¿Pën yajtijp prekursoor?

Tyäʼädë ayuk prekursoor, yëʼë yʼandijpy yajtuʼuʼawatspë. Mbäät njënäʼänëm ko Jesus tuun extëmë prekursoor, pes yajkajx yä Naxwiiny parë dyaʼʼawatsy ja tuʼu ets nbatëm ja nitsokën (Matewʉ 20:28). Tyam, nan yëʼëjëts nbanëjkxtëbë yʼijxpajtën ets kajaatsë tiempë nyajtundë parëtsë jäʼäy nyaʼëxpëktë (Matewʉ 28:19, 20). Ets ta nääk diʼib të dyajtsondäʼäktë duʼumbë tuunk diʼibëts ndijtëp prekursoor.

Tuʼugë prekursoor yëʼë diʼib jeky käjpxwäʼkxp. Niʼamukë Jyobaa tyestiigëty kyäjpxwäʼkxtëbë oybyë ayuk. Per ta diʼib të ttukniwitsëdë parë tyundët prekursoor regulaar ets dyaktët 70 oorë poʼoboʼo. Pääty nääk, jeʼeyë tyundë tukijkxyëë. Ets ta diʼib yajwinʼijxtëp ets tyundët prekursoor espesial ets yajkaxtë mä tyëgoyʼatyë käjpxwäʼkxpë, ja tyundë poʼoboʼo 130 oorë o niʼigyë. Pënaty tuundëp prekursoor, adëyë jyukyʼattë ets myëbëjktëp ko Jyobaa mbäät myoʼoyëdë tijaty yajtëgoyʼäjttëp (Matewʉ 6:31-33; 1 Timotee 6:6-8). Pënaty kyaj mbäät tyundë prekursoor regulaar o espesial, mbäät tyundë prekursoor ausilyaar ets dyaktët 30 oorë o 50 oorë poʼoboʼo.

Tyundë prekursoor mët ko ttsoktë Dios etsë jäʼäy. Duʼun extëmë Jesus, nbëjktëbëtsë kuentë ko tsojkëbë jäʼäy tnijawëdët pënën Dios ets tijaty tyuknibëjtakëp (Markʉs 6:34). Ets kom yajnijäʼäwëp ja tëyʼäjtën diʼib mbäädë jäʼäy pyudëkëty ets jyotkujkmoʼoyëty, ta tyundë prekursoor ets dyajtundë xyëë tiempë etsë jyot myëjää parë tpudëkëdë jäʼäy ets ttukʼixyʼattë Dios mët ko ttsoktë (Matewʉ 22:39; 1 Tesalónikʉ 2:8). Ets nan pudëjkëdëp parë mëk ja myëbëjkën tmëdatët ets tmëwingondëdë Dios, tyäʼädë yëʼë diʼib mooyëdëbë jotkujkʼäjtën (Apostʉlʉty 20:35).

• ¿Pën yajtijp prekursoor?

• ¿Tiko nääk duʼun tyundë prekursoor?