Jat wiˈix oy xytyunëdë Diosë tyuunk: ko xytyukniˈˈixët ja diˈib myaˈëxpëjkypy parë tˈijxwëˈëmët oy yˈëxpëkët

Tiko jyëjpˈamëty. Parë jäˈäy diˈib myaˈëxpëjkypy yˈitët oy mëdë Dios, tsojkëp këkpäät yˈëxpëkët, kyaj jeˈeyë tjatët tijaty wingëjxy tukniˈˈijxëbë Biiblyë (Eb. 5:12–6:1). Per parë duˈun yˈëxpëkët, tsojkëp ttunëdë mëjää, twinmayët tijaty të tjaty mët tijaty yˈakˈëxpëjkypy, ets tˈixët wiˈix mbäät tkuytyuny (Prov. 2:1-6). Ets parë tnijawët wiˈix yaˈˈatsoowëmbity tijaty nayajtëëwëp, tsojkëp këˈëm tpayoˈoyët mä ëxpëjkpajn. Ko tkuytyunët tijaty yˈëxpëjkypy, yëˈë pudëkëyanëp parë twinguwäˈägët ja amay jotmay diˈib pyäädaampy mä Dios mëduny (Luk. 6:47, 48).

Wiˈix nduˈunëm:

Tukmëtmaytyäˈäk ja diˈib myaˈëxpëjkypy ko jëjpˈam tmënuˈkxtäˈägëdë Jyobaa parë pyudëkëdët tëgok tëgok yˈëxpëkäˈänët (Fwank 14:26; 1 Kor. 2:10).
Ko xyaˈëxpëjktsondäˈägët, anëëmë ets kontiempë tnikäjpxët diˈib mëët xyˈëxpëkäˈäny. Mbäät xytyukniˈˈixë parë tˈajäˈäyët diˈib jëjpˈam ets xytyukˈixët ja mliibrë wiˈix mijts xytyuny.
Anëëmë parë tˈatsoowëmbitët mëdë kyëˈëm ää kyëˈëm ayuk. Kyaj jeˈeyë xykyäjpxët ja yajtëˈëwën parë tˈatsoowëmbitët extëm myiny mä liibrë.
Anëëmë parë tkäjpxëdë Biiblyë bom bom. Mä jw.org xypyäädäˈäny tuˈugë programë diˈib mbäät pyudëkëty parë ttukniwitsët wiˈix tkäjpxëdë Biiblyë. Winmäˈäny yajpëjtäˈägäämp parë ngostumbrëpëjkëm ets ngäjpxëmë Biiblyë, per mëjwiin kajaa yajtukˈoyˈaty (Sal. 1:2, 3).
Tukniˈˈixë ets dyajtunëdë BIBLIOTEKË DIˈIB MÄ INTERNET parë tpäädët wiˈix yaˈˈatsoowëmbity mä Biiblyë tijaty nayajtëëwëp. Nan mbäät xytyukniˈˈixë wiˈix yajtijy tuˈuk tuˈugë ëxpëjkpajn diˈib tuump mä nduˈukmujkëm, extëm nˈokpëjtakëm fg, yëˈë yˈandijpyë foyetë Oybyë ayuk diˈib tsoˈomp mä Dios.

Tiko duˈun xykyatuny mä tyäˈädë poˈo:

Ko xyajkëxët tuˈugë subtitulo o kapitulo, anëëmë ja diˈib myaˈëxpëjkypy parë waanë tnimaytyäˈägët ti të tjaty. Pën tyam kyaj pën xyaˈëxpëky, mbäät waanë xynyimaytyaˈaky ko këˈëm xykyäjpxët tuk pëky mä Biiblyë o tuˈugë parrafo mä Diˈib Xytyukˈawäˈänëm. Tyäˈädë yëˈë mbudëkëyanëp parë yajxon xyjaygyukët diˈib mgajpxypy.