Dios twinˈixyë Davit

¿MˈIJXYPY ti yam tuun jäjtëp? Yëˈë yamë tyäˈädë mixyuˈunk të tpëjkë byorreeguˈungë tadë osë. Yëˈë nety tadë osë të ttsëëmgeˈegyë tadë borreeguˈunk ets ttsuˈutsäˈäny. Perë tyäˈädë mixyuˈunk ta tpatsoˈony ets ojts tpëjkë tadë borreeguˈunk. ¡Ets ko tadë osë nyibëdëˈkë, ta ojts dyajtsayuty ets ta dyaˈoˈky! Jatëgokë tyäˈädë mixyuˈunk ojts tpëjkë kää tuˈugë byorreegë. ¿Këdii jotmëkë tyäˈädë mixyuˈunk? ¿Mnijäˈäp pënëˈë?

Yëˈë Davit. Jam tsyëënë mä ja käjpn diˈib xyëˈäjtypy Belén. Ja tyeety txëˈäjty Jesee, ets ttatwelëˈäjtyë Obeed, ja myäängë Rut mëdë Booz. ¿Mjamyejtsypy pën Rut ets Booz? Davit yëˈë ijty kyuentˈäjtëbë tyeetyë byorreegë. Ja myaxuˈunkˈäjty myäjk jëmëjtëbë netyë Saúl të tyëkë rey.

Ta jyajty ja tiempë mä Jyobaa tˈanmääyë Samwel: Nëjx jam Belén mä Jesee tyëjk ets mënëjxë aseytë oybyë. Yëˈëts të nwinˈixy niduˈugë myäänk ets tyunët rey. Ta ja Samwel ojts nyejxy, ko jam jyajty, ta tˈijxyë Eliab ja kyaˈaxkopk määngë Jesee, ta nyayjënanë: Yëˈëyë tyäˈädë Jyobaa të twinˈixy. Perë Jyobaa ta yˈanmääyë: Katë xyˈijxë pyäjkˈyenyˈäjtënë etsë tsyujˈäjtënë. Kyajts yëˈë të nwinˈixy ets tyunët rey.

Ta ja Jesee tmëjwoojy ja myäänk Abinadab ets ttukwinguwoˈojë Samwel. Perë Samwel ta jyënany: Kyaj, Jyobaa nan kyaj yëˈë tyäˈädë të twinˈixy. Ok ta Jesee tmëmiiny ja myäänk diˈib xyëˈäjt Sama. Ta Samwel jyënany: Kyaj, Jyobaa nan kyaj yëˈë tyäˈädë të twinˈixy. Jesee ta nijëxtujkë myäänk ttukwinguwoˈojë Samwel, perë Jyobaa nituˈuk tkawinˈijxy. Ta ja Samwel dyajtëëjy: ¿Yëˈë niˈamukë tyäˈädë määnkˈäjtypy?

Ta ja Jesee yˈatsoojy: Kyaj tam yˈakweˈemy ja tim mutskpë diˈib jam borreegë kuentˈäjtp. Ta ja Samwel jyënany waˈan nëjx dyajwoy, ta ko yajmëmiiny, ta tˈijxy ko jantsy tsuj. Ta Jyobaa yˈanmääyë: Tyäˈädë dëˈën diˈibëts të nwinˈixy, tukutaamëˈëgë aseytë. Ta ja Samwel dëˈën ttuuny. Nyajxy jeky ja tiempë taanëmë Davit tyëjkë tuumbë rey jam Israel.