Ja yetyëjkë mas kumëjääbë

NËˈËN kujkë xëë tiempë nyaxy, ¿mnijäˈäp pënë tadë yetyëjk diˈib ijt mas kumëjää? Yëˈë Sansón diˈib tuun fes. Jyobaa yëˈë myooyë Sansongë mëjää. Kyajnëmë nety myaxuˈunkˈaty ko Jyobaa tˈanmääyë Sansongë tyääk: Mëdataampy tuˈugë mˈuˈunk, ets yëˈë diˈib yaˈawäˈätspëtsëmaambyë israelitë mä ja filisteety.

Yëˈko mä ja yˈit lyugäärë Kanán, jamˈäjt tuˈugë käjpn diˈib xyëˈäjt Filistee, axëkjäˈäyëty diˈib jam tsëënääytyë. May tjantsy myëdäjttë tsyiptuumbë ets yˈaxëktuunë israelitë. Tëgok, ko ja Sansón ojts nyejxy mä tsyëënëdë filisteety, ta nyibëtsëëmë tuˈugë mëj kää jyantsy nyiitsyëty. Per ta dyaˈoˈky ja kää yëˈëyë mëdë kyëˈë. Nandëˈën dyaˈoˈky mëgoˈpxˈamë filisteety.

Ok ta Sansón nyaywyinˈëˈënë mët tuˈugë kiixy diˈib xyëˈäjt Dalila. Pääty ja filisteety wyintsën tˈawäˈänëdë Dalila këjk 1,100 platë meeny, pën tyuknigajxypyë Sansón tidën yajkumëjäädakëp. Dalila tsyojk ja meeny, kyaj tjantsy oy myëtnaymyaayëbëtyë Sansón ets myëtsipˈäjtypyë netyë Diosë kyäjpn. Pääty tjantsy yajtëëyë Sansón tidën ko nëgoo tyim kumëjääˈäjnë.

Taanëmë netë Dalila ojts ttuknigajxyë Sansón tidën ko kyumëjääjëty, yëˈë yˈanmääyë: Ninäˈänëmtsë nwääjy kyayajkeepy näˈäbëts nmaxuˈunkˈaty, Diosëts xywyinˈijx etsëts ndunët tuˈugë tuungë jëjpˈambë, jats nyajtijy nasareo. Kotsë nwääjy yajkaabët tatsë nmëjää nyajtëgoyët.

Ko ja Dalila yˈawäˈänë Sansón ta dyajmanäjxy yˈëxmukëjxy. Ta net dyajtëjkë tuˈugë yetyëjk ets ja Sansón yajkukaabët. Ko ja Sansón ojts jyotwijy, kyaj tnekymyëdäjtyë myëjää. Ta ja filisteety nyidëjkëdë ets myäjtsëdë. Ta majtskë wyiin yajjuˈty, ta ojts yajmënëjxnë tuumbë mosë.

Ko tëgok xyëduundë ja filisteety mä tmëjtundë ja dios Dagon, ta dyajpëtsëëmdë Sansón pujxndëgoty ets tnixiˈigan ttukxiˈigandë, per të nety kujk ja wyaajy yony. Ta tˈanmääjy ja mixyuˈunk diˈibë nety wijtsnëjxëp: Tuktoongëtsë tadë tëjk patpoˈkxë. Ta ko ttombaty ja tëjk patpoˈkxë ta tˈamdooyë Jyobaa mëjää ets jyënany: Waˈanëts nˈooky mëdë tyäˈädë jäˈäyëty. Ta ko ja Sansón ojts tnastijë amëjää ja tëjk patpoˈkxë ta ja tëjk jyijtääjy ets yˈoˈktääjy niˈamukë ja axëkjäˈäy, ja nety jap tëgëk milë filisteety xyëdundë.