Nimajtskë toxytyëjkë jotmëkpë

KO JA israelitëty nyayajtëjkëdë jotmayoty, ta tˈamdoodë Jyobaa nyaybyudëkë. Jyobaa pyudëjkëdë mët yëˈëygyëjxmë wintsëndëjkë jotmëkatypyë. Biiblyë ja ttijy fesëty. Joswee yëˈë diˈib tim jawyiin tuun fes, ok ta nandëˈën tyuundë fes: Otniel, Aod etsë Samgar. Per jamˈäjt nandëˈën nimajtskë toxytyëjk diˈib pyudëjkë israelitë, ja txëˈäjttë Debora ets Jael.

Debora tyuuny kugajpxy. Yëˈë Jyobaa tuknijäˈäjë tijaty tunan jatanëp, ets ta net tˈanëëmë jäˈäy wiˈixë Jyobaa yˈanëˈëmxëty. Debora tuun nandëˈën fes. Jam yˈuˈunyë tëëxy pyatkëˈëy, ets jamë jäˈäy nyiminëdë ets dyaˈoˈoyëdë yˈamay jyotmay.

Mä tadë tiempë Jabingë nety reyˈäjtp Kanán. Ja tmëdäjty taxtujk mëgoˈpxë kyarrë diˈib mëët tsyiptuny. Jantsy nimay ja tsyiptuumbëty ets pääty tjaˈabejky mayë israelitë extëmë tuumbë mosë. Ja diˈib nyiwintsënˈäjt ja Jabingë tsyiptuumbëty ja txëˈäjty Sisara.

Tuˈugë xëë Debora tmëjwoojy ja fes Barak, ets tˈanmääjy: Dëˈënë Jyobaa të jyënaˈany: Mëtsoon mäjk milë mtsiptuumbëty ets mënëjx mä tadë kopk diˈib xyëˈäjtypy Tabor. Jamtsë Sisara nyajminäˈäny. Ets mijts nyajmadäˈägaampy mä nety jam mtsiptuny mëdë Sisara etsë tsyiptuumbëty.

Barak ta tˈanmääyë Debora: Nëjxëbëts pën xypyanëjxpëts. Debora ta ojts tpanejxy, per ta tˈanmääyë Barak: Ko madäˈägët mä tadë tsip kyaj mijts mninëjxäˈänyëty mëjˈäjtënë yëˈko yëˈë Jyobaa kyëyakaambyë Sisara ets yaˈoogëdët tuˈugë toxytyëjk. Ets dëˈënën tyuun jyäjtë.

Barak ta ojts nyejxy mä ja kopk diˈib xyëˈäjtypy Tabor ets nyaybyäädäˈänëdë mëdë Sisara tsyiptuumbëty. Ta ajotkumonë Jyobaa tjantsy yajmiinyë tuu ets dyajkoomy ja nëë, ta may ojts jyiˈkxtë ja Sisara tsyiptuumbëty. Ta ja Sisara ttukjënajkyë kyarrë ets kyeky.

Ko waanë yˈijty ta Sisara jyajty mä Jael tsyëënë. Ta yajnäjxë tyëgoty ets myooyë waanë letsyë. Ta tyukpatë tsuu ets myanäjxy. Ta netë Jael tkäjpeˈky tuˈugë kepy jëjptsetsy mä tkuxotsyë wyitëjk ets tkuwojpë mä ja Sisara kyëbäjk. Ta ko ja Barak myiiny ta ttukˈijxy ko të nety dyaˈooky ja Sisara. Ta yˈadëëjy extëm ja Debora jyënany.

Tim ok ta ja israelitëty dyaˈoˈktë ja rey Jabin, ta tuk tiempë jyotkujkˈäjttë, kyaj mä tsip.