“Nëjx jawyiin mnayyajtiˈigyëdë mëdë mmëguˈuk”

Okpawinmay ko mtsëënë Galilea, ja tiempë mä jyukyˈajtyë Jesus, ets të mjäˈty Jerusalén mä yajnixëduny ja Tëjk diˈib nikemy nixoˈomy. Nimay jamë mëguˈuktëjk të jyäˈttë diˈib tsoˈondëp oy myääjëty, ets të ja käjpn yˈujtspety mëdë mayjyaˈay. Ta xymyëtsoony tuˈugë tsyiibë diˈib nëjkx xytyukwintsëˈëgëyaˈanyë Jyobaa. Ta mnëjkxy mä ja templë ets xytyuknaxy ja käjpn, per tsiitypyëmë jäˈäy nëˈääy tuˈääy. Ko jam mjäˈty, nijeˈeyë mbäät mganaxy mët ko tamë mayjyaˈay diˈib nanduˈun të tmëmindë wyintsëˈkën. Taanëmë net mnaxy parë xykyëyakët ja mtsyiibë mä saserdotë. Per mä jam xytyim yakanë, ta xyjamyetsy ko tam mganayaˈoyëty mët tuˈugë mmëguˈuk, waˈan jam yajpääty mä ja mayjyaˈay o mä jyäjtakn. Jesus nyigäjpx tixyëp mbäät xytyuny (käjpxë Matewʉ 5:24). ¿Ti mbäät xytyuny mët ja mmëguˈuk diˈib axëëk të xyyajnayjawëty parë xypyanëjkxët extëmë Jesus ojts tniˈanaˈamë? Winˈix mä tyäˈädë rekuäädrë diˈib mbäät nduˈunëm.

DIˈIBXYËP MBÄÄT XYTYUNY

• Jaayë xymyëtmaytyäˈägët ja mmëguˈuk pën mwinmaapy ko tam tiko axëëk të xyyanayjyawëty.

• Xytyukjaygyukët ko yëˈë diˈib nayajtëgatsëdëp mët ko mwinmay ko pojënë tijaty dyajpoky o ko nan yëˈë pyoky.

• Maˈkxtujkën myëët xymyëdoowˈitët ko mëtmaytyäˈägëdët, ets oy xykyajaygyujkëtyaˈayët, anëëmë amumduˈukjot parë mbokymyaˈkxëdët ko axëëk të xyyajnayjawëty oy duˈun të xykyatunäˈäny.

DIˈIBXYËP MBÄÄT TTUNY JA MMËGUˈUK

• Ttukmëtmaytyaktäˈäyëdë myëguˈuktëjk diˈib mä tuˈukmujkën wiˈix të xytyuny parë pyuwäˈägëdët.

• Mdukmëgäjpxtäˈäyëdët wiˈix të xytyuny, ets mëktaˈaky mˈanëˈëmxëdët parë xykyupëkëdë mboky.

• Tˈëxkapët ko të mˈity yujy tudaˈaky ets jotmëk parë të xymyëtmaytyaˈaky ets amumduˈukjot mbokymyaˈkxëdët.

Tyam kyaj nyäjkëmë jëyujk animal extëmë wintsëˈkën mä nDiosmëduˈunëm, per extëmë Jesus tyukniˈˈijxë ¿wiˈix nyaymyënëjkxyëty ko oy nˈijtëm mëdë nmëguˈukˈäjtëm ets ko nmëduˈunëm extëm tkupëky?