Ëxpëjkën 5
¿Ti tyuknibëjtakëbë Dios mëdë tyäˈädë Naxwinyëdë?
¿Tiko Jyobaa ojts dyajkojyë Naxwinyëdë? (1, 2)
¿Tiko tyamë tyäˈädë Naxwinyëdë kyaj dyëˈënëty extëm tuˈugë it lugäärë tsujpë? (3)
¿Wiˈix jyatäˈändë axëkjäˈäy? (4)
Mä tiempë myiny kyëdaˈaky, ¿ti tyukmëdunaambyë Jesusë päˈäm jäˈäy, mëjäˈäytyëjk etsë oˈkpëty? (5, 6)
¿Ti net mbäät xytyuny ets xyˈaxäjëdë tyäˈädë kunuˈxën diˈib miin këdakp? (7)
1. Jyobaa ojts dyajkojyë tyäˈädë Naxwinyëdë etsë jäˈäyëty ttuktsëënëdët winë xëë winë tiempë ets agujk jotkujk. Yëˈë tsyojk ets tyäˈädë Naxwinyëdë yˈitët tuktiky mëdë oyjyaˈay (Salmo 115:16; Apostʉlʉty 17:26). Naxwinyëdë ninäˈä kyakutëgoyaˈany; winë xëë winë tiempë yˈitäˈäny (Salmo 104:5; Eclesiastés 1:4).
2. Mä netyë Dios tkayajkojynyëmë jäˈäy, twinˈijxy tukpedasë nax, ta dyajjëmbijty tsuj ja it lugäär diˈib xyëëmoojy Eden. Jam tpëjtaky ja tim jawyiimbë yetyëjk ets ja toxytyëjk: Adán mëdë Eevʉ. Dios tyuknibëjtakë etsë yˈuˈunk yˈënäˈk tpäättët ets dyajtuktuktëdë Naxwinyëdë. Wanaty wanatyxyëp dyajjëmbijttë tëgekyë Naxwinyëdë extëm tuˈugë it lugäärë tsujpë (Génesis 1:28; 2:8, 15).
3. Adán mëdë Eevʉ pyokytyuundë, mët ko këˈëmë jyot wyinmäˈäny dyajtuundë ko tkamëmëdoodë Diosë yˈanaˈamën. Päätyë Jyobaa kyajxpëtsëëmëdë jam Eden, ets dëˈën tyëgoojy ja it lugäärë tsujpë (Génesis 3:1-6, 23). Perë Jyobaa kyaj tjäˈäytyëgoy diˈib ojts ttuknibëjtäägë parë mëdë Naxwinyëdë. Yëˈë wyandakypy dyajjëmbitäˈäny extëm tuˈugë it lugäärë tsujpë, mä tsyëënëdë naxwinyëdë jäˈäy winë xëë winë tiempë. ¿Wiˈix ttunäˈäny? (Salmo 37:29).
4. Jawyiin kyutëgoyäˈäny tëgekyë axëkjäˈäytyëjk, taanëmë tyäˈädë Naxwinyëdë jyëmbitäˈäny extëm tuˈugë it lugäärë tsujpë (Kolosʉ 3:6). Tyäˈädë tyunäˈäny jyatäˈänyëty mä Armajedón, ja Diosë tsyip mä dyajjëjptëgoyaˈany tëgekyë axëkˈäjtën. Ta netë Satanás yajtsumäˈäny 1,000 jëmëjt, pääty ni pën kyanekyjaˈatäˈäny diˈib yajmäˈädëbë Naxwinyëdë. Yëˈëyë jeˈeyë tsokwëˈëmäämbë Diosë kyäjpn (Diˈibʉ Jatanʉp 16:14, 16; 20:1-3).
5. Taanëmë netë Jesukristʉ tˈanaˈamäˈänyë tyäˈädë Naxwinyëdë 1,000 jëmëjt (Diˈibʉ Jatanʉp 20:6) ets wanaty wanaty dyajwäˈätsäˈänyë njotˈäjt nwinmäˈänyˈäjtëm etsë niniˈxˈäjt ngëbäjkˈäjtëm. Dëˈën njëmbitäˈänëm wäˈäts jäˈäy extëmë netyë Adán mëdë Eevʉ mä kyapokytyunyëm. Ta kyaj nyeky jyamˈatäˈänyë päˈäm, mëjäˈäyˈat etsë oˈkën. Niˈamukë yˈägëdäˈägäˈänyë päˈäm jäˈäy etsë mëjäˈäytyëjk yˈaˈënäˈkëyäˈändë (Job 33:25; Isaías 33:24; Diˈibʉ Jatanʉp 21:3, 4).
6. Mä tyuˈuyoˈoyë Jesusë yˈanaˈamënë 1,000 jëmëjt, ja jäˈäyëty diˈib kyaj të tmastuˈuttë Dios tyunäˈändë ets dyajjëmbitäˈändë Naxwinyëdë extëm tuˈugë it lugäärë tsujpë (Matewʉ 5:5). Nandëˈën, diˈibaty miyonkˈam të yˈooktë pyëdëˈëgäˈändë ets jyukyˈatäˈändë jatëgok yä Naxwiiny. (Apostʉlʉty 24:15.) Pënë tadë oˈkpë diˈibë nety të pyëdëˈëktë kyuytyuundëp diˈibë Dios yˈandoopy, jukyˈattëp winë xëë winë tiempë yä Naxwiiny. Per pën kyaj, ta nëjx kyutëgoytyë winë xëë winë tiempë (Fwank 5:28, 29; Diˈibʉ Jatanʉp 20:11-15).
7. Dëˈënë dëˈën tkuytyunäˈänyë Dios diˈib tëëyëp tyuknibëjtakë parë mëdë Naxwinyëdë. ¿Mtsojkënyëˈajtypy xyˈaxäjëdë tyäˈädë kunuˈx kuwäˈänën diˈib miin këdakp? Pën mtsojkënyëˈajtypy, tsojkëp xyˈakˈëxpëkëdë Jyobaa yˈää yˈayuk ets xykyuytyunët xëmë wiˈix yëˈë jyënaˈany. Diˈib mbudëkëdëp parë xykyuytyunët yëˈko mnëjxët mä tadë Tëjk mä yˈËxpëktë Jyobaajë Tyestiigëty (Isaías 11:9; Ebreeʉsʉty 10:24, 25).
[Letrë diˈib miimp mä dibujë mä pajina 10]
Ja it lugäärë tsujpë diˈib tëgoojy
[Letrë diˈib miimp mä dibujë mä pajina 11]
Ko Armajedón nyaxët, ta Naxwinyëdë jyëmbitäˈäny extëm tuˈugë it lugäärë tsujpë