Tuˈugë witëjk mä yaˈawdäjtyë Dios

¿MNIJÄˈÄP ti diˈib yam mˈijxypy mä dibujë? Yëˈë tuˈugë witëjk mä yaˈawdatyë Jyobaa. Ja txëˈaty tabernakulo. Ja israelitëty jeˈeyë ttuunkˈäjttë tuk jëmëjt. ¿Mnijäˈäp pën ojts tniˈanaˈamë ets yajkojëdë tyäˈädë witëjk?

Yëˈë Jyobaa. Ko ja Moisés yˈijty mä ja kopk diˈib xyëˈäjtypy Sinaˈii, net jamë Jyobaa yˈanmääyë wiˈixën dyaˈoyët. Yaˈanmääjy ets dyaˈoyët extëm mbäät pojënë yajtukjanë. Ets dëˈën mbäät tmënëjxtë kogoo tsyënääytyëgatstët mä ja lugäärë äänëˈëk tëtsëˈëkpë.

Ok ixë tadë mutsk kuartuˈunk, tap xyˈixy tuˈugë käjë. Tyäˈädë käjë ja txëˈäjty kääxë kajxyˈatypyë. Jam kääxë nikëjxy tam majtskë anklës diˈib xyëˈäjtypy kerubin, tyäˈädë anklës ak oorë. Ets jap kääxoty tap yˈity majtsk pedasë tsää, mä Dios tkëxjääjy jatëgok ja Mäjkpë Mandamientë, yëˈko Moisés të nety ttukpuˈujë ja jawyiimbë. Nandëˈën jap ojts yajpëjkeˈeky tuk tuˈtsë manaa. ¿Mjamyejtsypy tiinëgaˈa ja manaa?

Jyobaa yëˈë wyinˈijxë Arón ets tniwintsënˈatët ja saserdotëty ets tnëˈëmoˈoy ttuˈumoˈoyët ja käjpn mä wiˈix tˈawdattëdë Jyobaa. Ets ja yˈuˈunk yˈënäˈk nan saserdotëty tyuundë.

Ok ixë netë tadë mëj tëjk. Majtsk dëˈënën myëjëty extëmë tadë mutsk kuartuˈunk. ¿Mˈijxypyë tadë käjuˈunk mä jamë jok pyëtsemy? Jamë saserdotë tnoˈoktë diˈib dëˈën päˈäk xuˈkp extëmë poom. Ok ix tam nandëˈën tuˈugë kandelaabrë diˈib myëdäjtypy jëxtujkë kyudëˈxën. Tam nandëˈën tuˈugë meesë mä yˈity mäjmajtskë tsäjkaaky.

Jap tëjäˈp tap tuk pokë nëë mä kyëbuj tyekypyujtë ja saserdotëty. Ets nan jap nandëˈën yˈity ja lugäär mä tnoˈoktë jëyujk animal diˈib tyukwintsëˈkëdëbë Jyobaa. Tyäˈädë tabernakulo kujkoty yˈity, ets ja israelitëty juwdity nyaynyikojëdë.