Ëxpëjkën 8

Wiˈixë Dios ttsoky ets jyukyˈattëdë familyë

Yetyëjk diˈib të pyëjknë, ¿ti nyikëjxmˈäjtypy ttunët mä fyamilyë? (1)

¿Wiˈix mbäädë yetyëjk diˈib të pyëjknë tkuentˈatyë yˈuˈunk nyëdoˈoxy? (2)

¿Ti tuunk nyikëjxmˈäjtypy ttunëdë uˈunkteety? (3)

¿Ti tuunk nyikëjxmˈäjtypy ttunëdë uˈunktääk mä fyamilyë? (4)

¿Ti Dios tsyojkypy ttunëdë uˈunktääk uˈunkteety etsë uˈunk ënäˈk? (5)

¿Wiˈixë Biiblyë jyënaˈany ko jäˈäy nyaymyastuˈudëdë diˈib të pyëktë ets ko yaˈajääywyäˈxtë? (6, 7)

1. Mä Biiblyë jyënaˈany ko yetyëjk diˈib të pyëjknë yëˈë ijtp këbäjk mä fyamilyë (1 Korintʉ 11:3). Tuˈuk jeˈeyë nyëdoˈoxy tmëdatët ets tsojkëp syëbilpëktët (1 Timotee 3:2; Titʉ 3:1).

2. Yëˈë yetyëjk diˈib të pyëjknë tsojkëp ttsokëdë yˈuˈunk nyëdoˈoxy dëˈën extëm yëˈë këˈëm nyaytsyokyëty. Dëˈën extëmë Jesús ttsoky ja jäˈäyëty diˈib panëjxëdëp (Éfesʉ 5:25, 28, 29). Ninäˈä tkawop tkatsiigët ets ni tkaˈaxëktunët. Niˈigyë tmëjkumayët ets twintsëˈëgët (Kolosʉ 3:19; 1  Peedrʉ 3:7).

3. Yëˈë uˈunkteety tsojkëp tyunët mëk ets tˈijxˈit tkuentˈatëdë fyamilyë. Tsojkëp tmoˈoyëdë nyëdoˈoxy etsë yˈuˈunk yˈënäˈkë kyaˈay yˈukën, wyit nyijam, etsë jyëën tyëjk. Nan tsojkëbë fyamilyë ttukˈëxpëkëdë Diosë yˈää yˈayuk (1 Timotee 5:8). Yëˈë patëp tpudëkëdë fyamilyë ets ttuknijawët tijatyë Dios tyuknibëjtakëp (Deuteronomio 6:4-9; Éfesʉ 6:4).

4. Toxytyëjk diˈib të pyëjknë tsojkëp nandëˈën tpudëkëdë yˈuˈunk nyaˈay (Génesis 2:18). Tsojkëp tpudëkët mä tˈëwijy tkäjxwijˈyë yˈuˈunk yˈënäˈk (Proverbios 1:8). Jyobaa tsyojkypy etsë toxytyëjk diˈib të pyëjknë tkuentˈatëdë fyamilyë xondaˈakyˈää xondaˈakyjyot (Proverbios 31:10, 15, 26, 27; Titʉ 2:4, 5). Tsojkëp nandëˈën twintsëˈëgëdë yˈuˈunk nyaˈay mëjwiin kajaa (Éfesʉ 5:22, 23, 33).

5. Dios tsyojkypy etsë uˈunk ënäˈk tmëmëdowdëdë tyääk tyeety (Éfesʉ 6:1-3). Etsë uˈunktääk uˈunkteety tˈëwij tkäjxwijtëdë yˈuˈunk yˈënäˈk ets tnëˈëmoˈoy ttuˈumoˈoyët. Nandëˈën tjuuttëdë tiempë ets tˈëxpëktëdë Biiblyë mëdë yˈuˈunk yˈënäˈk, tpudëkëdët ets tmëwingondët niˈigyë Dios ets tˈix ttundët wiˈixë yˈuˈunk yˈënäˈk oy nyayjawëdët (Deuteronomio 11:18, 19; Proverbios 22:6, 15). Ninäˈä mbäät tkatëytyundë yˈuˈunk yˈënäˈk ko tjëjwijtsëmbittët (Kolosʉ 3:21).

6. Ko jäˈäy diˈib të pyëktë kyanaymyënëjxëdë oy mä tsyënäˈäy jyukyˈäjtënë, tsojkëp tkuytyunëdë Biiblyë kyäjxwijënë, pes yëˈë xyˈanmäˈäyëm ets nˈijtëm tsojkpë jäˈäy ets pojpëmaˈxpë jäˈäy (Kolosʉ 3:12-14). Biiblyë kyaj dyajnigutukë etsë jäˈäy nyaymyastuˈudëdët mët ko tmëdattë yinaty wanatyë amay jotmay. Perë tadë toxytyëjk mbäät këˈëm dyajˈyoˈoyë jyot wyinmäˈäny pën myastuˈudaambyë nyaˈay, per net pënë 1) tyäˈädë yetyëjk kyaj tˈixäˈänyë fyamilyë o kyaj dyakäˈäny tijaty tëgoyˈäjtp 2) pën tim mëk awäˈän ets axtë mbäädë nyëdoˈoxy dyajpäˈämdëkë o axtë jyukyˈäjtënë tpëtakë jotmayjëjpˈam 3) pën tim mëk tyukmëtsipˈatyëtyë ëxpëjkënë ets pën kyaj nyaˈay nyaˈixyëty tmëdunëdë Jyobaa (1 Korintʉ 7:12, 13).

7. Yëˈë jäˈäy diˈib të pyëktë tsojkëp nyaywyintsëˈëgëdët nixim niyam. Ko jäˈäy yˈity tsyëënë mëdë wiink yetyëjk o mëdë wiink toxytyëjk dëˈën tmëbokytyunyë Dios ets nandëˈën diˈib mëët të pyeky (Ebreeʉsʉty 13:4). Biiblyë yajnigutujkëp etsë jäˈäy yaˈajääywyäˈxtët, per net pënë tadë toxytyëjk o yetyëjk ijt tsënaapy mëdë wiinkpë, netën mbäät yaˈajääywyäˈxtët ets wyëˈëmët awäˈätstum oy jatëgok pyëjktëgatsët (Matewʉ 19:6-9; Romanʉs 7:2, 3). Jyobaa mëk tˈaxëkˈixy ko pën yaˈajääywyaˈxy mët waanë ti ets pyëjktëgatsy jatëgok (Malaquías 2:14-16; 1 Korintʉ 7:10).

[Letrë diˈib miimp mä dibujë mä pajina 17]

Dios yˈawijxypy etsë uˈunktääk uˈunkteety tˈëwij tkäjxwijëdë yˈuˈunk yˈënäˈk ets tjëjwijtsëmbittët

[Letrë diˈib miimp mä dibujë mä pajina 17]

Uˈunkteetyë oyjyaˈaybyë myoobyë fyamilyë ti tëgoyˈäjtxëp ets tyukˈëxpejkypy nandëˈënë Diosë yˈää yˈayuk