Wiˈix xypyäädëdë relijyonk diˈib tëyˈäjtën

Pën mˈitäämp myëtnaymyaayëbë Dios, tsojkëp xypyadunëdë relijyonk diˈibë Dios kyupejkypy. Jesus jyënany ko ja jäˈäyëty diˈib jantsy Dios mëduundëp yˈawdatandëbë Dios tëyˈäjtën mëët (Fwank 4:23, 24). Tuk nax jeˈeyë yˈoyëty wiˈix mbäädë Dios yaˈawdaty (Ɛfɛsʉ 4:4-6). Tadë relijyonk diˈib tëyˈäjtën myënejxy mä jukyˈäjtënë winë xëë winë tiempë, etsë tadë relijyonk diˈib kyaj tyëyˈäjtënëty myënejxy mä kutëgoˈoyën (Matewʉ 7:13, 14).

Mbäät xynyijawë diˈibë relijyonk tëyˈäjtën ko xyˈix xytyunëdë tadë jäˈäyëty diˈib pyaduundëp. Jyobaa oyjyaˈayë, pääty, pënaty awdatanëp tsojkëp yˈittët oyjyaˈay. Dëˈën extëm tuˈugë narankë kepyë oybyë oyatyë tyëëmp dyaky, nandëˈënë relijyonk diˈib tëyˈäjtën, yajjëmbijtypyë jäˈäy oyjyaˈay (Matewʉ 7:15-20).

Myëtnaymyaayëbëtyë Jyobaa wyintsëˈkëdëp mëkë Biiblyë. Nyijäˈädëp ko Biiblyë yëˈë Diosë jyaˈa. Pääty, tnasˈixëdë ets yëˈë nyëˈëmoˈoy tyuˈumoˈoyëdët mä jyukyˈäjtën, ets pyudëkëdët ko amay jotmay tpäättë ets tyukˈixyˈatëdët nandëˈën niˈigyë Dios (2 Timoté 3:16). Nandëˈën, tyuundëbë mëjää ets tkuytyundë diˈib kyäjxwäˈxtëp.

Myëtnaymyaayëbëtyë Jyobaa yaˈijxëdëp ko naytsyojkëdëp nixim niyam. Jesus yaˈijxë ko tsyojkë jäˈäy mët ko ttukniˈijxë Diosë jyaˈa ets ko nandëˈën dyajtsoky ja päˈäm jäˈäy. Pënaty pyaduundëbë relijyonk diˈib tëyˈäjtën nandëˈën tsyojktëbë wiink jäˈäy. Kyaj tjëdijtë ayoobë jäˈäy ets ni yëˈë diˈib wiink käjpn tsoˈomp o diˈib wiink ayuk käjxp, dëˈën extëmë Jesus. Yëˈë jyënany ko ja jäˈäyëty nyijawëyandëp pënatyëty yëˈë yˈëxpëjkpëˈäjtypy mët ko tmëdatäˈändë ja tsojkënë nixim niyam (Fwank 13:35).

Myëtnaymyaayëbëtyë Dios myëjˈijxtëbë Diosë xyëë: Jyobaa. Ko pën kyaj dyajtunäˈänëdë mxëë, ¿mˈoymyëtnaymyaayëbë nety? Pes kyaj. Ko nmëdäjtëm tuˈugë mëtnaymyaayëbë, ndukmëgäjxëmë xyëë ets oy nimaytyakëm mä wiink jäˈäy. Pääty, pënaty naymyayanëdëp mëdë Dios tsojkëp dyajtunëdë Diosë xyëë ets tnigäjx tnimaytyäˈägët mä wiink jäˈäy. Jyobaa tsyojkypy ets dëˈën xytyunët (Matewʉ 6:9; Romʉ 10:13, 14).

Dëˈën extëmë Jesus, Diosë myëtnaymyaayëbëty tyukniˈijxëdëbë jäˈäy diˈib mä Diosë yˈAnaˈam Kyutujkën. Tadë Diosë Kyutujkën yëˈë tuˈugë anaˈamënë jam tsäjpotm diˈib yajjëmbitaambyë Naxwinyëdë extëm tuˈugë it lugäärë tsujpë. Yëˈë myëtnaymyaayëbëtyë Dios tyukˈnijäˈädëbë wiink jäˈäy tii tyunaambyë tyäˈädë Diosë yˈAnaˈam Kyutujkën (Matewʉ 24:14).

Yëˈë Jyobaajë tyestiigëty tyuundëbë mëjää ets mëdë Dios nyaymyaayëdët. Wyintsëˈkëdëbë Biiblyë ets naytsyojkëdëp nixim niyam. Nandëˈën yajtuundëp ets myëjˈijxtëbë Diosë xyëë ets tyukniˈijxëdëbë wiink jäˈäy wiˈix yˈixˈatäˈänyë Diosë Kyutujkën. Yëˈë Jyobaajë tyestiigëty yëˈën tyam pyaduundëbë relijyonk diˈib tëyˈäjtën yä Naxwiiny.