Nyitsoˈoktë jäˈäy mä ja Ayoˈonduu

KO JA naxwinyëdë jäˈäy ojts myayënë, ta ja poky etsë axëkˈäjtën ojts myëjwindëjkënë. Mä tyäˈädë tiempë jyukyˈajtyë Enok, waˈan yëˈë jeˈeyë naytyuˈuk Dios mëduuny yä Naxwiiny, yëˈë ojts tnaskäjxë ko Jyobaa dyajkutëgoyaˈany niˈamukë axëkjäˈäy. Per ja jäˈäyëty duˈun dyajnäjxtë extëm pyojˈyën. Ets niˈigyë jyantsy myëjwindëjkë axëkˈäjtën ko ja anklësëty tmëduundëgooytyë Jyobaa, tnikaktë ja tyuunk jam tsäjpotm ets jyëmbijttë extëmë naxwinyëdë jäˈäy, ta pyëjktë mët mayë toxytyëjk nääk ttimtsojktë. Ko yˈijt tsyënääytyë mët ja toxytyëjkëty, ta tpattë yˈuˈunk diˈib yajtijtë nefilim, yaˈktë jantsy mëjatyëty ets yˈijttë jantsy kumëjää, yëˈë yajmëjwindëjkëdë axëkˈäjtën yä Naxwiiny. Dios mëk tjantsy jäˈäjë ko tˈijxy ja Naxwinyëdë të tyuktuky mëdë axëkˈäjtën.

Ko Enok ojts yˈoˈknë, ta jyukyˈajty ja tuˈugë oyjyaˈay diˈib xyëˈäjt Noˈee, yëˈë mëdë fyamilyë tyuundë mëjää parë Dios tmëmëdoodë. Ko Dios ttukniwinmayë dyajminäˈänyë ayoˈonduu parë kyutëgoyëdë axëkjäˈäy, kyaj ttsejky ets yˈoogëdë Noˈee etsë jëyujk animal. Pääty tˈanmääyë Noˈee ets dyaˈoyët tuˈugë arkë duˈun extëm tuˈugë käjë diˈib yeny, ets jap tsyoˈoktët mëdë fyamilyë ets mët kexy kaˈpxyë jëyujk. Noˈee myëmëdoo Dios ta tyëjkë tuumbë, ets ja ttuunkˈäjty ja arkë naa 40 o 50 jëmëjtën, nan “kyäjxwäˈx esë jäˈäy wäˈäts jyikyˈattët” (2 Peedrʉ 2:5). Tyukmëtmaytyakë jäˈäy ko wingoombë naty ja Ayoˈonduu, per nipën tkamëjpëjtaky. Ta jyajtyë tiempë parë Noˈee mëdë fyamilyë tyëkëdët arkoty mët kexy kaˈpxyë jëyujk. Ta netë Dios dyaˈˈadujky ja tëjkˈää, ets myiiny ja komduu.

Jantsy kom tyuuy 40 xyëë 40 ux, ta ja Naxwinyëdë nyëpaˈtstääy. Nituˈugë axëkjäˈäy ojts kyatsokweˈemy. Kanäk poˈo nyajxy ta ja nëë jyënäjktsoˈony, ta ja arkë ojts nyaxkëdaˈaky mä tuˈugë kopk. Tuk jëmëjtë Noˈee mëdë fyamilyë yˈijttë arkoty, ets ko pyëtsëëmdë, ta Noˈee twintsëˈkë Jyobaa parë tmooyë dyoskujuyëm ko naty të yajtsoˈogëdë. Ta Dios twandaky ko ninäˈä mëdë ayoˈonduu tkanekyyajkutëgoyaˈanyë naxwinyëdë jäˈäy etsë jëyujk animal, pääty tpëjtakyë iˈtsy parë naxwinyëdë jäˈäy tjamyatstëdë tyäˈädë wandakën.

Ko ja Ayoˈonduu nyajxy, ta Dios dyajkyë jembyë anaˈamën, ojts jyënaˈany ko mbäät yajtsuˈutsyë jëyujk, per kyaj yajjëˈxëdë nyeˈpyny. Nanduˈun ojts yaˈˈanëëmëdë ets yˈayoˈoywyäˈxtët parë dyajwinduktëdë Naxwinyëdë. Per ko ja tiempë nyajxy, tamˈäjtë jäˈäy diˈib kyaj tmëmëdowandë tyäˈädë Diosë yˈanaˈamën. Extëmë Nemrot diˈib yajtuˈukmujkë jäˈäy parë yajkojët tuˈugë mëj potsy mä ja käjpn diˈib xyëˈäjt Babel, diˈib ok yajxëëmooy Babilonyë. Perë Dios kyaj tnasˈijxë ets ja jäˈäyëty ttukpëtsëmëdë wyinmäˈäny. ¿Ti tyuun? Yajkäjxpëjktääytyë wiink ayuk. Ets kom kyaj nyekynyayjaygyujkëdë ta yˈayoˈoywyäˈxtääytyë.

(Jap yajnimaytyaˈaky mä Génesis kapitulo 6-11 ets mä Juudʉs 14, 15.)