnaxët extëm tuˈugë diskursë, per net pën kyaj yëˈë pyaatyëtyë foyetë ¿Ti xytyukniˈˈijxëmë Diosë yˈAyuk? Yëˈë nyimaytyäˈägëp wiˈix myiny ja temë ets twinˈixëdë tekstë diˈib mbäät tkajpxy.

⁷ Wiˈix ja tuk pëky nyaxäˈänyë diskursë 3. Ko pyäädëdët dyajnaxët tuˈugë yetyëjk diˈib miimp mä foyetë ¿Ti xytyukniˈˈijxëmë Diosë yˈAyuk?, ta dyajnaxët extëm tuˈugë demostrasyonk mä wiˈix Diosˈawdaty mëdë fyamilyë o wiˈix nyijkxy tëjkˈayeˈebyë. Ja diˈib yajnäjxypy mä Yajniˈëxpëkë Diosë Tyuunk, yëˈë nyigäjpxaampy pën mëët dyajnaxët ets wiˈix. Yëˈë mëët dyajnaxët niduˈugë fyamilyë o wiinkpë nmëguˈukˈäjtëm diˈib yetyëjk. Mä dyajnaxyë demostrasyonk, mbäät dyajtunyë wiinkpë tekstë diˈib mëët nyaymyënëjkxyëty. Näˈäty, mbäät yëˈë yajtuknipëky diˈib tuump mëjjäˈäy, yëˈë mbäät këˈëm twinˈixy pën mëët dyajnaxäˈäny ets wiˈix ttunäˈäny. Kajaa pyudëkëyaˈanyëtyë nmëguˈukˈäjtëm ko tˈixtët wiˈix ja mëjjäˈäytyëjk jantsy oy yaˈëxpëktë mä jam ttukniˈˈixëdë niduˈugë fyamilyë o niduˈugë nmëguˈukˈäjtëm.

⁸ Käjpxwijën. Diˈib yajnäjxypy mä Yajniˈëxpëkë Diosë Tyuunk, majtsk minutë tiempë yajmoˈoy parë tmëjkumayët ja diˈibë diskursë të dyajnaxy ets tmoˈoyëdë käjpxwijën diˈib mbäät pyudëkëty extëm myiny mä liibrë Benefíciese. Kyaj tnigäjpxët mä tyunäˈäny ja diˈib jam naxäämp. Per ko nety të dyajnäjxtäˈäy ja diskursë, ta tmëjkumayët, tˈanëëmët mä të pyaatyëty tyunët ets ttukmëtmaytyäˈägët tiko jantsy oy të dyajnaxy, nan mbäät tsuj yajxon tˈanëëmë mä të yˈaktëgoyˈäjtxëty.

⁹ Pënaty yajnäjxtëbë diskursë mbäät tˈixtë mä lyiibrë Benefíciese pajina 79 axtë 81 mä wiˈix mbäät tyundë. Ko kyëxët ja ëxpëjkën, ta ja diˈib yajnäjxypy mä Yajniˈëxpëkë Diosë Tyuunk tkujayët mä ja lyiibrë diˈib të dyajnaxyë diskursë mä të tyuny ets anaytyuˈuk dyajtëwët pën të ttuny extëm myiny mä jyënaˈany ejercicio. Nan mbäät tmëjkumay ets tmoˈoyë käjpxwijën diˈib mbäät pyudëkëty. Jëjpˈam ets niˈamukë pënaty yajnäjxtëbë diskursë tmëjpëjtäˈäktët ja käjpxwijën diˈib yajmooytyëp, pes yëˈë pudëkëyanëdëp parë wyimbattët mä Diosë tyuunk (1 Tim. 4:15).

¹⁰ Pën yajniˈigyëbë tiempë ja diˈib yajnäjxypyë diskursë, ta ja diˈib yˈijxypy mä Yajniˈëxpëkë Diosë Tyuunk o diˈib pudëjkëp, dyajjënäˈänët jam ti extëmë lapis parë ttukˈawanët ko të ja tiempë kyexy. Ta dyajjëjpkëxët ja myaytyaˈaky ets jyënakët mä ja plataformë (ixë liibrë Benefíciese, pajina 282, parrafo 4).

¹¹ Yaˈˈanmääytyëp niˈamukë parë yajkujayët pënaty mbäät nyäjxnë mä Yajniˈëxpëkë Diosë Tyuunk (ixë liibrë Benefíciese, pajina 282, parrafo 6). Tijaty yajtukniˈˈijxëdëp mä tyäˈädë eskuelë, yëˈë pudëjkëbë Diosë kyäjpn parë tkäjpxwäˈkxtë oybyë ayuk ets tyukniˈˈixëdë amëk jotmëk, wintsëˈkën myëët ets mëdë tsojkën. Jyobaa jotkujk nyayjawëty ko nyajtuˈunëmë tyäˈädë ëxpëjkën parë nmëjkumäˈäyëm (Sal. 148:12, 13; Is. 50:4).