Mëdiˈibë nääk të nyayajtëwëdë

¿Pënën ja “toxytyëjk” mëdiˈibë yajmaytyakp mä Isaías 60:​1, ets näˈäjën pyëdeˈeky ets tyeˈkxy jyajy?

Isaías 60:1 jyënaˈany: “Pëdëˈëk mijts toxytyëjk ets mdëˈkx mjäjjëty, jaˈko të tpääty ja tiempë parë mdëˈkx mjäjjëty. Jyobaa tyëˈkx jyäjjën yajpääty mëët mijts”. Ja toxytyëjk mëdiˈibë yajmaytyakp yëˈë yˈandijpyë Sión o Jerusalén (Is. 60:14; 62:​1, 2). Jerusalén yëˈë yˈandijpy amukë ja nax käjpn mëdiˈibë ijty nyitënaabyë Israel. Perë ¿näˈä ets wiˈixën ojts pyëdëˈky ja Jerusalén ets ojts tyëˈkx jyajy? ¿Jadaa tyam mas niˈigyë yˈadëy extëmë Isaías ojts tnaskäjpxë? Min nˈokˈijxëm wiˈix yaˈˈatsoowëmbity.

¿Näˈä ets wiˈixën ojts pyëdëˈky ja Jerusalén ets ojts tyëˈkx jyajy? Ja judiyëtëjkëty jam ojts yajmënëjkxtë Babilonia ets jaˈa jam yˈijttë 70 jëmëjt. Ko duˈun jyajty, ja Jerusalén ets ja templë duˈunyë ojts wyëˈëmdë. Ko ja medos etsë persas tjaˈbëjktë Babilonia, ta ja israelitëty yaˈˈanmääytyë ko mbäät jyëmbittë mä ja nyax kyäjpnëtyën ets tˈawdattëty jatëgokë Jyobaa (Esd. 1:​1-4). Mä jëmëjt 537 mä kyajnëm myinyë Jesus, ta tuˈk grupë israelitëty mëdiˈibë nety kyaj të tmastuˈuttë Jyobaa mëdiˈibë tsoˈondëp mä ja 12 tëëmp ääts, jyëmbijttë Jerusalén (Is. 60:4). Ta jatëgokë Jyobaa ojts tˈawdattë, tmooytyë wintsëˈkën, tnixëëwduundë ets tˈagojëdë ja templë (Esd. 3:​1-4, 7-11; 6:​16-22). Ko duˈun tuundë, ta jatëgokë ojtsë Jyobaa tyëˈkxy jyajˈyë mëjˈäjtën jam Jerusalén ets yëˈë yˈandijpy ko ja israelitëty ojts jatëgok tˈawdattë Jyobaa extëmë nety ttsoky. Duˈun ja israelitëty ojts jatëgok tyëˈkx jyäjttë ets tpudëjkëdë jäˈäy parë tˈixyˈattëdë Dios.

Mëdiˈibë Isaías ojts tnaskäjpxë kyaj yˈadëëwdääy jam Jerusalén, pes nimayë israelitëty kyaj tmëmëdoowdë Jyobaa (Neh. 13:27; Mal. 1:​6-8; 2:​13, 14; Mat. 15:​7-9). Ko tiempë nyajxy kyaj tkupëjktë ja Mesías (Mat. 27:​1, 2). Mä jëmëjt 70 ta jatëgokë Jerusalén ets ja templë kyutëgooy.

Jyobaa të nety tnaskäjpxë ko duˈunën tyunäˈäny jyatäˈänyë (Dan. 9:​24-27). Jyobaa kyaj ttsojky ets yëˈë ja Jerusalén ttimyyaˈadëëwdäˈäjëty mëdiˈibë ojts yajnaskäjpxë mä Isaías kapitulo 60.

¿Jadaa tyam mas niˈigyë yˈadëy extëmë Isaías ojts tnaskäjpxë? Taa, per ja “toxytyëjk” mëdiˈibë myaytyakypy yëˈë yˈandijpy “ja Jerusalén käjpn mëdiˈibë tsäjpotm”. Per ¿pënën duˈun yˈandijpy? Yëˈë wiˈix myaˈkxyëtyë Diosë yˈuˈunk yˈënäˈk jam tsäjpotm, yëˈëjënë apostëlë Pablo myaytyäˈägan ko jyënany: “Yëˈë duˈun ndääkˈäjtëm” (Gal. 4:26). Ets yäˈädë toxytyëjk yëˈë yˈuˈunkˈäjtypyë Jesus mëdë 144, 000 mëdiˈibë jukyˈatandëp tsäjpotm, niduˈuk yëˈë apostëlë Pablo. Pënaty jukyˈatandëp tsäjpotm, yëˈë Dios jaˈäjtëdëp ets yëˈë tuˈugë nasionk mëdiˈibë wäˈäts (1 Peed. 2:9; Gal. 6:16).

