Ja jäˈäyëty diˈib Gabaon wijy yˈijttë

MAY ja nax käjpn diˈib jam Kanán ojts nyayjëjpˈixëdë ets tsyiptunäˈändë mëdë israelitëty. Wyinmääytyë ko madäˈäktëp. Per ja jäˈäy diˈibë nety tsënääytyëp Gabaon kyaj dëˈën wyinmääytyë. Yëˈë jyënandë ko israelitëty yëˈë pudëjkëdëbë Dios, ets kyaj tsyiptunandë mëdë Dios. Pääty, ¿mnijäˈäp ti tyuundë ja jäˈäy diˈibë nety tsënääytyëp Gabaon?

Ojts nyaygyäjxëdë ko dëˈën nyayajnaxäˈänëdë extëmxyëp jagam tsyoondë. Ta ttuktëjkëdë wyit diˈib të kyëˈtstäänyë etsë kyëˈëk diˈib të tyujktääynyë. Ta ja tsyemy kyëˈëy tpëjtaktë tukxäˈkoty ets ttuktsëmëˈktë byurrë. Ets tmëtsoˈondë nandëˈënë tsäjkaaky diˈib të jyuˈundäänyë. Ta net ojts tninëjxtë Joswee ets tˈanmääytyë: Jagam nax jagam gäjpnëts ntsoondë, ok ixëtsë nwitëty të kyëˈtstäänyë etsëtsë ntsäjkaaky të jyuˈundäänyë. Kajaats të nduˈuyoˈoytyë etsëts yä të njäˈttë yëˈkots nmëdoyˈäjttë wiˈix myëjëtyë mDios Jyobaa, ets wiˈix tijaty ttuuny jap Ejiptʉ. Päätyëtsë nwintsëndëjk xyˈanmääytyë: Mëtsoondë mgäˈäy mˈukën diˈibë mniduˈuyoˈoytyëp ets nëjx anëëmëdë israelitëty waˈan xytyuumbëˈäjtëm, ets twandäˈäktë ko kyaj tsyiptundët mëdë ngäjpnˈäjtëm.

Ta Joswee mët ja wintsëndëjk tmëbëjktë extëm ja jäˈäyëty diˈib Gabaon yˈanmääyëdë. Ta twandaktë ko kyaj mëët tsyiptunäˈändë. Per kyumdëgëk xëë ta tpëjktë kuentë ko kyaj jagam tsyoondë.

Ta ja Joswee yajtëëjëdë: ¿Tikots të xyˈanëëmëdë ko jagam nax jagam gäjpn mtsoondë?

Ta yˈatsoodë: Yëˈkots të nijawëdë ko mDios Jyobaa të twandaˈaky moˈoyäˈänëdë tyäˈädë naxwinyëdë diˈib Kanán, päätyëts ntsëˈkëdë kots xyaˈooktët. Per ja israelitë kyuytyuundë extëmë nety të tˈanëëmëdë, kyaj dyaˈoˈktë jeˈeyë tˈanmääytyë ets yˈittët tuumbë mosë.

Ko ja rey diˈib Jerusalén tnijäˈäjë ko ja jäˈäyëty diˈib Gabaon të nyayajtuˈugyëdë mëdë Israel ta jyotˈambejky. Pääty tˈanmääjy nimäjtaxkë rey: Mindë ets pudëjkëtsëk ets ntsiptuˈunëm mëdë Gabaon. Ta nyaybyëjkëdë nimëgoxkë rey ets tsyiptunäˈändë mëdë Gabaon. Wiˈixë net mˈokwinmay, ¿oyëdaa ttuundë ja jäˈäyëty diˈib Gabaon ko ojts nyayajtuˈugyëdë mëdë Israel? Min nˈokˈijxëm.