Ëy diˈib xyjotkujkmoˈoyëm ets xynyëˈëmoˈoy xytyuˈumoˈoyëm

MÄ Biiblyë diˈib mayë kapitulo myëmiimpy yëˈë Salmos, yëˈë jap yajkujäˈäyë mä Dios ojts yajkuyˈëy. Ja jyejky tuk mil jëmëjt parë yajjääytyaay. Pënaty wyäˈptë tyäˈädë ëy, jap tkëxjääytyë nuˈun ja mëbëjkën tmëdäjttë. Nan ojts tkëxjäˈäytyë ko jotkujk nyayjäˈäjëdë, ko tpattë ayoˈon jotmay, ko myoon tyujktë, ko jyodëmbijttë, ko tijaty tmëjjäˈäjëdë ets ko ojts tmëjkugäjxëdë Jyobaa. Niˈamukë tyäˈädë yetyëjk tsyojktë Dios ets wingon mëët yˈijttë. Min nˈokˈijxëm tuk peky majtsk peky tijaty tyäˈädë ëy myaytyakypy mä Salmos.

Jyobaa diˈib yˈanaˈamdaapy tukëˈëyë, nitëjkëp nˈawdäjtëm ets nmëjkumäˈäyëm. Salmo 83:18 yajxon jyënaˈany: “Mijts, mxëˈaty Jyobaa, mijts jeˈeyë naytyuˈuk diˈib mˈijtp jantsy Këjxm abëtsemy nyaxwinyëdë”. Mä Salmos yajmëjkumaabyë Jyobaa ko ojts dyajkojˈyë tsäjp, mëtsäˈä, ko dyajkyë jukyˈäjtën ets ko tsuj yajxon ojts xyajkojëm (Salmos 8, 19, 139 etsë 148). Nan tap mä yajmëjkumay ko ojts tkuwäˈäny ets dyaˈˈawäˈätspëtseemy pënaty xëmë mëduunë (Salmos 18, 97 etsë 138). Ets nan myaytyakypy ko Dios tyuumbyë tëyˈäjtën, pyudëjkëp pënaty yaˈˈaxëktuump ets tyukumëdoopy pënaty axëëk adëtstëp (Salmos 11, 68 etsë 146).

Jyobaa pyudëjkëp ets jyotkujkmoopy pënaty tsojkëp. Mayë jäˈäy tnijawëdë wiˈix jyënaˈanyë Salmo 23, mä Dabit tˈijxkijxyë nDeetyˈäjtëmë tsäjpotmëdë mët tuˈugë borreegë kuentˈäjtpë diˈib tsojkp, tuˈumoopy, kuwäämp ets kuentˈäjtp. Salmo 65:2 xytyuknijäˈäjëm ko Jyobaa myëdooˈijtypyë “nuˈkxtakën”. Ets pënaty kajaa të tyuundëgoytyë jotkujkmooyëdëbë Salmos 39 etsë 51, mä Dabit tkujäˈäyë wiˈix jyantsy jodëmbijty ko naty mëjwiin kajaa të tyuundëgoy ets wiˈix yˈijty seguurë ko Dios pokymyaˈkxanëbë naty. Ets mä Salmo 55:22 xyˈanmäˈäyëm nmëbëjkëmë Jyobaa ets ndukëdëjkëmë njotmayˈäjtëm.

Jyobaa dyajminäˈäny ja jembyë jukyˈäjtën mët yëˈëgyëjxmë Kristë yˈAnaˈamën. Mä Salmos kanäkˈok yajnimaytyaˈagyë Mesias, ja Anaˈambë diˈib yajwandak. Extëm mä Salmo 2 ojts yajnigajxy ko dyajkutëgoyaˈanyë pënaty kyaj myëmëdoyëty. Mä Salmo 72 tnimaytyaˈaky ko yajjëjptëgoyaambyë yuu, tyunaambyë tëyˈäjtën ets kyaj pën nyekyyaˈˈaxëktunäˈäny. Salmo 46:9 jyënaˈany ko mët yëˈëgyëjxmë Kristë yˈAnaˈamën, Dios dyajjëjptëgoyaˈanyë tsip ets tijatyë jäˈäy mëët tsyiptuny. Ets mä Salmo 37 tnimaytyaˈaky ko mä ja jembyë jukyˈäjtën kyaj nyekyjamˈatäˈänyë axëkjäˈäy ets ko oyjyaˈay jyukyˈatäˈändë agujk jotkujk.

(Jap yajnimaytyaˈaky mä Salmos.)