¿Wiˈix ja Jerusalén mëdiˈibë yajpatp tsäjpotm ojts pyëdëˈky ets ojts tyëˈkxy jyajy? Yëˈëgyëjxm ja yˈuˈunk yˈënäˈk mëdiˈibë wyinˈijx yä Naxwiiny parë jyukyˈattët tsäjpotm. Min nˈokˈijxëm wiˈix ojts dyaˈˈadëwdë mëdiˈibë ojts yajnaskäjpxë mä Isaías kapitulo 60.

Ko ja apostëlëty ojts yˈoˈktääynyëdë, ta ojts tyëjkënë ja tukniˈˈijxën mëdiˈibë kyaj tyëyˈäjtënëty. Pääty pënatyë nety të yajwinˈixtë parë nyëjkxäˈändë tsäjpotm tsojkëbë nety pyëdëˈktëty mët ko agootstuuy nety yajpäättë (Mat. 13:​37-43). Duˈunë nety yaˈitëdë Mëj Babilonia extëmxyëp yajpäättë tsumy matsy ets duˈun ojts yˈittë axtë mä jëmëjt 1914 mä ojts tsyondaknë ja tiempë mëdiˈibë jëjpkëxanëp (Mat. 13:​39, 40). Jaa yˈawäˈätspëtsëëmdë mä jëmëjt 1919, ets jaa ojts tyëˈkx jyäjtë, ¿wiˈix? Ko ojts tyëkëdë ëwäˈkx käjpxwäˈkxpë.a Desde jaa ja nax käjpn pyattë ja tëˈkx jäjjën, axtë pënaty nëjkxandëp tsäjpotm mëdiˈibë yajmaytyaktëp mä Isaías 60:3 (Diˈibʉ Jat. 5:​9, 10).

Mä tiempë myiny kyëdaˈaky pënaty nëjkxandëp tsäjpotm tëˈkxan jäjjandëp mas niˈigyë. Pes ko yˈooktë ta nyëjkxtë tsäjpotm ets yajpäättë mä ja jembyë Jerusalén ets yëˈë yˈandijpy ja 144, 000 mëdiˈibë tunandëp “reyëty ets saserdotëty” (Diˈibʉ Jat. 14:1; 21:​1, 2, 24; 22:​3-5).

Ja jembyë Jerusalén yaˈˈadëwaampy extëm jyënaˈanyë Isaías 60:1 (ijxkijpxyë Isaías 60:​1, 3, 5, 11, 19, 20 mëdë Diˈibʉ Jatanʉp 21:​2, 9-11, 22-26). Duˈun extëm ijty jam Jerusalén yajpäättë ja anaˈambëtëjkëty mëdiˈibë anaˈamdë Israel, nanduˈunën mä ja jembyë Jerusalén, yëˈë anaˈamäämbë Jesukristë mëët ja 144, 000 mä ja jembyë jukyˈäjtën. ¿Ti myaytyäˈägaampy mä Diˈibʉ Jatanʉp ko jyënaˈany ja jembyë Jerusalén “mëdiˈibë tsoˈomp tsäjpotm”? Yëˈë yˈandijpy ko Jesus tˈanaˈamäˈänyë naxwinyëdë jäˈäy. Biiblyë jyënaˈany ko pënaty Diosmëduundëp ets kyaj tmastuˈuttë, “yoˈoyandëp mä ja tëˈkx jäjjën” ets awäˈätspëtsëmandëp mä ja poky etsë oˈkën (Diˈibʉ Jat. 21:​3, 4, 24). Ta netë Dios dyaˈoˈoyëtyäˈäyaˈany tëgokyë duˈun extëmë Isaías jyënany ets ja wiinkpë kugajpxyëty (Apos. 3:21). Yäˈädë tekstë ja ëgäˈäny yˈadëëy ko Jesukristë tyëjkë anaˈambë ets ja yˈadëëwdäˈäjäˈäny ko nety të yˈanaˈamnë Tuk Mil Jëmëjt.